অষ্ট্ৰেলিয়াৰ অধিনায়ক পেট কামিন্সে আইচিচি চেম্পিয়নছ ট্ৰফী ২০২৫ টুৰ্ণামেণ্টৰ পৰা বঞ্চিত হোৱাটো প্ৰায় নিশ্চিত হৈ পৰিছে।আইচিচি টুৰ্ণামেণ্টৰ পূৰ্বে, এই বেয়া খবৰ আহিছে।

অষ্ট্ৰেলিয়াৰ মুখ্য প্ৰশিক্ষক এণ্ড্ৰিউ মেকডনাল্ডে প্ৰকাশ কৰিছিল যে দলটোৰ অধিনায়ক আৰু দ্ৰুত বলাৰ পেট কামিন্সৰ ১৯ ফেব্ৰুৱাৰীৰ পৰা আৰম্ভ হোৱা চেম্পিয়নছ ট্ৰফীৰ বাবে সম্পূৰ্ণৰূপে ফিট হোৱাৰ সম্ভাৱনা খুব কম।

যদি পেট কামিন্স সময়মতে ফিট নহয়, তেন্তে ষ্টিভ স্মিথ বা ট্ৰেভিছ হেডক অষ্ট্ৰেলিয়াৰ অধিনায়কত্ব অৰ্পণ কৰিব পাৰি।

দ্বিতীয় সন্তানৰ জন্মৰ বাবে শ্ৰীলংকাত অনুষ্ঠিত টেষ্ট শৃংখলাত নেখেলা পেট কামিন্সে গোৰোহাৰ আঘাতৰ সৈতেও যুঁজি আছে আৰু এতিয়ালৈকে অনুশীলন আৰম্ভ কৰা নাই।

ভাৰত আৰু অষ্ট্ৰেলিয়াৰ মাজত পাঁচ খন টেষ্টৰ বৰ্ডাৰ-গাভাস্কাৰ শৃংখলাৰ সময়ত তেওঁৰ গোৰোহাৰ সমস্যা অধিক অৱনতি ঘটিছিল।

অষ্ট্ৰেলিয়াৰ মুখ্য প্ৰশিক্ষক এণ্ড্ৰিউ মেকডনাল্ডে কৈছিল যে, ‘পেট কামিন্সে কোনো কাৰণতেই বলিং কৰিবলৈ সক্ষম নহয়, সেয়েহে চেম্পিয়নছ ট্ৰফীত খেলাৰ সম্ভাৱনা অতি কম।ইয়াৰ অৰ্থ হৈছে আমাক এজন অধিনায়কৰ প্ৰয়োজন।

যেতিয়া আমি পেট (কামিন্স)ৰ সৈতে চেম্পিয়নছ ট্ৰফী দলৰ বিষয়ে আলোচনা কৰি আছিলো, তেতিয়া ষ্টিভ স্মিথ আৰু ট্ৰেভিছ হেড এনেকুৱা দুজন খেলুৱৈ আছিল যাৰ সৈতে আমি কথা পাতি আছিলো।

আমি অধিনায়কত্বৰ বাবে তেওঁলোক দুয়োৰে ওপৰত চকু ৰাখিছো।” শ্ৰীলংকাৰ বিৰুদ্ধে টেষ্ট শৃংখলাৰ সময়ত পেট কামিন্সৰ অনুপস্থিতিত স্মিথে দলটোৰ দায়িত্ব গ্ৰহণ কৰিছিল।

চেম্পিয়নছ ট্ৰফী টুৰ্ণামেণ্টত অষ্ট্ৰেলিয়াক আফগানিস্তান, ইংলেণ্ড আৰু দক্ষিণ আফ্ৰিকাৰ সৈতে গ্ৰুপ বি-ত ৰখা হৈছে, আৰু তেওঁলোকৰ সকলো ৰাউণ্ড-ৰবিন মেচ পাকিস্তানৰ লাহোৰ আৰু ৰাৱালপিণ্ডিত অনুষ্ঠিত হ’ব।

ইয়াৰ পূৰ্বে অষ্ট্ৰেলিয়াৰ দলটোৱে কলম্বোত শ্ৰীলংকাৰ বিৰুদ্ধে ২ খন এদিনীয়া খেলো খেলিব। ২২ ফেব্ৰুৱাৰীত লাহোৰত ইংলেণ্ডৰ বিৰুদ্ধে চেম্পিয়নছ ট্ৰফী টুৰ্ণামেণ্টৰ প্ৰথমখন খেলৰ পূৰ্বে অষ্ট্ৰেলিয়াৰ বাবে অনুশীলন কৰাৰ এইটো এটা সুযোগ হ’ব।