‘ভোটাৰ তালিকাত নিজৰ নাম ভালদৰে পৰীক্ষা কৰক’…

শুকুৰবাৰে বিহাৰৰ নিৰ্বাচন আয়োগে প্ৰকাশ কৰা ভোটাৰ তালিকাৰ খচৰাত তেওঁৰ নাম নাই বুলি শনিবাৰে দাবী কৰে আৰজেডি নেতা তেজস্বী প্ৰসাদ যাদৱে । পাটনাত সংবাদমেল সম্বোধন কৰি তেজস্বীয়ে কয়, “বিহাৰত ভোটাৰ তালিকাৰ বিশেষ পুনৰীক্ষণৰ সময়ত মই গণনা প্ৰ-পত্ৰ পূৰণ কৰিছিলোঁ । কিন্তু খচৰা ভোটাৰ তালিকাত মোৰ নাম নাই । আগন্তুক বিধানসভা নিৰ্বাচনত মই কেনেকৈ প্ৰতিদ্বন্দ্বিতা কৰিম ?” তেজস্বী যাদৱে দাবী কৰে যে, যেতিয়া তেওঁ নিৰ্বাচন আয়োগৰ পৰ্টেলত নিজৰ ECIP (Electors Photo Identity Card) নং RAB2916120 প্ৰৱেশ কৰি নাম বিচাৰিছিল তেতিয়া No Records Found দেখা গৈছিল ।

অৱশ্যে নিৰ্বাচন আয়োগে তেজস্বী যাদৱৰ এই দাবীৰ তথ্য পৰীক্ষা কৰি তেওঁৰ নাম খচৰা তালিকাত অন্তৰ্ভুক্ত হোৱা বুলি কয় । নিৰ্বাচন আয়োগে তালিকাৰ খচৰাও প্ৰকাশ কৰিছে, য’ত তেজস্বীৰ নাম, বয়স, পিতৃৰ নাম, ঘৰৰ নম্বৰৰ লগতে তেওঁৰ ফটোও সন্নিবিষ্ট কৰা হৈছে । আৰ জে ডি নেতাজনৰ অভিযোগ সন্দৰ্ভত নিৰ্বাচন আয়োগে ততাতৈয়াকৈ তথ্য শ্বেয়াৰ কৰি কয় যে, ‘তেজস্বী যাদৱে তেওঁৰ নাম ভোটাৰ তালিকাৰ পৰা আঁতৰাই দিয়াৰ অভিযোগ উত্থাপন কৰিছে । আমি তালিকাখন শ্বেয়াৰ কৰিছো আৰু তেওঁক অনুৰোধ কৰিছো যে তেওঁৰ নাম ভালদৰে পৰীক্ষা কৰক ।’ নিৰ্বাচন আয়োগে শ্বেয়াৰ কৰা তালিকাত তেজস্বী যাদৱৰ ই চি আই পি নং আছিল RAB0456228 । নিৰ্বাচন আয়োগে শ্বেয়াৰ কৰা খচৰা ভোটাৰ তালিকাত তেজস্বী যাদৱৰ নাম ক্ৰমিক নম্বৰ ৪১৬ত লিপিবদ্ধ কৰা হৈছে ।

নিৰ্বাচন আয়োগে তেজস্বী যাদৱৰ এই দাবীৰ তথ্য পৰীক্ষা কৰাৰ পিছত বিজেপি নেতা তথা বিহাৰৰ উপ-মুখ্যমন্ত্ৰী সম্ৰাট চৌধৰীয়ে তেওঁত তীক্ষ্ণ সমালোচনা কৰে । তেওঁ কয়, ‘তেজস্বী, আপোনাৰ সামৰ্থ্যক লৈ কেৱল মোৰেই নহয় আপোনাৰ পৰিয়াল আৰু সমগ্ৰ বিহাৰৰ সন্দেহ আছে । খচৰা ভোটাৰ তালিকাত আপোনাৰ নাম বিচাৰি উলিওৱাটো নিশ্চয় আপোনাৰ বাবে অতি কঠিন । পিতৃৰ নামৰ লগতে আপোনাৰ নামটোও সন্মানেৰে পঞ্জীয়ন কৰা হৈছে, চাব পাৰিব । বিভ্ৰান্তি আৰু প্ৰৱঞ্চনাৰ ব্যৱসায় বন্ধ কৰক । আৰ জে ডিৰ বিভ্ৰান্তি আৰু ভয় বাৰে বাৰে ভুৱা প্ৰমাণিত হৈছে ।’

লগতে পঢ়ক : ‘ভাৰতৰ জীয়ৰীৰ সেন্দুৰৰ প্ৰতিশোধ পূৰণ হ’ল: বাৰাণসীত পহলগাম কাণ্ডক লৈ প্ৰধানমন্ত্ৰীৰ ডাঙৰ মন্তব্য