ফ্ৰান্সৰ ৰাষ্ট্ৰপতি মেক্ৰনৰ সৈতে বাৰ্তালাপ প্ৰধানমন্ত্ৰী মোদীৰ

শনিবাৰে (২ ছেপ্টেম্বৰ) ফ্ৰান্সৰ ৰাষ্ট্ৰপতি ইমানুৱেল মেক্ৰনৰ সৈতে টেলিফোনিক বাৰ্তালাপ কৰে প্ৰধানমন্ত্ৰী নৰেন্দ্ৰ মোদীয়ে । ইয়াৰ মাজতে দুয়োগৰাকী নেতাই ইউক্ৰেইনত সংঘাতৰ শীঘ্ৰে অন্ত পেলোৱাৰ প্ৰচেষ্টাৰ বিষয়ে আলোচনা কৰে । এই সমস্যাৰ শান্তিপূৰ্ণ সমাধান আৰু সমগ্ৰ অঞ্চলটোৰ শান্তি আৰু স্থিতিশীলতা আগতীয়াকৈ পুনৰুদ্ধাৰ কৰাৰ বাবে ভাৰতৰ অবিৰত সমৰ্থনৰ কথাও তেওঁলোকে পুনৰবাৰ উল্লেখ কৰে ।

তেওঁলোকে দুয়োখন দেশৰ (ৰাছিয়া আৰু ইউক্ৰেইন) যুদ্ধৰ অন্ত পেলোৱাৰ ওপৰত গুৰুত্ব আৰোপ কৰে । ইয়াৰ লগতে দুয়োগৰাকী নেতাই ভাৰত আৰু ফ্ৰান্সৰ সম্পৰ্কৰ বিষয়েও আলোচনা কৰে । দুয়োগৰাকী নেতাই বিভিন্ন ক্ষেত্ৰত দ্বিপাক্ষিক সহযোগিতাৰ ইতিবাচক অগ্ৰগতিক আদৰণি জনায় ।

ছচিয়েল মিডিয়াত পোষ্ট কৰিলে প্ৰধানমন্ত্ৰীয়ে-

প্ৰধানমন্ত্ৰী মোদীয়ে ছ’চিয়েল মিডিয়াত পোষ্ট কৰি মেক্ৰনৰ সৈতে হোৱা কথা-বতৰাৰ বিষয়ে অৱগত কৰে । তেওঁৰ পোষ্টত পি এম ই লিখিছে, ‘ৰাষ্ট্ৰপতি মেক্ৰনৰ সৈতে বহুত ভাল কথা-বতৰা হৈছিল । আমি বিভিন্ন ক্ষেত্ৰত দ্বিপাক্ষিক সহযোগিতাৰ অগ্ৰগতিৰ পৰ্যালোচনা আৰু ইতিবাচক মূল্যায়ন কৰিলোঁ । ইউক্ৰেইনত সংঘাতৰ অন্ত পেলোৱাৰ প্ৰচেষ্টাকে ধৰি আন্তঃৰাষ্ট্ৰীয় আৰু আঞ্চলিক বিষয়সমূহৰ ওপৰত মত বিনিময় কৰা হয় । ভাৰত-ফ্ৰান্সৰ কৌশলগত অংশীদাৰিত্বই বিশ্ব শান্তি আৰু স্থিতিশীলতাক প্ৰসাৰিত কৰাত গুৰুত্বপূৰ্ণ ভূমিকা পালন কৰি যাব’ ।

ৰাষ্ট্ৰপতি মেক্ৰনেও পোষ্ট শ্বেয়াৰ কৰে-

ফ্ৰান্সৰ ৰাষ্ট্ৰপতিগৰাকীয়ে ছ’চিয়েল মিডিয়াত এটা পোষ্ট শ্বেয়াৰ কৰি কয় যে তেওঁ প্ৰধানমন্ত্ৰী নৰেন্দ্ৰ মোদীৰ সৈতে বাৰ্তালাপ কৰে আৰু পেৰিছত ৰাষ্ট্ৰপতি জেলেনস্কি আৰু মিত্ৰ দেশসমূহৰ সৈতে হোৱা বৈঠকৰ ফলাফলৰ বিষয়ে অৱগত কৰে । মেক্ৰনে কয় যে ইউক্ৰেইনত ন্যায়সংগত আৰু স্থায়ী শান্তি প্ৰতিষ্ঠা কৰাৰ বাবে ভাৰত আৰু ফ্ৰান্সৰ একে প্ৰতিশ্ৰুতি আছে । তেওঁ জোৰ দি কয় যে দুয়োখন দেশে নিজৰ বন্ধুত্ব আৰু কৌশলগত অংশীদাৰিত্বৰ ভিত্তিত শান্তিৰ দিশত একেলগে কাম কৰি যাব ।

বহু গুৰুত্বপূৰ্ণ বিষয়ৰ ওপৰত আলোচনা-

প্ৰধানমন্ত্ৰী মোদী আৰু ৰাষ্ট্ৰপতি মেক্ৰনে অৰ্থনীতি, প্ৰতিৰক্ষা, বিজ্ঞান, প্ৰযুক্তি আৰু মহাকাশৰ দৰে বহু ক্ষেত্ৰত অগ্ৰগতিৰ পৰ্যালোচনা কৰে । দুয়োগৰাকী নেতাই এই সহযোগিতাক আৰু অধিক আগুৱাই নিবলৈ সন্মত হয় আৰু হৰাইজন ২০৪৭ ৰোডমেপ, ইণ্ডো-পেচিফিক ৰোডমেপ আৰু ডিফেন্স ইণ্ডাষ্ট্ৰিয়েল ৰোডমেপৰ অধীনত অংশীদাৰিত্ব আৰু অধিক শক্তিশালী কৰাৰ সংকল্প গ্ৰহণ কৰে ।

ভাৰত ভ্ৰমণৰ নিমন্ত্ৰণ গ্ৰহণ কৰে মেক্ৰনে-

২০২৬ চনৰ ফেব্ৰুৱাৰী মাহত ভাৰতে আয়োজন কৰিবলগীয়া এ আই ইমপেক্ট ছামিটৰ আমন্ত্ৰণ গ্ৰহণ কৰাৰ বাবে মেক্ৰনক ধন্যবাদ জনাই মোদীয়ে কয় যে তেওঁ ফ্ৰান্সৰ ৰাষ্ট্ৰপতিক আদৰণি জনোৱাৰ বাবে আগ্ৰহী । মোদী-মেক্ৰনৰ আলোচনা সন্দৰ্ভত ভাৰতে প্ৰকাশ কৰা এক বিবৃতিত কোৱা হৈছে যে ২০২৬ চনৰ ফেব্ৰুৱাৰী মাহত অনুষ্ঠিত হ’বলগীয়া এ আই ইমপেক্ট ছামিটত অংশগ্ৰহণৰ বাবে ভাৰত ভ্ৰমণৰ আমন্ত্ৰণ গ্ৰহণ কৰিছে ফ্ৰান্সৰ ৰাষ্ট্ৰপতি মেক্ৰনে ।

লগতে পঢ়ক : ইউক্ৰেইনত ৰাছিয়াৰ আটাইতকৈ ডাঙৰ এয়াৰ ষ্ট্ৰাইক… কিয়েভত ৮০০ৰো অধিক ড্ৰোন নিক্ষেপ