উভয় সদনৰ যৌথ অধিৱেশনত ভাষণ প্ৰদান কৰে ৰাষ্ট্ৰপতি দ্ৰৌপদী মুৰ্মুৱে । বাজেট অধিৱেশনৰ ৰাষ্ট্ৰপতিৰ ভাষণত চৰকাৰৰ অগ্ৰাধিকাৰ, অৰ্থনৈতিক দিশ, ভৱিষ্যতৰ নীতি প্ৰতিফলিত হয় ।

বুধবাৰৰ পৰা আৰম্ভ হ’ল সংসদৰ বাজেট অধিৱেশন । উভয় সদনৰ যৌথ অধিৱেশনত ভাষণ প্ৰদান কৰে ৰাষ্ট্ৰপতি দ্ৰৌপদী মুৰ্মুৱে । উপস্থিত হোৱাৰ পিছতে ৰাষ্ট্ৰপতিক গাৰ্ড অৱ অনাৰ প্ৰদান কৰা হয় । তেওঁক আদৰণি জনায় উপ-ৰাষ্ট্ৰপতি চি.পি. ৰাধাকৃষ্ণন, প্ৰধানমন্ত্ৰী নৰেন্দ্ৰ মোদী, লোকসভাৰ অধ্যক্ষ ওম বিৰলা আৰু সংসদীয় পৰিক্ৰমা মন্ত্ৰী কিৰেন ৰিজিজুৱে ।

ভাষণত ৰাষ্ট্ৰপতি মুৰ্মুৱে ৰাষ্ট্ৰৰ ঐতিহ্য, ইতিহাস আৰু সাংস্কৃতিক ঐক্যৰ কথা স্মৰণ কৰে । তেখেতে উল্লেখ কৰে যে দেশত শ্ৰী গুৰু টেগ বাহাদুৰ জীৰ ৩৫০ সংখ্যক শ্বহীদ বাৰ্ষিকী উদযাপন কৰা হয় । বীৰছা মুণ্ডাৰ ১৫০ সংখ্যক জন্ম জয়ন্তীত সমগ্ৰ ৰাষ্ট্ৰই তেওঁক শ্ৰদ্ধাঞ্জলি জনোৱাৰ লগতে জনজাতীয় সমাজলৈ তেওঁৰ অৱদানৰ কথা স্মৰণ কৰে ।

ৰাষ্ট্ৰপতিগৰাকীয়ে উল্লেখ কৰে যে চৰ্দাৰ পেটেলৰ ১৫০ সংখ্যক জন্ম জয়ন্তীৰ সৈতে জড়িত অনুষ্ঠানসমূহে “এক ভাৰত, মহা ভাৰত”ৰ মনোভাৱক আৰু অধিক শক্তিশালী কৰি তুলিছে । তেওঁ লগতে কয় যে ভাৰত ৰত্ন ড০ ভূপেন হাজৰিকাৰ জন্ম বাৰ্ষিকী উদযাপনে ৰাষ্ট্ৰক সংগীত আৰু ঐক্যৰে একত্ৰিত কৰিছিল ।

ৰাষ্ট্ৰপতি মুৰ্মুৱে কয় যে যেতিয়া ৰাষ্ট্ৰই নিজৰ পূৰ্বপুৰুষৰ অৱদানৰ কথা মনত পেলায় তেতিয়া ই নতুন প্ৰজন্মক অনুপ্ৰাণিত কৰে । এই প্ৰেৰণাই উন্নত ভাৰতৰ দিশত আমাৰ যাত্ৰাক আৰু অধিক ত্বৰান্বিত কৰে ।

ভাষণত ৰাষ্ট্ৰপতিয়ে সংসদৰ এই অধিৱেশনত ভাষণ প্ৰদান কৰি আনন্দ প্ৰকাশ কৰে । তেওঁ উল্লেখ কৰে যে বিগত বছৰটো ভাৰতৰ দ্ৰুত অগ্ৰগতি আৰু চহকী ঐতিহ্যক উদযাপন কৰাৰ স্মৰণীয় বছৰ আছিল ।

ৰাষ্ট্ৰপতিগৰাকীয়ে উল্লেখ কৰে যে সমগ্ৰ দেশতে “বন্দে মাতৰম”ৰ ১৫০ বছৰীয়া জয়ন্তী উদযাপন কৰা হৈছে । তেওঁ কয় যে এই মহান কামৰ বাবে দেশবাসীয়ে বাংকিম চন্দ্ৰ চেটাৰ্জীক শ্ৰদ্ধাঞ্জলি জনাইছে । দেশৰ সাংস্কৃতিক চেতনাক আৰু অধিক শক্তিশালী কৰি তোলা সংসদত বন্দে মাতৰমৰ ওপৰত বিশেষ আলোচনাৰ বাবে তেওঁ সকলো সংসদ সদস্যক অভিনন্দন জ্ঞাপন কৰে ।

ইয়াৰ পূৰ্বে প্ৰধানমন্ত্ৰী নৰেন্দ্ৰ মোদী সংসদত উপস্থিত হয় । বাজেট অধিবেশনৰ সময়ত ৰাষ্ট্ৰপতিৰ ভাষণত চৰকাৰৰ অগ্ৰাধিকাৰ, অৰ্থনৈতিক দিশ, ভৱিষ্যতৰ নীতি প্ৰতিফলিত হয় ।

এই অধিবেশন দুটা পৰ্যায়ত অনুষ্ঠিত হ’ব । ২ এপ্ৰিললৈকে চলিব লগা এই অধিৱেশনত মুঠ ৩০খন বৈঠক অনুষ্ঠিত হ’ব । বিত্তমন্ত্ৰী নিৰ্মলা সীতাৰমণে ১ ফেব্ৰুৱাৰীত ২০২৬-২৭ বিত্তীয় বৰ্ষৰ কেন্দ্ৰীয় বাজেট দাখিল কৰিব । প্ৰথম পৰ্যায়ৰ অধিবেশন ২৮ জানুৱাৰীৰ পৰা ১৩ ফেব্ৰুৱাৰীলৈ চলিব আৰু দ্বিতীয় পৰ্যায়ৰ অধিবেশন ৯ মাৰ্চৰ পৰা আৰম্ভ হ’ব আৰু ২ এপ্ৰিলত সমাপ্ত হ’ব ।

লগতে পঢ়ক : আজিৰে পৰা সংসদৰ বাজেট অধিৱেশন : ৰাষ্ট্ৰপতিৰ ভাষণেৰে হ’ব আৰম্ভণি, দেওবাৰে কেন্দ্ৰীয় বাজেট

ৰাষ্ট্ৰপতি দ্ৰৌপদী মুৰ্মুৰ ভাষণেৰে আজিৰে পৰা আৰম্ভ হ’ব সংসদৰ বাজেট অধিৱেশন । ১ ফেব্ৰুৱাৰীত বিত্তমন্ত্ৰী নিৰ্মলা সীতাৰমণে একেৰাহে নৱমবাৰৰ বাবে কেন্দ্ৰীয় বাজেট দাখিল কৰিব ।

উভয় সদনৰ যৌথ বৈঠকত ৰাষ্ট্ৰপতি দ্ৰৌপদী মুৰ্মুৰ ভাষণেৰে আজিৰে পৰা আৰম্ভ হ’ব সংসদৰ বাজেট অধিৱেশন । দেশৰ সংসদয়ী ইতিহাসত প্ৰথমবাৰৰ বাবে এইবাৰ দেওবাৰে সাধাৰণ বাজেট দাখিল হ’ব । ১ ফেব্ৰুৱাৰী (দেওবাৰ)ত বিত্তমন্ত্ৰী নিৰ্মলা সীতাৰমণে একেৰাহে নৱমবাৰৰ বাবে কেন্দ্ৰীয় বাজেট দাখিল কৰিব ।

ৰাষ্ট্ৰপতিৰ ভাষণৰ পিছতে বৃহস্পতিবাৰে সংসদত দাখিল কৰা হ’ব অৰ্থনৈতিক জৰীপ । এইবাৰ সাধাৰণ বাজেটৰ তিনিদিন পূৰ্বে এই অৰ্থনৈতিক জৰীপ দাখিল কৰা হ’ব । ভাষণত ৰাষ্ট্ৰপতিগৰাকীয়ে চৰকাৰৰ সাফল্যৰ লগতে ভৱিষ্যতৰ নীতি আৰু অগ্ৰাধিকাৰৰ বাবে ৰোডমেপ দাঙি ধৰিব ।

হালোৱা চেৰেমনিৰে হ’ল অন্তিম পৰ্যায়ৰ আৰম্ভণি-

বাজেটৰ পূৰ্বে নৰ্থ ব্লকত বিত্তমন্ত্ৰী নিৰ্মলা সীতাৰমণে অংশগ্ৰহণ কৰে পৰম্পৰাগত হালোৱা চেৰেমনিত । এই অনুষ্ঠানৰ জৰিয়তে বাজেটৰ নথি-পত্ৰ দাখিল কৰাৰ গোপনীয় প্ৰক্ৰিয়াৰ আনুষ্ঠানিক আৰম্ভণি হয় ।

দুটা পৰ্যায়ত অনুষ্ঠিত হ’ব বাজেট অধিবেশন-

বাজেট অধিবেশন দুটা ভাগত বিভক্ত কৰা হৈছে । আজিৰে পৰা আৰম্ভ হোৱা প্ৰথম পৰ্য্যায় ১৩ ফেব্ৰুৱাৰীলৈ চলিব । ইয়াৰ পিছত অধিৱেশন স্থগিত ৰখা হ’ব আৰু দ্বিতীয় পৰ্যায় ৯ মাৰ্চৰ পৰা আৰম্ভ হ’ব আৰু ২ এপ্ৰিললৈকে চলিব বুলি আশা কৰা হৈছে । এই সময়ছোৱাত সংসদীয় সমিতিসমূহে বাজেট প্ৰস্তাৱসমূহ পুংখানুপুংখভাৱে পৰ্যালোচনা কৰিব ।

১ ফেব্ৰুৱাৰী দেওবাৰে সৃষ্টি হ’ব ইতিহাস-

এইবাৰ ১ ফেব্ৰুৱাৰীত, দেওবাৰে দাখিল কৰা হ’ব কেন্দ্ৰীয় বাজেট । সংসদীয় ইতিহাসত এয়া এক বিৰল অনুষ্ঠান । চৰকাৰে আনুষ্ঠানিকভাৱে এই দিনটোক “বাজেট দিৱস” হিচাপে ঘোষণা কৰিছে । এইখন নিৰ্মলা সীতাৰমণৰ একেৰাহে নৱমখন বাজেট হ’ব আৰু তেওঁ বৃহৎ অৰ্থনৈতিক সিদ্ধান্ত দাখিল কৰিব বুলি আশা কৰা হৈছে ।

লগতে পঢ়ক : পৰম্পৰাগত ‘হালোৱা চেৰিমনি’ৰে আৰম্ভ হ’ল বাজেট-২০২৬ৰ কাউন্ট-ডাউন

বাজেট অধিৱেশন আৰম্ভ হোৱাৰ এদিন পূৰ্বে মঙলবাৰে এখন সৰ্বদলীয় বৈঠক অনুষ্ঠিত হয় । ৰাজনাথ সিঙৰ অধ্যক্ষতাত অনুষ্ঠিত হয় এই বৈঠক ।

সংসদৰ বাজেট অধিৱেশন আৰম্ভ হোৱাৰ এদিন পূৰ্বে মঙলবাৰে এখন সৰ্বদলীয় বৈঠক অনুষ্ঠিত হয়, য’ত দুয়োখন সদনৰ বিধায়িনী কাৰ্য আৰু অন্যান্য বিভিন্ন বিষয়ৰ ওপৰত আলোচনা কৰা হয় । কেন্দ্ৰীয় মন্ত্ৰী কিৰেন ৰিজিজুৱে কয় যে ৰাজনাথ সিঙৰ অধ্যক্ষতাত অনুষ্ঠিত হয় এই বৈঠক । তেওঁ কয়- “আমি সকলোৰে পৰামৰ্শ নোট কৰিলোঁ । এয়া বছৰৰ প্ৰথম বাজেট অধিবেশন, যি কাইলৈৰ পৰা আৰম্ভ হ’ব ।”

কাইলৈ ​​ৰাষ্ট্ৰপতিয়ে ভাষণ প্ৰদান কৰিব আৰু পিছদিনা অৰ্থনৈতিক জৰীপ দাখিল কৰা হ’ব । ১ ফেব্ৰুৱাৰীত দাখিল কৰা হ’ব বাজেট । পৰৱৰ্তী সময়ত ৰাষ্ট্ৰপতিৰ ভাষণৰ ওপৰত ধন্যবাদসূচক প্ৰস্তাৱৰ ওপৰত আলোচনা কৰা হ’ব । ৰিজিজুৱে কয় যে আমি সকলো পক্ষকে আলোচনাত অংশগ্ৰহণ কৰিবলৈ আৰু সংসদৰ কাম-কাজ সুচাৰুৰূপে সুনিশ্চিত কৰিবলৈ আহ্বান জনাইছো ।

ৰিজিজুৱে কয় যে, আজিৰ এই বৈঠকত ৩৯টা দলৰ ৫১ গৰাকী নেতাই অংশগ্ৰহণ কৰে । তেওঁ কয়- আমি সকলোকে আহ্বান জনাইছো যে ভাৰত বিশ্বৰ সৰ্ববৃহৎ গণতন্ত্ৰ । সংসদীয় গণতন্ত্ৰ বজাই ৰাখিব লাগিব আৰু যি উদ্দেশ্যৰ বাবে জনসাধাৰণে আমাক নিৰ্বাচিত কৰিছে, সেই উদ্দেশ্য পূৰণ কৰিব লাগিব । নিয়ম অনুসৰি আলোচনা চলাব লাগে বুলি তেওঁ আহ্বান জনায় । তেওঁ কয় যে, আপোনাৰ কথা কোৱাৰ স্বাধীনতা আছে, কিন্তু আনৰো সদনত নিজৰ মতামত প্ৰকাশ কৰাৰ অধিকাৰ আছে ।”

কি কি বিষয় উত্থাপন কৰিব বিৰোধীয়ে ?

বুধবাৰৰ পৰা আৰম্ভ হ’বলগীয়া সংসদৰ বাজেট অধিৱেশন সন্দৰ্ভত কংগ্ৰেছৰ লগতে আন একাংশ বিৰোধী দলে কয় যে, বুধবাৰৰ পৰা আৰম্ভ হ’বলগীয়া সংসদৰ বাজেট অধিবেশনত এমএনৰেগা, মোদী চৰকাৰৰ বৈদেশিক নীতি, আমেৰিকাৰ শুল্ক, ডলাৰৰ বিপৰীতে টকাৰ মূল্য হ্ৰাস, বায়ু প্ৰদূষণ আৰু জনস্বাৰ্থ সম্পৰ্কীয় কেইবাটাও বিষয় উত্থাপন কৰা হ’ব । ৰাজ্যসভাৰ কংগ্ৰেছৰ উপ-দলপতি প্ৰমোদ তিৱাৰীয়ে চৰকাৰে সাংবিধানিক অধিকাৰ বাতিল কৰাৰ লগতে সাংবিধানিক প্ৰতিষ্ঠানসমূহ দুৰ্বল কৰাৰ অভিযোগ উত্থাপন কৰে ।

লগতে পঢ়ক : ‘মাদাৰ অব্ অল ডীলছ…’, ইতিহাস সৃষ্টিৰে ভাৰত আৰু ইউৰোপীয় সংঘৰ মাজত সম্পন্ন বৃহৎ চুক্তি