সমীৰ ৰিজৱীৰ বেটিং ধুমুহাত নিস্তেজ মুম্বাই, ক্ৰমাগত দ্বিতীয়টো জয় দিল্লী কেপিটেলছৰ
দিল্লী কেপিটেলছে মুম্বাই ইণ্ডিয়ানছক ৬ উইকেটত পৰাস্ত কৰে
আই পি এল ২০২৬ৰ শনিবাৰে অনুষ্ঠিত হোৱা এখন মেচত দিল্লী কেপিটেলছে মুম্বাই ইণ্ডিয়ানছক ৬ উইকেটত পৰাস্ত কৰে । দিল্লীৰ অৰুণ জেটলী ষ্টেডিয়ামত অনুষ্ঠিত খেলখনত প্ৰথমে বেটিং কৰি মুম্বাইয়ে ১৬২ ৰান সংগ্ৰহ কৰে । ইয়াৰ প্ৰত্যুত্তৰত সমীৰ ৰিজৱীৰ ৯০ ৰানৰ সহায়ত ১৯ অভাৰত দিল্লীয়ে লক্ষ্যত উপনীত হয় । আই পি এল ২০২৬ত দিল্লীৰ এয়া একেৰাহে দ্বিতীয়টো জয় ।
সমীৰ ৰিজৱীৰ বেটিং ধুমুহা-
১৬৩ ৰানৰ লক্ষ্য অনুসৰণ কৰি আৰম্ভণিতে দিল্লী কেপিটেলছ শলঠেকত পৰে, কিয়নো অ’পেনাৰ কে এল ৰাহুল মাত্ৰ এটা ৰানতে পেভিলিয়নমুখী হোৱাৰ বিপৰীতে নীতিশ ৰাণাই নিজৰ একাউণ্ট খুলিবলৈয়ো সক্ষম নহ’ল ।
কিন্তু সমীৰ ৰিজৱীয়ে খেলপথাৰত নামিয়েই মুম্বাইৰ বলাৰৰ বিৰুদ্ধে তাণ্ডৱ আৰম্ভ কৰে । তেওঁ বিস্ফোৰক বেটিংঙৰ সহায়ত ৩১টা বলত অৰ্ধ শতক অৰ্জন কৰে । ইয়াৰ পিছতে ৰিজৱীৰ বেটে ধুমুহাৰ সৃষ্টি কৰে । তেওঁ ৭টা চাৰি আৰু ৭টা ছয়ৰ সহায়ত ৫১টা বলত ৯০ ৰান সংগ্ৰহ কৰে । চলিত আই পি এলত ৰিজভীয়ে মাত্ৰ ২খন মেচতে ১৬০ ৰান সংগ্ৰহ কৰিছে । ইয়াৰ পূৰ্বে লক্ষ্ণৌ ছুপাৰ জায়েন্টছৰ বিৰুদ্ধেও বিস্ফোৰক অৰ্ধশতক অৰ্জন কৰিছিল তেওঁ । ৰিজভীয়ে পাথুম নিছাংকাৰ সৈতে ৬৬ ৰানৰ অংশীদাৰিত্ব আৰু ডেভিদ মিলাৰৰ সৈতে ৭৮ ৰানৰ অংশীদাৰিত্ব গঢ়ে ।
ইফালে মুম্বাই ইণ্ডিয়ানছৰ নিয়মীয়া অধিনায়ক হাৰ্দিক পাণ্ডিয়াই অসুস্থতাৰ বাবে এই মেচত খেলা নাছিল । তেওঁৰ ঠাইত অধিনায়কৰ দায়িত্ব পালন কৰিছিল সূৰ্যকুমাৰ যাদৱে । তেওঁ ৫১ ৰানৰ ইনিংছ খেলে । ৰোহিত শৰ্মাইও ৩৫ ৰানৰ বৰঙণি আগবঢ়াইছিল যদিও সমীৰ ৰিজৱীৰ স্মৰণীয় ৯০ ৰানৰ ইনিংছত সকলো অথলে যায় ।
উল্লেখ্য যে, অক্ষৰ পেটেলৰ অধিনায়কত্বত দিল্লী কেপিটেলছে আই পি এল ২০২৬ৰ অভিযানত এক দৃষ্টিনন্দন আৰম্ভণি কৰিছে । প্ৰথমখন খেলত লক্ষ্ণৌ ছুপাৰ জায়েন্টছক ৬ উইকেটত পৰাস্ত কৰে দলটোৱে । এতিয়া মুম্বাই ইণ্ডিয়ানছক ৬ উইকেটত পৰাস্ত কৰি ছিজনৰ একেৰাহে দ্বিতীয়টো জয় পঞ্জীয়ন কৰিছে দিল্লীয়ে ।
লগতে পঢ়ক : আই পি এলক লৈ বিতৰ্ক; আদালতৰ দুৱাৰত টোকৰ তাৰকা খেলুৱৈৰ