ভাৰত-ফ্ৰান্সৰ মাজত আছে এক অনন্য ফুটবল সংযোগ । কেৱল ৰাজনীতি বা অৰ্থনীতিতে সীমাবদ্ধ নহয়, বৰঞ্চ ক্ৰীড়া জগতৰ এক অনন্য আবেগেও এই দুই দেশক সংযোগ কৰি ৰাখিছে ।

ভাৰত আৰু ফ্ৰান্সৰ মাজৰ দ্বিপাক্ষিক সম্পৰ্ক কেৱল ৰাজনীতি বা অৰ্থনীতিতে সীমাবদ্ধ নহয়, বৰঞ্চ ক্ৰীড়া জগতৰ এক অনন্য আবেগেও এই দুই দেশক সংযোগ কৰি ৰাখিছে । শেহতীয়াকৈ পেৰিছত আয়োজিত এক বিশেষ অনুষ্ঠানত প্ৰৱাসী ভাৰতীয়সকলক সম্বোধন কৰি প্ৰধানমন্ত্ৰী নৰেন্দ্ৰ মোদীয়ে এই ফুটবল প্ৰেমৰ বিষয়ে আলোকপাত কৰে । তেওঁ উল্লেখ কৰে যে বৰ্তমান সমগ্ৰ বিশ্বতে ফুটবলৰ জ্বৰ চলি থকাৰ সময়তে ভাৰততো ইয়াৰ উন্মাদনা চৰম পৰ্যায়ত উপনীত হৈছে । বিশেষকৈ ভাৰতত ফৰাচী ফুটবল দল আৰু ইয়াৰ তাৰকাসকলৰ এক বিশাল অনুৰাগী থকাৰ কথা উল্লেখ কৰি প্ৰধানমন্ত্ৰীয়ে চলি থকা ফিফা বিশ্বকাপত এক জয়ৰে সুন্দৰ আৰম্ভণি কৰা ফ্ৰান্স দলটোক শুভেচ্ছা জ্ঞাপন কৰে ।

১৯৪৮ চনৰ সেই ঐতিহাসিক মেচ : খালী ভৰিৰে ফ্ৰান্সক ভয় খুৱাইছিল ভাৰতে

ভাৰত আৰু ফ্ৰান্সৰ এই ফুটবল সংযোগৰ ইতিহাস অতি পুৰণি । ১৯৪৮ চনৰ ৩১ জুলাইত এখন স্বাধীন ৰাষ্ট্ৰ হিচাপে ভাৰতে নিজৰ প্ৰথমখন চৰকাৰী আন্তঃৰাষ্ট্ৰীয় মেচ খেলিছিল ফ্ৰান্সৰ বিৰুদ্ধে । সেই খেলখনত এক অভূতপূৰ্ব দৃশ্য দেখা গৈছিল- উদ্যমী ভাৰতীয় দলটোৰ বেছিভাগ খেলুৱৈয়েই খালী ভৰিৰে খেলপথাৰত নামিছিল । খেলখনত ভাৰতে দুটাকৈ পেনাল্টী মিছ কৰাৰ পিছতো শক্তিশালী ফৰাচী দলটোক এক বৃহৎ প্ৰত্যাহ্বানৰ মুখলৈ ঠেলি দিছিল । যদিও শেষত ভাৰত ২-১ গ’লত পৰাস্ত হৈছিল, তথাপিও ভাৰতীয় দলটোৰ সেই সাহস আৰু খেলুৱৈ সুলভ মনোভাৱক সন্মান জনাই ষ্টেডিয়ামত উপস্থিত থকা সমগ্ৰ দৰ্শকে থিয় হৈ হাত চাপৰি বজাইছিল ।

বিশ্বকাপ খেলা প্ৰথমজন ভাৰতীয় মূলৰ খেলুৱৈ: বিকাশ ধোৰাছু

ভাৰত-ফ্ৰান্সৰ ফুটবল ইতিহাসত আন এক স্মৰণীয় নাম হ’ল বিকাশ ধোৰাছু । ইণ্ডো-মৰিচিয়ান বংশোদ্ভূত এই প্ৰাক্তন ফৰাচী পেছাদাৰী ফুটবলাৰজন আছিল ফিফা বিশ্বকাপত অংশগ্ৰহণ কৰা ভাৰতীয় মূলৰ প্ৰথমগৰাকী খেলুৱৈ । ধোৰাছুৰ পূৰ্বপুৰুষসকল আছিল বৰ্তমানৰ অন্ধ্ৰ প্ৰদেশৰ বিজয়নগৰমৰ তেলেগু ভাষী লোক, যিসকলে ব্ৰিটিছ ঔপনিৱেশিক শাসনকালত কুঁহিয়াৰ খেতিত কাম কৰিবলৈ মৰিচাছলৈ প্ৰব্ৰজন কৰিছিল । পৰৱৰ্তী সময়ত তেওঁৰ পিতৃ-মাতৃ ফ্ৰান্সলৈ স্থানান্তৰিত হয় আৰু ১৯৭৩ চনত তাতেই বিকাশৰ জন্ম হয় ।

২০০৬ চনৰ জাৰ্মানী বিশ্বকাপত ফ্ৰান্সৰ ৰাষ্ট্ৰীয় দলৰ স্কোয়াডত স্থান লাভ কৰা ধোৰাছুই ছুইজাৰলেণ্ড আৰু দক্ষিণ কোৰিয়াৰ বিৰুদ্ধে বিকল্প খেলুৱৈ হিচাপে খেলিছিল । সদায় নিজৰ তেলেগু ঐতিহ্য আৰু ভাৰতীয় শিপাক লৈ গৌৰৱ প্ৰকাশ কৰা ধোৰাছু অন্তৰ্ভুক্ত থকা ফ্ৰান্স দলটোৱে সেইবাৰ ফাইনেলত ইটালীত হাতত পৰাস্ত হৈ ৰানাৰ্ছ-আপ খিতাপ অৰ্জন কৰিছিল ।

ভাৰতত ফৰাচী তাৰকাৰ জনপ্ৰিয়তা আৰু এমবাপেৰ নতুন ৰেকৰ্ড

ভাৰতত কেৱল ঘৰুৱা ফুটবলেই নহয়, বৰঞ্চ ইংলেণ্ডৰ প্ৰিমিয়াৰ লীগ, জাৰ্মানীৰ বুণ্ডেছলিগা, স্পেইনৰ লা লিগা আৰু ফ্ৰান্সৰ ‘লিগ ১’ৰ দৰে শীৰ্ষ পৰ্যায়ৰ লীগসমূহৰ লাখ লাখ অনুৰাগী আছে । ফ্ৰান্সৰ কিংবদন্তী খেলুৱৈ থিয়েৰী হেনৰী, জিনেদিন জিদান আৰু বৰ্তমানৰ ছুপাৰষ্টাৰ কিলিয়ান এমবাপে ভাৰতীয় ক্ৰীড়াপ্ৰেমীৰ মাজত অত্যন্ত জনপ্ৰিয় ।

লগতে পঢ়ক : নিস্তেজ ৰোনাল্ডোঃ ফেভাৰিট পৰ্তুগালক ৰোধিলে ডি আৰ কংগোৱে!