পাহাৰ-ভৈয়ামৰ সম্প্ৰীতিৰ বাৰ্তাৰে বৃহস্পতিবাৰৰ পৰা আৰম্ভ হ’ল জোনবিল মেলা । শতিকা পুৰণি বিনিময় প্ৰথাৰে আজি আৰম্ভ হয় এই ঐতিহাসিক মেলাৰ ।

অসমৰ লোক-সংস্কৃতিৰ এক অনবদ্য নিদৰ্শন তথা মৰিগাঁও জিলাৰ জাগীৰোডৰ ঐতিহ্যমণ্ডিত জোনবিল মেলা বুধবাৰৰ পৰা পৰম্পৰাগত ৰীতি-নীতিৰে আৰম্ভ হৈছে । যুগ যুগ ধৰি পাহাৰ আৰু ভৈয়ামৰ মাজত সমন্বয়ৰ সেতু গঢ়ি অহা এই তিদিনীয়া মেলাখনে এইবেলিও এক উখল-মাখল পৰিৱেশৰ সৃষ্টি কৰিছে ।

গোভা ৰজাৰ উপস্থিতিত শুভ উদ্বোধন-

ঐতিহ্যবাহী ধৰ্মীয় অনুষ্ঠান আৰু গোভা ৰজাৰ উপস্থিতিয়ে মেলাখনক এক বিশেষ গাম্ভীৰ্য প্ৰদান কৰিছে । জাগীৰোড-মৰিগাঁও সংযোগী পথৰ কাষত থকা প্ৰাকৃতিক জোনবিলৰ পাৰত অনুষ্ঠিত এই মেলাখন অহা ২৪ জানুৱাৰীলৈকে চলিব । এই উদ্বোধনী অনুষ্ঠানত তিৱা স্বায়ত্তশাসিত পৰিষদৰ বিষয়ববীয়াসকলৰ লগতে বহু গণ্য-মান্য ব্যক্তি উপস্থিত থাকে ।

পাহাৰ-ভৈয়ামৰ বিনিময় প্ৰথা-

মেলাৰ আটাইতকৈ আকৰ্ষণীয় দিশটো হ’ল শতিকা পুৰণি বিনিময় প্ৰথা । আজি জোনবিল মেলাৰ দ্বিতীয় দিনা কাৰ্বি আংলং আৰু চুবুৰীয়া মেঘালয়ৰ প্ৰায় ৮০ খন গাঁৱৰ পাহাৰীয়া ভাই-ভনীসকলে তেওঁলোকৰ উৎপাদিত সামগ্ৰী যেনে— আদা, হালধি, জলকীয়া, কচু আৰু ধুনা লৈ জোনবিলৰ পাৰলৈ নামি আহিছে । ইয়াৰ বিনিময়ত ভৈয়ামৰ লোকসকলে সান্দহ, পিঠা, লাড়ু আৰু শুকান মাছ আদি আগবঢ়াই এক নিভাজ আৰু আন্তৰিক বিনিময়ত লিপ্ত হয় ।

সাংস্কৃতিক কাৰ্যসূচী আৰু সামূহিক মৎস্য চিকাৰ-

মেলাৰ আন এক অন্যতম আকৰ্ষণ হ’ল জোনবিলত অনুষ্ঠিত হোৱা সামূহিক মৎস্য চিকাৰ । জাতি-ধৰ্ম-বৰ্ণ নিৰ্বিশেষে সহস্ৰাধিক লোকে একেলগে বিলত মাছ ধৰি একতাৰ পৰিচয় দাঙি ধৰে । ইয়াৰ উপৰি তিৱা সকলৰ লগতে অন্যান্য জনগোষ্ঠীসমূহৰ পৰম্পৰাগত খেল-ধেমালি আৰু লোক-নৃত্যই জোনবিল মেলাথলী মুখৰিত কৰি তুলিছে ।

অসম চৰকাৰৰ তৰফৰ পৰা গোভা ৰজা তথা অন্যান্য ৰজাসকললৈ পৰম্পৰাগত ‘ৰাজভাট্টা‘ প্ৰদানৰ অনুষ্ঠানটিও এইবাৰ বিশেষভাৱে আয়োজন কৰা হৈছে । এই মেলাই কেৱল সামগ্ৰীৰ আদান-প্ৰদান কৰাই নহয়, বৰঞ্চ পাহাৰ আৰু ভৈয়ামৰ জনগোষ্ঠীসমূহৰ মাজত শতিকা জুৰি চলি অহা ভাতৃত্ববোধ আৰু শান্তিৰ বাৰ্তাক অধিক সুদৃঢ় কৰি আহিছে ।

লগতে পঢ়ক : কৰ্তব্য পথত ইতিহাস ৰচিব ২৬ বছৰীয়া মহিলা বিষয়াই… জানক কোন হয় ছিমৰন বালা ?