৩ মহিলা ক্ৰিকেটাৰক ৰে’লৱেৰ বিশেষ উপহাৰ

আই চি চি মহিলা এদিনীয়া বিশ্বকাপ বিজয়ী ভাৰতীয় দলৰ অংশ হিচাপে থকা তিনিগৰাকী ক্ৰিকেটাৰ প্ৰতীকা ৰাৱাল, স্নেহ ৰানা আৰু ৰেনুকা সিং ঠাকুৰক ভাৰতীয় ৰে’লৱেই বিশেষ কৰ্তব্যৰত বিষয়া (অ’ এছ ডি-স্প’ৰ্টছ) হিচাপে নিযুক্তি দিছে । এই তিনিগৰাকী খেলুৱৈয়ে এতিয়া গ্ৰুপ বি গেজেটেড অফিচাৰৰ সমতুল্য দৰমহা আৰু সুবিধা লাভ কৰিব । ৰে’লৱে ক্ৰীড়া প্ৰচাৰ ব’ৰ্ডৰ এই পদক্ষেপে মহিলা ক্ৰিকেটাৰসকলক কেৱল আৰ্থিক সুৰক্ষা প্ৰদান কৰাই নহয় প্ৰশাসনিক দায়িত্বও অৰ্পণ কৰিব ।

উল্লেখ্য যে এইবাৰ ভাৰত আৰু শ্ৰীলংকাৰ যৌথ আয়োজনত মহিলা ক্ৰিকেট বিশ্বকাপৰ আয়োজন কৰা হৈছিল । ২০২৫ চনৰ ৩০ ছেপ্টেম্বৰৰ পৰা আৰম্ভ হোৱা এই অভিযানৰ চূড়ান্ত খেলখন ২ নৱেম্বৰত অনুষ্ঠিত হৈছিল । য’ত হৰমনপ্ৰীতৰ অধিনায়কত্বত ভাৰতীয় মহিলা দলে দক্ষিণ আফ্ৰিকাক পৰাস্ত কৰি ঐতিহাসিক বিজয় সাব্যস্ত কৰে । উল্লেখ্য যে, এই জয়েৰে প্ৰথমবাৰৰ বাবে ভাৰতীয় মহিলা ক্ৰিকেট দল বিশ্ব চেম্পিয়ন হয় ।

ভাৰতৰ ৩ গৰাকী খেলুৱৈক ৰে’লৱেই পদ প্ৰদান কৰিছে । বিশ্বকাপত তেওঁলোৰ প্ৰদৰ্শন উচ্চমানৰ তথা শক্তিশালী আছিল । অৱশ্যে ছেমি ফাইনেলৰ ঠিক পূর্বে প্রতীকা ৰাৱালে আঘাত পাইছিল, যাৰ বাবে তেওঁ প্রতিযোগিতাৰ পৰা আঁতৰি আছিল আৰু তেওঁৰ ঠাইত শ্বেফালী বাৰ্মাই সুযোগ লাভ কৰিছিল । কিন্তু গ্ৰুপ পৰ্যায়ৰ মেচত প্ৰতীকাই বহু স্মৰণীয় ইনিংছ খেলিছিল ।

একে সময়তে স্নেহ ৰানাক এই বিশ্বকাপত বলিং অলৰাউণ্ডাৰ হিচাপে অন্তৰ্ভুক্ত কৰা হৈছিল । তেওঁৰ প্ৰদৰ্শনো অতিশয় শক্তিশালী আছিল । কিন্তু ২৩ অক্টোবৰত নিউজীলেণ্ডৰ বিৰুদ্ধে খেলখনৰ পাছত তেওঁ কোনো সুযোগ পোৱা নাছিল ।

কিন্তু ৰেণুকা সিঙৰ কথা ক’বলৈ গ’লে ভাৰতীয় বলিঙৰ গৌৰৱ আছিল তেওঁ । সমগ্ৰ বিশ্বকাপত তেওঁ চমৎকাৰ বলিং কৰিছিল । আনকি ফাইনেলতো ৰেনুকা সিঙে ৮ অভাৰত মাত্ৰ ২৮ ৰান খৰচ কৰি দক্ষিণ আফ্ৰিকাৰ বেটছমেনক বান্ধি ৰাখিছিল ।

লগতে পঢ়ক : টেষ্ট ক্ৰিকেটলৈ ঘূৰি অহাৰ উৰাবাতৰিক লৈ মুখ খুলিলে বিৰাট কোহলীয়ে