অসমৰ লগতে মেঘালয়ৰ বিভিন্ন প্ৰান্তত ধাৰাবাহিকভাৱে ধাৰাসাৰ বৰষুণ হৈ থকাৰ পৰিপ্ৰেক্ষিতত নীপকোৱে খুলি দিলে খাণ্ডং বান্ধৰ পানী।

অসমৰ ডিমা হাছাও জিলাৰ উমৰাংচুত থকা খাণ্ডং জলবিদ্যুৎ প্ৰকল্পৰ বান্ধৰ জলপৃষ্ঠ ধাৰাবাহিক বৰষুণৰ বাবে অস্বাভাৱিকভাৱে বৃদ্ধি পোৱাৰ পাছত বান্ধৰ গেটসমূহ খুলি দি উত্তৰ-পূব বৈদ্যুতিক শক্তি নিগম (NEEPCO)-এ এক বিশেষ সতৰ্কবাণী জাৰি কৰিছে।

এই সতৰ্কবাণী অনুসৰি, ডিমা হাছাও আৰু চুবুৰীয়া মেঘালয়ত ধাৰাবাহিকভাৱে হৈ থকা বৰষুণৰ ফলত বান্ধটোৰ জলপৃষ্ঠ যথেষ্ট বৃদ্ধি পাইছে, যাৰ বাবে কৰ্তৃপক্ষই সতৰ্কতামূলক ব্যৱস্থা হিচাপে জলাশয়ৰ পৰা পানী এৰি দিবলৈ বাধ্য হৈছে।

পৰিস্থিতিৰ প্ৰতি লক্ষ্য ৰাখি, NEEPCO-এ কপিলী নদীৰ অৱবাহিকাত অৱস্থিত এলেকাসমূহৰ জিলা প্ৰশাসন, দুৰ্যোগ প্ৰশমন কৰ্তৃপক্ষ আৰু জৰুৰীকালীন সঁহাৰি সংস্থাসমূহক আনুষ্ঠানিকভাৱে সতৰ্ক কৰি দিছে।

নিগমটোৱে সংশ্লিষ্ট কৰ্তৃপক্ষক সকলো প্ৰয়োজনীয় সতৰ্কতামূলক ব্যৱস্থা গ্ৰহণ কৰিবলৈ আৰু কপিলী নদীৰ কাষৰীয়া নামনি অঞ্চল তথা বসতিস্থলসমূহত বাস কৰা লোকসকলক সজাগ হৈ থাকিবলৈ আহ্বান জনাইছে।

বিষয়াসকলে সকীয়াই দিছে যে পানী এৰি দিয়াৰ ফলত নামনি অংশত নদীৰ জলপৃষ্ঠ বৃদ্ধি পাব পাৰে। সেইবাবে পৰিস্থিতিৰ উন্নতি নোহোৱালৈকে নদীৰ পাৰত বাস কৰা লোকসকলক নদীৰ কাষৰীয়া অঞ্চললৈ যোৱাৰ পৰা বিৰত থাকিবলৈ পৰামৰ্শ দিয়া হৈছে।

অসম আৰু মেঘালয়ৰ বিভিন্ন প্ৰান্তত ধাৰাবাহিকভাৱে ধাৰাসাৰ বৰষুণ হৈ থকাৰ পৰিপ্ৰেক্ষিতত কৰ্তৃপক্ষই সৰ্বসাধাৰণ ৰাইজক সুৰক্ষা ব্যৱস্থাসমূহত সহযোগিতা কৰিবলৈ আৰু চৰকাৰী নিৰ্দেশনাসমূহ মানি চলিবলৈ অনুৰোধ জনাইছে।

লগতে পঢ়ক: স্বস্তিৰ খবৰ… ঘৰুৱা গেছৰ নাটনিৰ মাজতে ভাৰত পালেহি ‘দিশা’