মুম্বাইৰ আদালতে চেক বাউন্সিং গোচৰত বলীউডৰ চলচ্চিত্ৰ পৰিচালক ৰাম গোপাল বাৰ্মাক তিনি মাহৰ কাৰাদণ্ড প্ৰদান কৰিছে । তেওঁৰ নতুন প্ৰজেক্ট “চিণ্ডিকেট” ঘোষণাৰ এদিন পূৰ্বে এই বাতৰি প্ৰকাশ পাইছে । যোৱা ৭ বছৰ ধৰি এই গোচৰৰ শুনানি চলি থকা আন্ধেৰী দণ্ডাধীশৰ আদালতে মঙলবাৰে এই ৰায়দান কৰে । অৱশ্যে ৰায়দানৰ শুনানিৰ বাবে আদালতত হাজিৰ নহ’ল বাৰ্মা ।

দণ্ডাধীশে নিৰ্দেশ দিয়ে যে “যিহেতু ৰায়দানৰ দিনা অভিযুক্ত অনুপস্থিত আছিল, সেয়েহে তেওঁৰ বিৰুদ্ধে নন-বেইলেবল ৱাৰেণ্ট (এন বি ডব্লিউ) জাৰি কৰা হওক আৰু সংশ্লিষ্ট আৰক্ষী থানাৰ জৰিয়তে তেওঁক গ্ৰেপ্তাৰ কৰা হওক ।”

৩৭২,২১৯ টকা ক্ষতিপূৰণ দিবলৈ নিৰ্দেশ-

অভিযোগকাৰীক ৩ মাহৰ ভিতৰত ৩৭২,২১৯ টকা ক্ষতিপূৰণ দিবলৈও ৰাম গোপাল বাৰ্মাক নিৰ্দেশ দিয়া হৈছে । ক্ষতিপূৰণ নিদিলে বাৰ্মাই আৰু তিনিমাহৰ সাধাৰণ কাৰাদণ্ডৰ সন্মুখীন হ’ব লাগিব ।

২০১৮ চনৰ গোচৰ-

এই গোচৰটো ২০১৮ চনত মহেশচন্দ্ৰ মিশ্ৰৰ জৰিয়তে শ্ৰী নামৰ এটা কোম্পানীয়ে আৰম্ভ কৰিছিল । এই গোচৰটো বাৰ্মাৰ প্ৰতিষ্ঠান “কোম্পানী”ৰ সৈতে জড়িত । “সত্য”, “ৰংগীলা”, “কোম্পানী”, “চৰকাৰ”ৰ দৰে সফল ছবি নিৰ্মাণ কৰা বাৰ্মাই যোৱা কিছু বছৰ পৰ্দাত ছবি প্ৰদৰ্শন কৰিব পৰা নাই । Covid-19 ৰ সময়ত তেওঁ আৰ্থিক সংকটত পৰিছিল, যাৰ বাবে তেওঁ নিজৰ কাৰ্যালয়টোও বিক্ৰী কৰিবলগীয়া হৈছিল ।

আদালতে জামিন মঞ্জুৰ কৰিছে-

এই বিশেষ গোচৰত ২০২২ চনৰ জুন মাহত বাৰ্মাক আদালতে ৫,০০০/- টকাৰ পি আৰ আৰু নগদ নিৰাপত্তাৰ ভিত্তিত জামিন প্ৰদান কৰিছিল । শাস্তি ঘোষণা কৰাৰ সময়ত দণ্ডাধীশ ৱাই পি পূজাৰীয়ে কয় যে, “ফৌজদাৰী প্ৰক্ৰিয়া বিধি, ১৯৭৩ৰ ধাৰা ৪২৮ ৰ অধীনত যিকোনো ছেট-অফৰ প্ৰশ্ন উত্থাপিত নহয় কিয়নো অভিযুক্তজনে বিচাৰৰ সময়ত কোনো সময় জিম্মাত কটোৱা নাছিল ।”

প্ৰতিৰক্ষা মন্ত্ৰী ৰাজনাথ সিঙে অক্ষয় কুমাৰ আৰু বীৰ পাহাড়িয়াৰ ছবি ‘স্কাই ফৰ্চ’ (Sky Force)ৰ প্ৰদৰ্শনত অংশগ্ৰহণ কৰে । এই স্ক্ৰীনিঙৰ কিছু ছবি তেওঁ নিজৰ এক্স একাউণ্টত শ্বেয়াৰ কৰিছে ।

প্ৰতিৰক্ষা মন্ত্ৰী ৰাজনাথ সিঙে চালে ‘স্কাই ফৰ্চ’।

মঙলবাৰে অক্ষয় কুমাৰ আৰু বীৰ পাহাড়িয়াৰ ছবি স্কাই ফৰ্চৰ বিশেষ প্ৰদৰ্শনত অংশগ্ৰহণ কৰে প্ৰতিৰক্ষা মন্ত্ৰী ৰাজনাথ সিঙে । তেওঁৰ লগতে চি ডি এছ জেনেৰেল অনিল চৌহানকে ধৰি অন্যান্য বিষয়াসকলো ছবিখনৰ এই প্ৰদৰ্শনত উপস্থিত থাকে । মন্ত্ৰীগৰাকীয়ে ছবিখনৰ তাৰকা অভিনেতাৰ ছবিও তেওঁৰ অফিচিয়েল এক্স একাউণ্টত শ্বেয়াৰ কৰে ।

২৪ জানুৱাৰীত মুক্তি পাব ছবিখনে-

ছবিখনৰ পৰিচালক অভিষেক অনিল কাপুৰ আৰু সন্দীপ কেৱলানী । ১৯৬৫ চনৰ ভাৰত-পাকিস্তান বিমান যুদ্ধৰ সময়ত পাকিস্তানৰ চাৰগোধা এয়াৰবেছত ভাৰতে কৰা প্রত্যাক্রমণৰ কাহিনীৰে নিৰ্মিত হৈছে স্কাই ফৰ্চ । অহা ২৪ জানুৱাৰীত ছবিগৃহত মুক্তি পাব স্কাই ফৰ্চ ছবিখনে । ছবিখনত নিমৰাট কৌৰ আৰু চাৰা আলী খানকো দেখা যাব ।