মঙলবাৰে জম্মু-কাশ্মীৰৰ পহলগামত এক বৃহৎ সন্ত্ৰাসবাদী আক্ৰমণ সংঘটিত হয়, য’ত পৰ্যটকক লক্ষ্য কৰি লোৱা হয় । দুপৰীয়া এই সুন্দৰ উপত্যকা চাবলৈ অহা পৰ্যটকৰ ওপৰত হঠাৎ গুলীচালনা আৰম্ভ কৰে সন্ত্রাসবাদীয়ে । প্ৰত্যক্ষদৰ্শীৰ মতে চৌদিশে বিশৃংখলতাৰ সৃষ্টি হোৱাৰ লগতে বহু লোক গুলীৰ আঘাতত বাগৰি পৰে ।

এই পৰ্যন্ত লাভ কৰা তথ্য অনুসৰি এই আক্ৰমণত দুজন বিদেশীকে ধৰি দুইজনৰো অধিক লোকৰ মৃত্যুৰ আশংকা কৰা হৈছে । আনহাতে এই ঘটনাত কমেও ২০ জন লোক আহত হৈছে । এজন জ্যেষ্ঠ বিষয়াই মৃতকৰ সংখ্যা নিশ্চিত নকৰিলেও সংখ্যা আৰু বৃদ্ধি পাব পাৰে বুলি ইংগিত দিয়ে ।

ইফালে ৰাষ্ট্ৰপতি দ্ৰৌপদী মুৰ্মুৱে এক্সৰ এটা পোষ্টত জম্মু-কাশ্মীৰৰ পহলগামত পৰ্যটকৰ ওপৰত কৰা সন্ত্ৰাসবাদী আক্ৰমণ চাঞ্চল্যকৰ আৰু বেদনাদায়ক বুলি কয় । এইটো এটা নিষ্ঠুৰ আৰু অমানৱীয় কাৰ্য্য যিটোক স্পষ্টভাৱে নিন্দা কৰিব লাগে । নিৰীহ সাধাৰণ নাগৰিক আৰু পৰ্যটকক আক্ৰমণ কৰাটো অত্যন্ত ভয়ংকৰ আৰু অক্ষমনীয় । আপোনজনক হেৰুৱা পৰিয়াললৈ মোৰ আন্তৰিক সমবেদনা আৰু আহতসকলৰ আশু আৰোগ্যৰ বাবে প্ৰাৰ্থনা জনাইছো ।

এই ঘটনা সন্দৰ্ভত ৰে’ল মন্ত্ৰী অশ্বিনী বৈষ্ণৱে ‘এক্স’ত কয়- জম্মু-কাশ্মীৰৰ পহলগামত নিৰীহ পৰ্যটকৰ ওপৰত কাপুৰুষ সন্ত্ৰাসবাদী আক্ৰমণক তীব্ৰ গৰিহণা দিছো । নিহতৰ পৰিয়াললৈ মোৰ সমবেদনা জ্ঞাপন কৰাৰ লগতে আহতসকলৰ আশু আৰোগ্যৰ বাবে প্ৰাৰ্থনা জনাইছো ।

চাৰিদিনীয়া ভ্ৰমণসূচীৰে ভাৰতলৈ আহিছে আমেৰিকাৰ উপ-ৰাষ্ট্ৰপতি জে ডি ভেন্স । সোমবাৰে পুৱা ৯.৪৫ বজাত তেওঁৰ বিমান দিল্লীৰ পালাম বিমানবন্দৰত অৱতৰণ কৰে । বিমানবন্দৰত তেওঁক গাৰ্ড অৱ অনাৰ দিয়া হয় । তেওঁক আদৰণি জনাবলৈ বিমানবন্দৰত উপস্থিত হয় কেন্দ্ৰীয় মন্ত্ৰী অশ্বিনী বৈষ্ণৱ । ইয়াৰ পিছতে ভাৰত ভ্ৰমণৰ প্ৰথম দিনাই প্ৰধানমন্ত্ৰী নৰেন্দ্ৰ মোদীক সাক্ষাৎ কৰিবলৈ সন্ধিয়া প্ৰধানমন্ত্ৰী গৃহত উপস্থিত হয় ভেন্স । এই ভ্ৰমণক দুয়োখন দেশৰ মাজত সহযোগিতাৰ নতুন সুযোগ সৃষ্টি আৰু সম্পৰ্ক শক্তিশালী কৰাৰ দিশত গুৰুত্বপূৰ্ণ বুলি বিবেচিত হৈছে ।

প্ৰধানমন্ত্ৰী মোদী আৰু জে ডি ভেন্সৰ সাক্ষাৎ-

৭ লোক কল্যাণ মাৰ্গত প্ৰধানমন্ত্ৰীৰ বাসগৃহত প্ৰধানমন্ত্ৰী নৰেন্দ্ৰ মোদী আৰু জে ডি ভেন্সৰ মাজত এখন বৈঠক অনুষ্ঠিত হয় । ভেন্সৰ পত্নী আৰু সন্তানকো সাক্ষাৎ কৰে প্ৰধানমন্ত্ৰী মোদীয়ে । ভেন্স পৰিয়ালক উষ্ম আদৰণি জনোৱা হয় ।

জে ডি ভেন্সৰ এই ভাৰত ভ্ৰমণ অতি বিশেষ । তেওঁ পৰিয়ালসহ ভাৰতলৈ আহিছে । পত্নী উষা আৰু সন্তান ইভান, বিবেক আৰু মিৰাবেলো ভেন্সৰ সৈতে আছে । আমেৰিকাৰ উপ-ৰাষ্ট্ৰপতি হোৱাৰ পিছত প্ৰথমবাৰৰ বাবে ভাৰত ভ্ৰমণলৈ আহিছে জে ডি ভেন্স ।

সোমবাৰে পুৱা প্ৰায় ৯.৩০ বজাত দিল্লীত উপস্থিত হয় আমেৰিকাৰ উপ-ৰাষ্ট্ৰপতি জে ডি ভেন্স । বিমানবন্দৰত তেওঁক গাৰ্ড অৱ অনাৰ দিয়া হয় । তেওঁক আদৰণি জনায় কেন্দ্ৰীয় মন্ত্ৰী অশ্বিনী বৈষ্ণৱে । সেই সময়ত ভেন্সৰ তিনিটা সন্তান ইভান, বিবেক আৰু মিৰাবেলক ভাৰতীয় পৰম্পৰাগত সাজ-পোছাক পৰিধান কৰা দেখা গৈছিল । ইয়াৰ পিছত তেওঁ পৰিয়ালৰ সৈতে অক্ষৰধাম মন্দিৰ পৰিদৰ্শন কৰে । চাৰিদিনীয়া ভাৰত ভ্ৰমণলৈ অহা ভেন্সে তেওঁৰ পৰিয়ালৰ সৈতে সোমবাৰে নিশা প্ৰায় ৯ বজাত জয়পুৰত উপস্থিত হ’ব । ভাৰত ভ্ৰমণৰ বেছিভাগ সময় তেওঁ ৰাজস্থানত কটাব আৰু চমু আগ্ৰা ভ্ৰমণ কৰিব ।

জয়পুৰত ভেন্স পৰিয়াল ৰামবাগ পেলেচত থাকিব, য’ত তেওঁলোক নিশা ১০ বজাত উপস্থিত হোৱাৰ সম্ভাৱনা আছে । এই হাই-প্ৰফাইল ভ্ৰমণৰ পৰিপ্ৰেক্ষিতত মহানগৰীত কটকটীয়া নিৰাপত্তাৰ ব্যৱস্থা কৰা হৈছে । মহানগৰীৰ গুৰুত্বপূৰ্ণ স্থানত দুহেজাৰৰো অধিক আৰক্ষী মোতায়েন কৰা হৈছে ।

মঙলবাৰে পুৱাৰে পৰা আৰম্ভ হ’ব উপ-ৰাষ্ট্ৰপতিৰ আনুষ্ঠানিক কাৰ্যসূচী । তেওঁ মুখ্যমন্ত্ৰী শৰ্মা আৰু উপ-মুখ্যমন্ত্ৰী দিয়া কুমাৰীৰ সৈতে পুৱা ৯ বজাত আমেৰলৈ যাব । দুপৰীয়াৰ আহাৰ গ্ৰহণ কৰি হোটেললৈ উভতি অহাৰ পূৰ্বে আমেৰ দুৰ্গ, পান্না মীনা কা কুণ্ড আৰু অনোখী মিউজিয়াম পৰিদৰ্শন কৰিব ভেন্সে ।

মঙলবাৰে বিয়লি ২.৪৫ বজাত ৰাজস্থান আন্তঃৰাষ্ট্ৰীয় কেন্দ্ৰত ভাৰত-আমেৰিকাৰ বাণিজ্যিক সম্পৰ্কৰ ওপৰত ভাষণ প্ৰদান কৰিব ভেন্সে । বিয়লি ৪ বজাত তেওঁ হোটেললৈ উভতি আহিব, য’ত ভি আই পি, গণ্যমান্য ব্যক্তিৰ সৈতে বৈঠক হোৱাৰ সম্ভাৱনা আছে । বুধবাৰে পুৱা ৯ বজাত তেওঁ জয়পুৰৰ পৰা বিশেষ বিমানেৰে আগ্ৰালৈ ৰাওনা হ’ব ।

তাজমহল পৰিদৰ্শন কৰাৰ পিছত দিনৰ ১.২৫ বজাত জয়পুৰলৈ উভতি আহিব । বিষয়াসকলে জনোৱা মতে, বিয়লি ২ বজাত চিটি পেলেচ ভ্ৰমণৰ কথা আছে, য’ত উপ-মুখ্যমন্ত্ৰী দিয়া কুমাৰীয়ে তেওঁক আদৰণি জনাই দুপৰীয়াৰ আহাৰ গ্ৰহণ কৰিব । উপ-ৰাষ্ট্ৰপতি ভেন্স আৰু তেওঁৰ পৰিয়ালে ভ্ৰমণৰ সামৰণি মাৰি বৃহস্পতিবাৰে পুৱা ৬.৩০ বজাত বিশেষ বিমানেৰে ৱাশ্বিংটন ডি চিলৈ যাত্ৰা কৰিব ।