বন বিভাগত ধনৰ বিনিময়ত নচলিব বদলি-পোষ্টিং! মন্ত্ৰী জয়ন্ত মল্লবৰুৱাৰ সাৱধানবাণী
মন্ত্ৰী জয়ন্ত মল্লবৰুৱাই বন বিভাগৰ এক গুৰুত্বপূৰ্ণ পৰ্যালোচনা বৈঠকত অংশ লৈ একাংশ বিষয়া-কৰ্মচাৰীক কঠোৰ সতৰ্কবাণী শুনাই । একে ঠাইতে তিনি বছৰ থকা সকল আন ঠাইলৈ যাবলৈ সাজু হবৰ হ’ল বুলিও কয় তেওঁ ।
অসমৰ বন বিভাগৰ কাম-কাজত এতিয়াৰে পৰা সততা, স্বচ্ছতা আৰু কৰ্মদক্ষতাই হ’ব লাগিব মূল মন্ত্ৰ । সোমবাৰে ৰাজ্যৰ বন মন্ত্ৰী জয়ন্ত মল্লবৰুৱাই বন বিভাগৰ এক গুৰুত্বপূৰ্ণ পৰ্যালোচনা বৈঠকত অংশ লৈ বিভাগটোৰ বাবে এক নতুন আৰু কঠোৰ দৃষ্টিভংগীৰ ৰেখাপাত কৰে ।
গুৱাহাটীৰ খনাপাৰাস্থিত অসম প্ৰশাসনিক পদাধিকাৰী মহাবিদ্যালয়ত অনুষ্ঠিত এই বৈঠকত ৰাজ্যৰ সকলো আঞ্চলিক বন সংমণ্ডলৰ বিষয়া-কৰ্মচাৰীসকল উপস্থিত থাকে । বৈঠকত মন্ত্ৰীগৰাকীয়ে চৰকাৰৰ বন ভূমি সুৰক্ষা আৰু উচ্ছেদ অভিযানত বন বিভাগে লোৱা ভূমিকাৰ প্ৰশংসা কৰে । ইয়াৰ বাবে তেওঁ ফ্ৰণ্টলাইন কৰ্মচাৰী আৰু বিষয়াসকলক কৃতিত্ব দি ভৱিষ্যতেও নিষ্ঠাৰে কাম কৰিবলৈ আহ্বান জনায় ।
দুৰ্নীতিৰ বিৰুদ্ধে বন মন্ত্ৰীৰ কঠোৰ সকীয়নি
বৈঠকত আটাইতকৈ ডাঙৰ আৰু স্পষ্ট বাৰ্তা দি বন মন্ত্ৰী জয়ন্ত মল্লবৰুৱাই ঘোষণা কৰে যে বিভাগটোত বদলি আৰু নিযুক্তি বা পোষ্টিঙৰ নামত কোনো ধৰণৰ আৰ্থিক লেনদেন বা দুৰ্নীতি সহ্য কৰা নহ’ব ।
বিষয়া-কৰ্মচাৰীক সকীয়াই মন্ত্ৰীগৰাকীয়ে কয় যে, তিনি বছৰ ধৰি একে ঠাইতে থকা সকলক বদলি কৰা হ’ব । ‘নিজৰ পছন্দ অনুসৰি ৰেঞ্জ, বীট বা ডিভিজনৰ অফিচত বছৰ বছৰ ধৰি বহি থকা চিষ্টেম নচলিব’ বুলি মন্তব্য কৰে মন্ত্ৰীগৰাকীয়ে ।
তেওঁ চোকা শব্দৰে সকীয়াই দি কয় যে কোনো ৰাজনৈতিক নেতা বা জ্যেষ্ঠ বিষয়াৰ নাম লৈ যদি কোনো বিষয়া, কৰ্মচাৰী বা মধ্যভোগীয়ে ধন ল’বলৈ বা দিবলৈ চেষ্টা কৰে, তেন্তে তেওঁলোকৰ বিৰুদ্ধে চৰকাৰে আটাইতকৈ কঠোৰ আইনী পদক্ষেপ গ্ৰহণ কৰিব ।
বনজ সম্পদৰ জৰিয়তে ৰাজহ বৃদ্ধিৰ লক্ষ্য
এই দিনজোৰা বৈঠকত কেৱল দুৰ্নীতি প্ৰতিৰোধেই নহয়, বৰঞ্চ বন বিভাগৰ পৰা কেনেকৈ ৰাজহ বৃদ্ধি কৰিব পাৰি, সেই সন্দৰ্ভতো বিশদ আলোচনা কৰা হয় । বিভাগীয় কাম-কাজৰ প্ৰণালীবদ্ধ সমস্যাসমূহ আঁতৰাই ৰাজহ ফাদিল বন্ধ কৰাৰ ওপৰত গুৰুত্ব দিয়া হয় ।
মন্ত্ৰী বৰুৱাই উল্লেখ কৰে যে, “পৰিৱেশ আৰু বন্যপ্ৰাণী সংৰক্ষণৰ প্ৰতি থকা দায়বদ্ধতা অলপো ভংগ নকৰাকৈ বিভাগে অসমৰ বনজ সম্পদৰ সম্পূৰ্ণ সম্ভাৱনা ব্যৱহাৰ কৰি ৰাজহ বহুগুণ বৃদ্ধি কৰিব লাগিব ।”
তেওঁ লগতে কয় যে বন বিভাগৰ পৰা অহা অতিৰিক্ত ৰাজহে ৰাজ্যৰ উন্নয়নমূলক কাম-কাজ যেনে নতুন চিকিৎসা মহাবিদ্যালয় স্থাপনৰ দৰে গুৰুত্বপূৰ্ণ প্ৰকল্পত ব্যৱহাৰ কৰা হ’ব । এই ৰণনীতি অধিক ফলপ্ৰসূ কৰিবলৈ বৈঠকখনত কৰ আৰু পৰিবহন বিভাগৰ বিষয়াসকলো উপস্থিত থাকে ।
বিভাগটোৰ মৰ্যাদা অক্ষুণ্ণ ৰাখিবলৈ মন্ত্ৰী জয়ন্ত মল্লবৰুৱাই কৰ্মচাৰীসকলক কেইটামান বিশেষ নীতি মানি চলিবলৈ নিৰ্দেশ দিয়ে :
-যিকোনো স্থানতে পোষ্টিং নহওক কিয়, কৰ্মচাৰীসকলে সদায় সততাৰে নিজৰ দায়িত্ব পালন কৰিব লাগিব ।
-বদলিক চাকৰিৰ এটা অপৰিহাৰ্য অংশ আৰু অনুশাসন হিচাপে গ্ৰহণ কৰিব লাগিব । ইয়াৰ বাবে কোনো লবী কৰিব নোৱাৰিব ।
-কোনো ঠাইত দুৰ্নীতি হ’লে কোনো সংকোচ নকৰাকৈ উচ্চ পদস্থ বিষয়াৰ ওচৰত ৰিপ’ৰ্ট কৰিব লাগিব ।
-নিজৰ দক্ষতা আৰু জনসেৱাৰ জৰিয়তে অসম বন বিভাগৰ নাম উজলাই তুলিব লাগিব ।
লগতে পঢ়ক : ৩ টা সন্তান হ’লেই বন্ধ হ’ব বিনামূলীয়া স্বাস্থ্যসেৱা! ভৰিব লাগিব মাচুল