জম্মু-কাশ্মীৰৰ পহলগামত সংঘটিত সন্ত্ৰাসবাদী আক্ৰমণৰ পিছত কেন্দ্ৰীয় চৰকাৰক ধাৰাবাহিকভাৱে একচন মোডত দেখা গৈছে । পাকিস্তানৰ ওপৰত কেইবাটাও নিষেধাজ্ঞা আৰোপ কৰাৰ পিছত মঙলবাৰে প্ৰধানমন্ত্ৰী নৰেন্দ্ৰ মোদীৰ অধ্যক্ষতাত ভৱিষ্যতৰ ৰণনীতিৰ বাবে উচ্চ পৰ্যায়ৰ বৈঠক আহ্বান কৰা হয় । এই বৈঠকত প্ৰতিৰক্ষা মন্ত্ৰী ৰাজনাথ সিং, ৰাষ্ট্ৰীয় নিৰাপত্তা উপদেষ্টা (এন এছ এ) অজিত ডোভাল আৰু প্ৰতিৰক্ষা মুৰব্বী জেনেৰেল অনিল চৌহান উপস্থিত থাকে ।

সেনা প্ৰধান জেনেৰেল উপেন্দ্ৰ দ্বিবেদী আৰু নৌসেনাৰ মুৰব্বী এডমিৰেল দিনেশ কে. ত্ৰিপাঠীও উপস্থিত থাকে এই বৈঠকত । এই গুৰুত্বপূৰ্ণ বৈঠকত পহলগাম আক্ৰমণৰ পিছত নিৰাপত্তা পৰিস্থিতি, সন্ত্ৰাসবাদীৰ বিৰুদ্ধে চলি থকা অভিযান আৰু ভৱিষ্যতৰ কৌশলৰ বিষয়ে বিতংভাৱে আলোচনা কৰা হয় ।

তথ্য অনুসৰি প্ৰধানমন্ত্ৰীৰ বাসগৃহত অনুষ্ঠিত এই বৈঠকত আক্ৰমণৰ পৰিস্থিতি, নিৰাপত্তা বাহিনীৰ কাৰ্য্য আৰু ভৱিষ্যতৰ কৌশলৰ বিষয়ে বিতংভাৱে আলোচনা কৰা হয় । লগতে পহলগাম আক্ৰমণৰ অভিযুক্তৰ বিৰুদ্ধে কঠোৰ ব্যৱস্থা গ্ৰহণ কৰিবলৈ প্ৰধানমন্ত্ৰীয়ে নিৰ্দেশ দিছে । ইফালে অমৰনাথ যাত্ৰা আৰু অন্যান্য অসামৰিক কাৰ্যকলাপৰ নিৰাপত্তাৰ ক্ষেত্ৰত যাতে কোনো ধৰণৰ ত্ৰুটি নাথাকে তাৰ বাবেও তেওঁ নিৰ্দেশ দিয়ে ।

২২ এপ্ৰিলত পহলগামত সংঘটিত হৈছিল সন্ত্ৰাসবাদী আক্ৰমণ-

উল্লেখ্য যে ২২ এপ্ৰিলত পহলগামত সংঘটিত ভয়ানক সন্ত্ৰাসবাদী আক্ৰমণত ২৬ জন লোকে প্ৰাণ হেৰুৱাইছিল । ইয়াৰ উপৰিও এই বৰ্বৰ আক্ৰমণত কেইবাজনো লোক আহত হৈছে । শেহতীয়া বছৰবোৰত সংঘটিত হোৱা সন্ত্ৰাসবাদী আক্ৰমণৰ অন্যতম বুলি বিবেচিত হৈছে এই কাণ্ড । এই আক্ৰমণৰ পিছত উপত্যকাটোত নিৰাপত্তা সংস্থাসমূহক হাই এলাৰ্টত ৰখা হৈছে । এই আক্ৰমণৰ লগত জড়িত সন্ত্ৰাসবাদীৰ সন্ধানত অভিযান অব্যাহত আছে । ইয়াৰ বাবে নিৰাপত্তা বাহিনীয়ে বিভিন্ন স্থানত অভিযান চলাই আছে । এই আক্ৰমণৰ আঁৰত আছে পাকিস্তান । ইয়াৰ পিছতে ভাৰত চৰকাৰে পাকিস্তানৰ ওপৰত কেইবাটাও নিষেধাজ্ঞা আৰোপ কৰাৰ সিদ্ধান্ত লয় ।

আজি মান কি বাত কাৰ্যসূচীত ভাষণ প্ৰদান কৰিছে প্ৰধানমন্ত্ৰী নৰেন্দ্ৰ মোদীয়ে । এয়া মন কি বাত অনুষ্ঠানৰ ১২১ সংখ্যক খণ্ড । অনুষ্ঠানত প্ৰধানমন্ত্ৰীয়ে পহলগাম আক্ৰমণ সন্দৰ্ভত চৰ্চা কৰি ভুক্তভোগী পৰিয়ালক ন্যায়ৰ আশ্বাস দিয়ে ।

মন কি বাতত দেশবাসীক সম্বোধন কৰি প্ৰধানমন্ত্ৰী নৰেন্দ্ৰ মোদীয়ে কয়, ‘আজি যেতিয়া মই আপোনালোকৰ লগত বাৰ্তালাপ কৰিছো  তেতিয়া মোৰ হৃদয়ত গভীৰ যন্ত্ৰণা আছে । ২২ এপ্ৰিলত পহলগামত সংঘটিত সন্ত্ৰাসবাদী আক্ৰমণৰ ঘটনাই দেশৰ প্ৰতিজন নাগৰিকক দুখ দিছে । ক্ষতিগ্ৰস্ত পৰিয়ালৰ প্ৰতি প্ৰতিগৰাকী ভাৰতীয়ৰ গভীৰ সমবেদনা আছে । তেওঁলোক যি ৰাজ্যৰেই নহওক কিয় বা যি ভাষাতে কথা নকওক কিয়, তেওঁলোকে এই আক্ৰমণত আপোনজনক হেৰুওৱাৰ বেদনা অনুভৱ কৰিছে । সন্ত্ৰাসবাদী আক্ৰমণৰ ছবি দেখি প্ৰতিজন ভাৰতীয় ক্ষোভত থকা যেন অনুভৱ হয় ।‘

তেওঁ কয়, ‘পহলগামৰ এই আক্ৰমণে সন্ত্ৰাসবাদৰ পৃষ্ঠপোষকতা কৰাসকলৰ হতাশাৰ পৰিচয় দিয়ে, ইয়াৰ দ্বাৰা তেওঁলোকৰ কাপুৰুষালিৰ পৰিচয় পোৱা যায় । যি সময়ত কাশ্মীৰত শান্তি ঘূৰি আহিছিল, সেই সময়ত বিদ্যালয়-মহাবিদ্যালয়ত সজীৱতা আছিল, নিৰ্মাণ কাৰ্য্যই অভূতপূৰ্ব গতি লাভ কৰিছিল, গণতন্ত্ৰ শক্তিশালী হৈ আহিছিল, পৰ্যটকৰ সংখ্যা অভিলেখ সংখ্যক বৃদ্ধি পাইছিল, মানুহৰ আয় বাঢ়িছিল, যুৱক-যুৱতীসকলৰ বাবে নতুন সুযোগৰ সৃষ্টি হৈছিল । দেশৰ শত্ৰু জম্মু-কাশ্মীৰৰ শত্ৰুবোৰে এই কথা পছন্দ কৰা নাছিল ।‘

প্ৰধানমন্ত্ৰীয়ে কয়, ‘সন্ত্রাসবাদী আৰু তেওঁলোকৰ মালিকসকলে কাশ্মীৰ পুনৰ ধ্বংস হোৱাটো বিচাৰে আৰু সেয়েহে তেওঁলোকে ইমান ডাঙৰ ষড়যন্ত্র চলাইছে ৷ দেশৰ ঐক্য, ১৪০ কোটি ভাৰতীয়ৰ সংহতি, সন্ত্ৰাসবাদৰ বিৰুদ্ধে এই যুদ্ধত আমাৰ সৰ্ববৃহৎ শক্তি । এই ঐক্যই সন্ত্ৰাসবাদৰ বিৰুদ্ধে আমাৰ নিৰ্ণায়ক যুঁজৰ আধাৰ । দেশৰ সন্মুখত এই প্ৰত্যাহ্বানৰ সন্মুখীন হ’বলৈ আমি আমাৰ সংকল্প শক্তিশালী কৰিব লাগিব ।‘

প্ৰধানমন্ত্ৰী মোদীয়ে আৰু কয়, ‘বন্ধুসকল, ভাৰতত আমাৰ যি ক্ষোভ আছে, সেয়া সমগ্ৰ বিশ্বতে আছে । এই সন্ত্ৰাসবাদী আক্ৰমণৰ পিছত সমগ্ৰ বিশ্বৰ পৰা ধাৰাবাহিকভাৱে শোক প্ৰকাশ পাইছে । গ্লোবেল নেতাসকলেও মোক ফোন কৰিছে, চিঠি লিখিছে আৰু মেছেজ কৰিছে । এই জঘন্য সন্ত্ৰাসবাদী আক্ৰমণক সকলোৱে তীব্ৰ গৰিহণা দিছে । তেওঁলোকে মৃতকৰ পৰিয়াললৈ সমবেদনা জ্ঞাপন কৰিছে ।‘

‘সন্ত্ৰাসবাদৰ বিৰুদ্ধে যুঁজত একত্ৰিত হৈ থিয় দিছে ১৪০ কোটি ভাৰতীয়’

প্ৰধানমন্ত্ৰীগৰাকীয়ে লগতে কয়, ‘আমাৰ সন্ত্ৰাসবাদৰ বিৰুদ্ধে যুঁজত ১৪০ কোটি ভাৰতীয়ৰ সৈতে সমগ্ৰ বিশ্ব থিয় দিছে । মই আকৌ এবাৰ ভুক্তভোগী পৰিয়ালক আশ্বাস দিছো যে তেওঁলোকে ন্যায় পাব, ন্যায় নিশ্চয় হ’ব । এই আক্ৰমণৰ দোষী আৰু ষড়যন্ত্ৰকাৰীক আটাইতকৈ কঠোৰ প্ৰত্যুত্তৰ দিয়া হ’ব ।‘

আজি বিহাৰ ভ্ৰমণত আছে প্ৰধানমন্ত্ৰী নৰেন্দ্ৰ মোদী । মধুবনীত ৰাষ্ট্ৰীয় পঞ্চায়তীৰাজ দিৱস উপলক্ষে তেওঁ পহলগাম সন্ত্ৰাসবাদী আক্ৰমণ সন্দৰ্ভত কয় যে আমি সন্ত্ৰাসবাদৰ মেৰুদণ্ড ভাঙি দিম ।

ৰাজহুৱা সভাত ভাষণ দি প্ৰধানমন্ত্ৰী মোদীয়ে কয় যে ২২ এপ্ৰিলত জম্মু-কাশ্মীৰৰ পহলগামত সন্ত্ৰাসবাদীয়ে নিৰ্মমভাৱে নিৰীহ দেশবাসীক হত্যা কৰিছিল । এই ঘটনাৰ বাবে সমগ্ৰ দেশ দুখী আৰু ব্যৰ্থিত হৈ পৰিছে । সমগ্ৰ দেশে সকলো ক্ষতিগ্ৰস্ত পৰিয়ালৰ সৈতে তেওঁলোকৰ দুখত থিয় দিছে । বৰ্তমান চিকিৎসাধীন হৈ থকা সকল যাতে সোনকালে সুস্থ হৈ উঠে তাৰ বাবে চৰকাৰে যৎপৰোনাস্তি চেষ্টা চলাইছে ।

প্ৰধানমন্ত্ৰী মোদীয়ে কয় যে এই সন্ত্ৰাসবাদী আক্ৰমণত কোনোবাই পুত্ৰক হেৰুৱাইছে, কোনোবাই ভাতৃক হেৰুৱাইছে, কোনোবাই জীৱন সংগী হেৰুৱাইছে । তেওঁলোকৰ কোনোৱে বাংলা কৈছিল, কোনোৱে কানাড়া, কোনো মাৰাঠী আছিল, কোনো ওড়িয়া, কোনো গুজৰাটৰ, কোনো বিহাৰৰ আছিল । আজি কাৰ্গিলৰ পৰা কন্যাকুমাৰীলৈকে এইসকল লোকৰ মৃত্যুত আমাৰ দুখ একেই, আমাৰ খং একেই । এই আক্ৰমণ কেৱল নিৰস্ত্ৰ পৰ্যটকৰ ওপৰতেই নহয় দেশৰ শত্ৰুপক্ষই ভাৰতৰ আত্মাক আক্ৰমণ কৰিবলৈ সাহস কৰিছে । মই অতি স্পষ্ট ভাষাত ক’ব বিচাৰিছো, যিসকল সন্ত্ৰাসবাদীয়ে এই আক্ৰমণ সংঘটিত কৰিছিল আৰু যিসকলে এই আক্ৰমণৰ ষড়যন্ত্ৰ ৰচনা কৰিছিল তেওঁলোকে কল্পনা কৰাতকৈও ডাঙৰ শাস্তি লাভ কৰিব । শাস্তি পাবই ।

উল্লেখ্য যে মঙলবাৰে পহলগামত সংঘটিত সন্ত্ৰাসবাদী আক্ৰমণত এতিয়ালৈকে ২৬ জন লোকৰ মৃত্যু হোৱাৰ বিপৰীতে ১৭ জন লোক আহত হৈছে । এই আক্ৰমণ পহলগামৰ বৈছাৰণ উপত্যকাত সংঘটিত হৈছিল, য’ত সন্ত্ৰাসবাদীয়ে নিৰ্বাচিতভাৱে নিৰীহ জনতাক লক্ষ্য কৰি লৈছিল ।

প্ৰধানমন্ত্ৰী মোদীয়ে কয় যে এতিয়া সন্ত্ৰাসবাদীৰ বাকী থকা ভূমি ধ্বংস কৰাৰ সময় আহি পৰিছে । ১৪০ কোটি ভাৰতীয়ৰ ইচ্ছাশক্তিয়ে এতিয়া সন্ত্ৰাসৰ ককাল ভাঙিব ।