মহাভাৰতৰ ‘কৰ্ণ’ খ্যাত পংকজ ধীৰ আৰু নাই

বি আৰ চোপ্ৰাৰ “মহাভাৰত”ত কৰ্ণৰ চৰিত্ৰক স্মৰণীয় কৰি তোলা প্ৰবীণ অভিনেতা পংকজ ধীৰৰ মৃত্যু হোৱা বুলি জানিব পৰা গৈছে । আজি শেষ নিশ্বাস ত্যাগ কৰে প্ৰবীণ অভিনেতাগৰাকীয়ে । তেওঁৰ মৃত্যুত চলচ্চিত্ৰ আৰু টেলিভিছন উদ্যোগ শোকৰ ছাঁ পৰা পৰিলক্ষিত হৈছে ।

মহাভাৰতত কৰ্ণৰ চৰিত্ৰত বলিষ্ঠ অভিনয়েৰে সকলোৰে হৃদয়ত স্থান লাভ কৰিছিল পংকজ ধীৰে । ৬৮ বছৰ বয়সত তেওঁ শেষ নিশ্বাস ত্যাগ কৰে । দীৰ্ঘদিন ধৰি কৰ্কট ৰোগৰ সৈতে যুঁজি থকা অভিনেতাজন কেইবাদিন ধৰি চিকিৎসালয়ত ভৰ্তি হৈ আছিল । অৱশেষত জীৱন যুদ্ধত পৰাস্ত হৈ বুধবাৰে ইহ সংসাৰ ত্যাগ কৰে প্ৰবীণ অভিনেতাগৰাকীয়ে ।

বলিষ্ঠ অভিনয় আৰু শক্তিশালী কণ্ঠৰ বাবে পংকজ ধীৰ পৰিচিত আছিল যদিও ১৯৮৮ চনৰ ঐতিহাসিক ধাৰাবাহিক “মহাভাৰত”ত কৰ্ণৰ চৰিত্ৰত কৰা অভিনয়ে তেওঁক অমৰ কৰি তুলিছিল । তেওঁৰ এই ভূমিকাই ইমানেই জনপ্ৰিয়তা লাভ কৰিছিল যে দেশৰ বহু ঠাইত তেওঁৰ প্ৰতিমূৰ্তি পূজা কৰা হৈছিল । ইয়াৰ উপৰিও তেওঁ “চড়ক”, “চোল্ডাৰ”, “বাদশ্বাহ”কে ধৰি কেইবাখনো ছুপাৰহিট ছবিত অভিনয় কৰিছিল আৰু টেলিভিছনতো সক্ৰিয় হৈ আছিল । তেওঁৰ পুত্ৰ নিকিতিন ধীৰো এজন সুপৰিচিত অভিনেতা ।

লগতে পঢ়ক : হৃদৰোগত আক্ৰান্ত হৈ বডি বিল্ডাৰ বৰিন্দৰ ঘুমনৰ মৃত্যু…