কেইটামান ঘন্টাৰ পাছতেই সময়ৰ সোঁতত বিলীন হ’ব অনেক ঘটনা-পৰিঘটনাৰ সাক্ষী হৈ ৰোৱা ২০২৪ বৰ্ষ । লগে লগে ২০২৫ চনে দুৱাৰত টোকৰ মাৰিবলৈ সাজু হৈছে । নতুন বছৰত বহু নতুন ঘটনা, অভিলেখ হ’বলৈ গৈ আছে যদিও ২০২৪ বৰ্ষটোৱে বহু গুৰুত্বপূৰ্ণ ঘটনাৰে ইতিহাস ৰচনা কৰিছে । এই বছৰ বহু ডাঙৰ ডাঙৰ ঘটনা সংঘটিত হৈছে, যিবোৰ ইতিহাসত স্মৰণীয় হৈ থাকিব । অযোধ্যাত ৰাম মন্দিৰৰ প্ৰাণ প্ৰতিষ্ঠাই হওক বা জম্মু-কাশ্মীৰৰ বিধানসভা নিৰ্বাচনৰ কথাই হওক বা ইছৰোৱে মহাকাশলৈ আন এক জাঁপ দিয়াৰ কথাই হওক । আজি আমি আপোনালোকক সোঁৱৰাই দিছো ২০২৪ চনৰ সেই মুহূৰ্তবোৰৰ কথা যিয়ে ইতিহাসৰ সৃষ্টি কৰিছিল ।
ৰাম লালাৰ প্ৰাণ প্ৰতিষ্ঠা-
২০২৪ বৰ্ষটো ৰাম নগৰী অযোধ্যাৰ বাবে সোণালী ইতিহাসৰ সাক্ষী হৈ পৰিল । ২০২৪ চনৰ ২২ জানুৱাৰীত ৫০০ বছৰীয়া দীৰ্ঘদিনীয়া সংগ্ৰামৰ অন্তত ভগৱান শ্ৰীৰামক তেওঁৰ ভব্য মন্দিৰত প্ৰতিষ্ঠা কৰা হয় । এই ঐতিহাসিক মুহূৰ্তটোৱে অযোধ্যাৰ পৰিৱেশ সলনি কৰি দিলে আৰু ৰাম নাগৰী গোটেই বছৰটো আনন্দত নিমগ্ন হৈ থাকিল । ২০২৪ বৰ্ষই অযোধ্যাক দিলে এক বিশ্বব্যাপী পৰিচয় ।
২০২৪ চনৰ পেৰিছ অলিম্পিকত নীৰজ চোপ্ৰাই লাভ কৰে ৰূপৰ পদক-
২০২৪ চনৰ পেৰিছ অলিম্পিকত জেভেলিন থ্ৰ’ত ৰূপৰ পদক লাভ কৰি এথলীট নীৰজ চোপ্ৰাই দেশলৈ গৌৰৱ কঢ়িয়াই আনে । ২০২৪ চনৰ পেৰিছ অলিম্পিকত ৮ আগষ্টত তেওঁ ৮৯.৪৫ মিটাৰ জেভেলিন থ্ৰ’ কৰি এই পদক লাভ কৰে । একেৰাহে দ্বিতীয়বাৰৰ বাবে অলিম্পিক গেমছত পদক লাভ কৰিবলৈ সক্ষম হৈছে নীৰজে । অলিম্পিকৰ ব্যক্তিগত ইভেণ্টত স্বৰ্ণ জয় কৰি আন এক পদক লাভ কৰা প্ৰথমগৰাকী ভাৰতীয় খেলুৱৈ হিচাপে পৰিগণিত হৈছে নীৰজ । এটা সোণ আৰু এটা ৰূপৰ পদক লাভ কৰা প্ৰথমগৰাকী ভাৰতীয় খেলুৱৈ নীৰজ ।
জম্মু-কাশ্মীৰত অনুষ্ঠিত বিধানসভা নিৰ্বাচন-
২০১৯ চনত ৩৭০ অনুচ্ছেদ বাতিল কৰি জম্মু-কাশ্মীৰৰ বিশেষ মৰ্যাদা বাতিল কৰা হয় । ইয়াৰ পিছত ৰাজ্যখনক দুটা কেন্দ্ৰীয় শাসিত অঞ্চলত বিভক্ত কৰা হয় । জম্মু-কাশ্মীৰ আৰু লাডাখ । জম্মু-কাশ্মীৰত ৩৭০ অনুচ্ছেদ বাতিল হোৱাৰ পিছত প্ৰথমবাৰৰ বাবে বিধানসভা নিৰ্বাচন অনুষ্ঠিত হয় ।
মুম্বাইত দেশৰ আটাইতকৈ দীঘল সাগৰীয় দলং ‘অটল সেতু’ উদ্বোধন-
২০২৪ বৰ্ষটো বিশেষ আছিল কাৰণ এইবাৰ প্ৰধানমন্ত্ৰী নৰেন্দ্ৰ মোদীয়ে ২০২৪ চনৰ ১২ জানুৱাৰীত মুম্বাইত দেশৰ আটাইতকৈ দীঘলীয়া সাগৰীয় দলং ‘অটল সেতু’ উদ্বোধন কৰে । এই দলংখন প্ৰায় ২১.৮ কিলোমিটাৰ দীঘল আৰু ৬ লেনযুক্ত । সমুদ্ৰৰ ওপৰত ১৬.৫ কিলোমিটাৰ দৈৰ্ঘ্য আৰু প্ৰায় ৫.৫ কিলোমিটাৰ স্থলভাগত নিৰ্মিত । এইখন দেশৰ আটাইতকৈ দীঘল দলং। এই দলংখনে মুম্বাইৰ পৰা পুনে, গোৱা আৰু দক্ষিণ ভাৰতলৈ যাতায়তৰ সময়ো হ্ৰাস কৰে । প্ৰায় ১৮ হাজাৰ কোটি টকা ব্যয় সাপেক্ষে নিৰ্মাণ কৰা হৈছে এই দলং ।
একেৰাহে তৃতীয়বাৰৰ বাবে প্ৰধানমন্ত্ৰী হয় নৰেন্দ্ৰ মোদী-
প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰতীয় জনতা পাৰ্টিয়ে পুনৰবাৰ ২০২৪ চনত চৰকাৰ গঠন কৰে । ৪ জুনত লোকসভা নিৰ্বাচনৰ ফলাফল ঘোষণা হোৱাৰ পিছতে একেৰাহে তৃতীয়বাৰৰ বাবে প্ৰধানমন্ত্ৰী হিচাপে শপত গ্ৰহণ কৰে নৰেন্দ্ৰ মোদীয়ে । ইয়াৰ লগে লগে তেওঁ একেৰাহে তিনিবাৰকৈ প্ৰধানমন্ত্ৰী হিচাপে শপত লোৱা দেশৰ দ্বিতীয়জন প্ৰধানমন্ত্ৰী হিচাপে পৰিগণিত হয় ।
বিৰোধী দলৰ নেতা নিৰ্বাচিত ৰাহুল-
ৰায়েবৰেলীৰ সাংসদ তথা কংগ্ৰেছ নেতা ৰাহুল গান্ধী প্ৰথমবাৰৰ বাবে লোকসভাত বিৰোধী দলৰ নেতা নিৰ্বাচিত হয় । প্ৰায় ১০ বছৰৰ পাছত লোকসভাত বিৰোধী দলৰ নেতা পোৱা গৈছে । যোৱা দুটা নিৰ্বাচনত কংগ্ৰেছৰ হাতত প্ৰয়োজনীয় ১০ শতাংশ আসনৰ অংশীদাৰিত্ব নাছিল, গতিকে বিৰোধী দলৰ নেতাৰ বাবে দলটোৱে দাবী উত্থাপন কৰিব পৰা নাছিল । বিগত ১০ বছৰ ধৰি বিৰোধী দলৰ নেতাৰ পদ খালী আছিল ।
ইছৰোৰ আশ্চৰ্যকৰ মহাকাশ অভিযান-
১. XPoSat (PSLV-C58) – January 1, 2024
২. INSAT-3DS (GSLV-F14) – February 17, 2024
৩. RLV LEX-03 – June 23, 2024
৪. EOS-08 (SSLV-D3) – August 16, 2024
৫. Proba-3 (PSLV-C59) – December 5, 2024
এইবোৰৰ বাহিৰেও ভাৰতীয় মহাকাশ গৱেষণা সংস্থাই ২০২৪ চনত বহুতো ভিন্ন অভিযান সম্পূৰ্ণ কৰিছে । বছৰৰ শেষৰ ফালে অৰ্থাৎ ৩০ ডিচেম্বৰত ইছৰোৱে স্পেডএক্স ডকিং এক্সপেৰিমেণ্ট আৰম্ভ কৰে
২০২৪ চনৰ পেৰিছ অলিম্পিকত মনু ভাকৰে ব্ৰঞ্জৰ পদক লাভ কৰে-
মনু ভাকৰে মহিলাৰ ১০ মিটাৰ এয়াৰ পিষ্টল ইভেণ্টত পেৰিছ অলিম্পিকত শ্বুটিঙত ব্ৰঞ্জৰ পদক লাভ কৰে । অলিম্পিকত শ্বুটিঙত পদক লাভ কৰা প্ৰথমগৰাকী ভাৰতীয় মহিলা হিচাপে পৰিগণিত হয় তেওঁ ।
ডি গুকেশে কৰিলে বিশ্ব জয়-
শেহতীয়াকৈ ভাৰতীয় গ্ৰেণ্ডমাষ্টাৰ ডি গুকেশে এনে এক কৃতিত্ব কৰিছিল যিটো আজিলৈকে কোনেও কৰিব পৰা নাই । ১৮ বছৰীয়া ডি গুকেশে বিশ্ব দবা চেম্পিয়নশ্বিপত জয়লাভ কৰি বিশ্বৰ আটাইতকৈ কম বয়সীয়া দবা চেম্পিয়ন হিচাপে পৰিগণিত হয় ।
