সন্ত্ৰাসবাদৰ বিৰুদ্ধে যুঁজত ভাৰতক সমৰ্থন

গোয়ানাৰ উপ-ৰাষ্ট্ৰপতি ভৰত জগদেৱ আৰু প্ৰধানমন্ত্ৰী মাৰ্ক ফিলিপছে সন্ত্ৰাসবাদৰ বিৰুদ্ধে যুঁজত ভাৰতক সমৰ্থন প্ৰকাশ কৰে । গোয়ানা ভ্ৰমণ কৰা কংগ্ৰেছৰ সাংসদ শশী থাৰুৰৰ নেতৃত্বত থকা সৰ্বদলীয় প্ৰতিনিধি দলটোক সাক্ষাৎ কৰি দুয়োগৰাকী নেতাই ভাৰতক সমৰ্থন কৰে । উল্লেখ্য যে, শশী থাৰুৰৰ নেতৃত্বত থকা এই দলটোত আছে অসমৰ সাংসদ ভুৱনেশ্বৰ কলিতা ।

সন্ত্ৰাসবাদৰ বিৰুদ্ধে অটল সমৰ্থনৰ আশ্বাস গোয়ানাৰ-

দেওবাৰে পুৱা ভাৰতীয় প্ৰতিনিধি দলটোৱে গোয়ানাৰ ৰাজধানী জৰ্জটাউনত উপস্থিত হয় । বৈঠকৰ অন্তত জৰ্জটাউনত থকা ভাৰতীয় উচ্চায়ুক্তই ছ’চিয়েল মিডিয়াত শ্বেয়াৰ কৰা এটা পোষ্টত লিখিছে যে ‘প্ৰতিনিধি দলটোৱে গোয়ানাৰ উপ-ৰাষ্ট্ৰপতি ড০ ভৰত জগদেৱক সাক্ষাৎ কৰে । সন্ত্ৰাসবাদৰ প্ৰতি ভাৰতৰ শূন্য সহনশীলতা নীতিৰ আলোকপাত কৰি পহলগাম সন্ত্ৰাসবাদী আক্ৰমণ, অপাৰেচন সিন্দুৰ আৰু সিন্ধু জল সন্ধিৰ সন্দৰ্ভত ভাৰতৰ স্থিতি বিশদভাৱে প্ৰকাশ কৰে প্ৰতিনিধি দলটোৱে । টুইটটোত কোৱা হৈছে, ‘উপ-ৰাষ্ট্ৰপতিগৰাকীয়ে ভাৰতৰ সন্ত্ৰাসবাদৰ বিৰুদ্ধে যুঁজত গোয়ানাৰ অদম্য সমৰ্থন পুনৰবাৰ উল্লেখ কৰে ।’

ভাৰতৰ পৰা যোৱা সৰ্বদলীয় প্ৰতিনিধি দলটোক সাক্ষাৎ কৰাৰ পিছত গোয়ানাৰ প্ৰধানমন্ত্ৰী ব্ৰিগেডিয়াৰ মাৰ্ক এন্থনী ফিলিপছে কয়, ‘গোয়ানাই যিকোনো সন্ত্ৰাসবাদৰ কাৰ্যক গৰিহণা দিয়ে । আমি বিশ্বাস কৰোঁ যে প্ৰতিখন ৰাষ্ট্ৰ আৰু জনসাধাৰণৰ নিজৰ নিজৰ দেশত শান্তিৰে জীয়াই থকাৰ অধিকাৰ আছে । আমি আইনৰ শাসন মানি চলাত বিশ্বাস কৰোঁ ।‘ লগতে তেওঁ এই ক্ষেত্ৰত ভাৰতক সমৰ্থন প্ৰকাশ কৰে ।

বিনিয়োগৰ বিষয়েও আলোচনা-

ভাৰতীয় প্ৰতিনিধি দলটোক নেতৃত্ব দিয়া শশী থাৰুৰে ছ’চিয়েল মিডিয়াত এটা পোষ্ট শ্বেয়াৰ কৰে, য’ত তেওঁ গোয়ানাৰ শীৰ্ষ নেতৃত্বৰ সৈতে হোৱা বৈঠকক উৎকৃষ্ট বুলি অভিহিত কৰে । তেওঁ কয়, ‘শেহতীয়া পৰিস্থিতি সন্দৰ্ভত ভাৰতৰ উদ্বেগৰ প্ৰতি গভীৰ সহানুভূতি আৰু বুজাবুজিৰ উপৰিও আমাৰ তেল আৰু গেছ অন্বেষণৰ বিষয়টোও আলোচনা কৰা হৈছিল । গোয়ানাৰ অভিলেখ ভংগকাৰী বিকাশৰ হাৰৰ বিষয়েও আলোচনা কৰা হয় । কৃষিৰ পৰা আৰম্ভ কৰি টেলিকম, বেংকিং আৰু ঘাইপথ উন্নয়নলৈকে বিভিন্ন খণ্ডত ভাৰতীয় কোম্পানীসমূহৰ বাবে সুযোগৰ বিষয়েও আলোচনা কৰা হয় । গোয়ানাত শ্ৰমিকৰ অভাৱ, সেয়েহে গোয়ানাতো ভাৰতীয় শ্ৰমিকৰ বাবে সুযোগ আছে ।‘

ইফালে গোয়ানাৰ ৫৯ সংখ্যক স্বাধীনতা দিৱসৰ প্ৰাকক্ষণত প্ৰধানমন্ত্ৰী ফিলিপছে ভাৰতীয় প্ৰতিনিধি দলটোক সন্মান জনাই এক ভোজৰ আয়োজন কৰে । ভাৰতীয় প্ৰতিনিধি দলটোৱে গোয়ানাৰ স্বাধীনতা দিৱস উদযাপনতো অংশগ্ৰহণ কৰে ।

লগতে পঢ়ক : ‘পাকিস্তানে ডাঙৰ মূল্য দিব লাগিব’; কংগ্ৰেছৰ সাংসদ শশী থাৰুৰৰ ধমক

অপাৰেচন সিন্দুৰ:

অপাৰেচন সিন্দুৰ, এই অভিযানৰ জৰিয়তে ভাৰত চৰকাৰে সন্ত্ৰাসবাদৰ বিৰুদ্ধে দেশৰ চলি থকা কঠোৰ নীতি আৰু সামৰিক পদক্ষেপক ফলপ্ৰসূভাৱে বিশ্বৰ আগত উপস্থাপন কৰাৰ উদ্যোগ লৈছে । ইয়াৰ বাবে সাতটা প্ৰতিনিধি দলৰ ভিতৰত দুজন সৰ্বদলীয় সাংসদৰ এটা প্ৰতিনিধি দল বৰ্তমান বিভিন্ন দেশ ভ্ৰমণত আছে । এটা প্ৰতিনিধি দল সংযুক্ত আৰব আমিৰশ্বাহী (ইউ এ ই)ৰ আবুধাবিত উপস্থিত হোৱাৰ বিপৰীতে আনটো প্ৰতিনিধি দল জাপানৰ ৰাজধানী টকিঅ’ত উপস্থিত হৈছে ।

উল্লেখ্য যে শিৱসেনাৰ সাংসদ শ্ৰীকান্ত শিন্দেৰ নেতৃত্বত এটা দল সংযুক্ত আৰব আমিৰশ্বাহী (ইউ এ ই)ৰ আবুধাবিত উপস্থিত হৈছে, তাৰ পিছত দলটোৱে ইউ এ ই, লাইবেৰিয়া, কংগো আৰু ছিয়েৰা লিয়ন ভ্ৰমণ কৰিব । আনহাতে, জে ডি ইউৰ সাংসদ সঞ্জয় ঝাৰ নেতৃত্বত গঠিত প্ৰতিনিধি দলটোৱে জাপানৰ ৰাজধানী টকিঅ’ত উপস্থিত হৈছে । জাপানৰ পিছত দলটোৱে ইণ্ডোনেছিয়া, মালয়েছিয়া, কোৰিয়া ৰিপাব্লিক আৰু ছিংগাপুৰ ভ্ৰমণ কৰিব ।

শিৱসেনাৰ সাংসদ শ্ৰীকান্ত শিন্দেৰ নেতৃত্বৰ দলটোত আছে বিজেপিৰ সাংসদ বনছুৰী স্বৰাজ, আই ইউ এম এলৰ সাংসদ ই টি মহম্মদ বছিৰ, বিজেপিৰ সাংসদ অতুল গাৰ্গ, বি জে ডি সাংসদ শস্মিত পাত্ৰ, বিজেপি ৰাজ্যসভাৰ সাংসদ তথা জ্যেষ্ঠ অধিবক্তা মনন কুমাৰ মিশ্ৰ, বিজেপি নেতা এছ এছ আহলুৱালীয়া আৰু ৰাষ্ট্ৰদূত সুজান চিনয় আদি ।

আনহাতে, ভাৰতৰ সন্ত্ৰাসবাদ বিৰোধী অভিযান অপাৰেচন সিন্দুৰক বিশ্বৰ সন্মুখত শক্তিশালীভাৱে উপস্থাপন কৰাৰ উদ্দেশ্যেৰে জে ডি ইউৰ সাংসদ সঞ্জয় ঝাৰ নেতৃত্বত এটা প্ৰতিনিধি দলে জাপানৰ ৰাজধানী টকিঅ’ত উপস্থিত হয় । জাপানৰ উপৰিও দলটোৱে ইণ্ডোনেছিয়া, মালয়েছিয়া, কোৰিয়া ৰিপাব্লিক আৰু ছিংগাপুৰ ভ্ৰমণ কৰিব ।

সঞ্জয় ঝাৰ প্ৰতিনিধি দলত বিজেপিৰ সাংসদ প্ৰদান বৰুৱা, ব্রিজ লাল, ড০ হেমাং যোশী আৰু অপৰাজিতা সাৰংগী, তৃণমূল কংগ্ৰেছৰ সাংসদ অভিষেক বেনাৰ্জী, চি পি আই (এম)ৰ সাংসদ জন ব্রিটাছ ​​আৰু প্রাক্তন ৰাষ্ট্ৰদূত মোহন কুমাৰকে ধৰি বিভিন্ন ৰাজনৈতিক দলৰ সাংসদ আছে ৷

লগতে পঢ়ক : ‘সন্ত্ৰাসবাদীক জন্ম দিয়া দেশৰ অভিনয়…’; WHOত পাকিস্তানক ধমক ভাৰতৰ