মৰক্কোৱে স্পষ্ট কৰি দিছে যে ফিফা বিশ্বকাপত কেৱল অংশগ্ৰহণৰ বাবেই নহয়, তেওঁলোকে ইতিহাস ৰচনা কৰিবলৈহে প্ৰৱেশ কৰিছে। ইফালে ব্ৰাজিলেও নিশ্চয় উপলব্ধি কৰিছে যে এইবাৰো খিতাপৰ পথ সহজ নহ’ব।

ফিফা বিশ্বকাপ ২০২৬ত ব্ৰাজিলৰ আৰম্ভণি আশা কৰা ধৰণৰ নহ’ল। পাঁচবাৰৰ বিশ্ব চেম্পিয়ন দলটোৱে প্ৰথমখন খেলতে মৰক্কোৰ বিৰুদ্ধে এক কঠিন পৰীক্ষাৰ সম্মুখীন হ’বলগীয়া হয়। ১৪ জুন (দেওবাৰ) নিউ জাৰ্চিৰ মেটলাইফ ষ্টেডিয়ামত অনুষ্ঠিত গ্ৰুপ-চি (Group-C)ৰ খেলখনত মৰক্কোৱে ব্ৰাজিলক ১-১ গ’লৰ সমতাত ৰখাই দিয়ে। খেলৰ অন্তিম মুহূৰ্তত যদি গ’লকীপাৰ আলিসন বেকাৰে সুন্দৰভাৱে গ’ল ৰোধ নকৰিলেহেঁতেন, তেন্তে ব্ৰাজিলে পৰাজয়ৰো সন্মুখীন হ’বলগীয়া হ’ব পাৰিলেহেঁতেন।

এই হাইভল্টেজ মেচখনত মৰক্কোৱে আৰম্ভণিৰে পৰাই ব্ৰাজিলৰ ওপৰত চাপ সৃষ্টি কৰি ৰাখিছিল। চাৰি বছৰ পূৰ্বে বিশ্বকাপৰ চেমীফাইনেলত প্ৰৱেশ কৰা আফ্ৰিকান দলটোৱে দেখুৱাই দিলে যে এইবাৰো তেওঁলোকৰ হাতত ডাঙৰ দল ওলট-পালট কৰাৰ ক্ষমতা আছে। খেলখনৰ প্ৰথম ২০ মিনিটত ব্ৰাজিলে নিজৰ ছন্দ বিচাৰি হাবাথুৰি খাই থকাৰ বিপৰীতে মৰক্কোৱে ধাৰাবাহিকভাৱে আক্ৰমণাত্মভাৱে খেলি আছিল।

ইয়াৰ সুফল তেওঁলোকে ২১ মিনিটত লাভ কৰে। ব্ৰাজিলৰ মিডফিল্ডাৰ লুকাছ পাকুৱেটাৰ  ভুলৰ সুযোগ লৈ মৰক্কোৱে এটা তীব্ৰ কাউণ্টাৰ আক্ৰমণ আৰম্ভ কৰে। ব্ৰাহিম ডিয়াজৰ সুন্দৰ থ্ৰু বলত ইছমাইল ছাইবাৰীয়ে গ’লকীপাৰ আলিসন বেকাৰৰ মূৰৰ ওপৰেৰে বলটো নেটত সুমুৱাই মৰক্কোক ১-০ ব্যৱধানত আগুৱাই লৈ যায়। গ’লটোৰ পিছতে ষ্টেডিয়ামত উপস্থিত মৰক্কোৰ সমৰ্থকসকলৰ উছাহ চৰম পৰ্যায়ত উপনীত হয়, আনহাতে ব্ৰাজিলৰ অনুৰাগীসকল আচৰিত হৈ পৰে।

অৱশ্যে মৰক্কোৰ এই অগ্ৰগতি বেছি সময় স্থায়ী নহ’ল। ৩২ মিনিটত ব্ৰাজিলৰ অন্যতম তাৰকা ভিনিচিয়াছ জুনিয়ৰে নিজৰ চমক দেখুৱায়। ব্ৰুনো গুইমাৰেছৰ সৈতে সুন্দৰ বুজাবুজিৰে ভিনিচিয়াছে বাওঁফালৰ পৰা আগবাঢ়ি যায়। তেওঁ ডিফাণ্ডাৰসকলক প্ৰতাৰিত কৰি সোঁ ভৰিৰে এনে এটা আকৰ্ষণীয় শ্বট মাৰে যে ইয়াক ৰোধ কৰাৰ চেষ্টাত ইয়াছিন বোনো সম্পূৰ্ণ অসহায় হৈ পৰে। বলটো পোনপটীয়াকৈ গ’লপোষ্টৰ চুকত সোমাই পৰে আৰু স্ক’ৰ ১-১ হয়। ভিনিচিয়াছৰ আন্তঃৰাষ্ট্ৰীয় কেৰিয়াৰৰ এয়া আছিল ১০ নম্বৰ গ’ল।

দ্বিতীয় অৰ্ধত দুয়োটা দলেই জয়ৰ বাবে চেষ্টা চলায়, কিন্তু মৰক্কোক অধিক বিপজ্জনক ৰূপত দেখা গৈছিল। ইঞ্জুৰী টাইমত আফ্ৰিকান দলটোৱে মেচ জিকাৰ সোণালী সুযোগ লাভ কৰিছিল। নীল এল আইনাউইৰ শ্বটটো আলিসনে সম্পূৰ্ণ নিয়ন্ত্ৰণ কৰিব পৰা নাছিল। ৰিবাউণ্ড বলত আয়ুব আমাইমৌনীৰ হাতত গ’ল কৰাৰ সুযোগ আছিল, কিন্তু ব্ৰাজিলৰ গ’লকীপাৰ গৰাকীয়ে মাটিত বাগৰি পৰি এক অবিশ্বাস্য ৰক্ষণাবেক্ষণ কৰি নিজৰ দলক পৰাজয়ৰ পৰা ৰক্ষা কৰে। এই ৰক্ষাই মেচখনৰ নিৰ্ণায়ক মুহূৰ্ত হিচাপে প্ৰমাণিত হয়।

ব্ৰাজিলে এই মেচখনত নিজৰ তাৰকা খেলুৱৈ নেইমাৰ জুনিয়ৰৰ অবিহনে খেলপথাৰত নামিছিল। ভৰিৰ পতাৰ আঘাতৰ পৰা সুস্থ হৈ উঠা নেইমাৰ দলৰ অংশ হ’ব নোৱাৰিলে। তেওঁৰ অনুপস্থিতিত ব্ৰাজিলৰ আক্ৰমণাত্মক বাহিনী কেইবাবাৰো ভাৰসাম্যহীন দেখা গৈছিল। প্ৰশিক্ষক কাৰ্লো আনচেলট্টিৰ নেতৃত্বত বিশ্বকাপ খেলি থকা ব্ৰাজিল দলটোক লৈ অনুৰাগীসকলৰ বহুত আশা আছে, কিন্তু প্ৰথমখন মেচে কেইবাটাও প্ৰশ্নৰ উত্থাপন কৰিছে।

যদিও ব্ৰাজিলে এই মেচত জয়লাভ কৰিব নোৱাৰিলে, তথাপিও দলটোৱে বিশ্বকাপৰ উদ্বোধনী মেচসমূহৰ এক বিশেষ অভিলেখ অক্ষুণ্ণ ৰাখিবলৈ সক্ষম হয়। ব্ৰাজিল এতিয়া ধাৰাবাহিকভাৱে ২১ খন বিশ্বকাপৰ উদ্বোধনী মেচত অপৰাজেয় হৈ আছে। ১৯৩৪ চনত স্পেইনৰ বিৰুদ্ধে খেলা উদ্বোধনী মেচত ব্ৰাজিলে শেষবাৰৰ বাবে পৰাজয়ৰ সোৱাদ পাইছিল। অৰ্থাৎ ৯২ বছৰতকৈও অধিক সময় ধৰি ব্ৰাজিলে নিজৰ বিশ্বকাপ অভিযান পৰাজয়েৰে আৰম্ভ কৰা নাই।

লগতে পঢ়ক: ৰোহিত শৰ্মাই ৰচিলে নতুন ইতিহাস; এদিনীয়া আন্তঃৰাষ্ট্ৰীয়ত জেক কেলিছৰ অভিলেখ ভংগ