শ্ৰীলংকাত ১৯৯৬ চনৰ বিশ্বকাপত বিজয়ী ক্ৰিকেট দলক সাক্ষাৎ প্ৰধানমন্ত্ৰী মোদীৰ, জয়সূৰ্যই ক’লে- আচৰিত অভিজ্ঞতা
বৰ্তমান শ্ৰীলংকা ভ্ৰমণত আছে প্ৰধানমন্ত্ৰী নৰেন্দ্ৰ মোদী । এই সময়ছোৱাত তেওঁ ১৯৯৬ চনত বিশ্বকাপ জয় কৰা শ্ৰীলংকাৰ ক্ৰিকেট দলটোক সাক্ষাৎ কৰে । প্ৰধানমন্ত্ৰী মোদীয়ে কলম্বোত সনাথ জয়সূৰ্য, চামিন্দা ভাছ, আৰবিন্দ ডি চিলভা, মাৰ্ভান আটাপট্টু আদিকে ধৰি শ্ৰীলংকাৰ প্ৰাক্তন ক্ৰিকেটাৰসকলৰ সৈতে মত বিনিময় কৰে ।
এই সাক্ষাতৰ বিষয়ে প্ৰধানমন্ত্ৰী মোদীয়ে ছচিয়েল মিডিয়া প্লেটফৰ্ম এক্সত পোষ্ট কৰিছে । প্ৰধানমন্ত্ৰী মোদীয়ে লিখিছে যে ১৯৯৬ চনত বিশ্বকাপ জয় কৰা শ্ৰীলংকাৰ ক্ৰিকেট দলৰ সদস্যসকলক লগ পাই তেওঁ অত্যন্ত সুখী হৈছে । এইটোৱেই সেই দল যিয়ে কেৱল ট্ৰফী লাভ কৰাই নহয়, সমগ্ৰ বিশ্বৰ লাখ লাখ ক্ৰীড়াপ্ৰেমীৰ কল্পনাকো সজীৱ কৰি তুলিছে ।
প্ৰধানমন্ত্ৰী মোডীক সাক্ষাৎ কৰাটো এটা আচৰিত অভিজ্ঞতা : জয়সূৰ্য
মোদীক সাক্ষাৎ কৰাৰ পিছত শ্ৰীলংকাৰ প্ৰাক্তন ক্ৰিকেটাৰ সনাথ জয়সূৰ্যই কয় যে প্ৰধানমন্ত্ৰী নৰেন্দ্ৰ মোদীক সাক্ষাৎ কৰাটো এক আচৰিত অভিজ্ঞতা । তেওঁ ভাৰতবৰ্ষক কেনেকৈ ৰাষ্ট্ৰ হিচাপে গঢ়ি তুলিছে, সেই বিষয়ে তেওঁ খুব ভালকৈ বুজাই দিলে । আমি কিছু কথা আলোচনা কৰি ক্ৰিকেটৰ কথা পাতিলোঁ । এই সময়ত তেওঁ কেনেদৰে ক্ষমতা দখল কৰিলে আৰু দেশৰ বিকাশ কেনেদৰে কৰিছে সেই সন্দৰ্ভতো আলোচনা হয় । আমাৰ বাবেও এইটো আছিল এক সুন্দৰ অভিজ্ঞতা । প্ৰধানমন্ত্ৰী মোদীয়ে ভাৰতৰ বাবে কৰা সকলো কাম বিতংভাৱে বুজাই দিলে ।
‘শ্ৰীলংকাৰ বাবে বহু কাম কৰিছে প্ৰধানমন্ত্ৰী মোদীয়ে’
আনহাতে, শ্ৰীলংকাৰ ক্ৰিকেটাৰ কে. ৰমেশ কালুভিথাৰাণাই কয় যে, প্ৰধানমন্ত্ৰী মোদীয়ে শ্ৰীলংকাৰ বাবেও বহু কাম কৰিছে । সংকটৰ সময়ত ভাৰত সদায় আমাৰ লগত আছে ।
‘প্ৰধানমন্ত্ৰী মোদী সমগ্ৰ বিশ্বতে এজন সন্মানীয় ব্যক্তি’
শ্ৰীলংকাৰ ক্ৰিকেটাৰ অৰবিন্দ ডি ছিলভাই কয় যে প্ৰধানমন্ত্ৰী মোদী সমগ্ৰ বিশ্বতে এজন সন্মানীয় ব্যক্তি আৰু তেওঁ ভাৰতৰ বাবে বহু কাম কৰিছে । ইমান বৃহৎ দেশত তৃতীয়বাৰৰ বাবে প্ৰধানমন্ত্ৰী হোৱাটো এক উল্লেখযোগ্য কৃতিত্ব । এই দেশত তেওঁৰ প্ৰভাৱ অতি উল্লেখযোগ্য । তেওঁৰ লগত কথা পাতি বৰ ভাল লাগিল ।