শান্তিৰ নোবেল বঁটা বিজয়ী নাৰ্গিছ মহম্মদীক ইৰাণত নতুন শাস্তি প্ৰদান কৰা হৈছে।নাৰ্গিছ মহম্মদীয়ে অনশন আৰম্ভ কৰাৰ পাছত তেওঁক অতিৰিক্ত ৭ বছৰৰ কাৰাদণ্ড বিহা হয়।

নাৰ্গিছ মহম্মদী ইৰাণৰ এগৰাকী বিশিষ্ট মানৱ অধিকাৰ কৰ্মী আৰু শান্তিৰ নোবেল বঁটা বিজয়ী মহিলা, যি ইৰাণত নাৰীৰ ওপৰত হোৱা অত্যাচাৰ আৰু ৰাজনৈতিক দমনৰ বিৰুদ্ধে প্ৰচাৰ চলোৱাৰ বাবে পৰিচিত।

সেই নাৰ্গিছ মহম্মদীক ইৰাণত ৭ বছৰৰ কাৰাদণ্ড বিহা হৈছে।যাৰ বাবে তেওঁ পুনৰবাৰ চৰ্চালৈ আহিছে। ২০২৩ চনত নাৰ্গিছ মহম্মদীয়ে শান্তিৰ নোবেল বঁটা লাভ কৰিছিল।

নাৰ্গিছ মহম্মদীৰ অধিবক্তাই এই শাস্তিৰ সন্দৰ্ভত জানিবলৈ দিয়াৰ পিছতেই ইৰাণী কৰ্তৃপক্ষৰ সৈতে দশকজুৰি চলি থকা তেওঁৰ যুদ্ধখন তীব্ৰতৰ হৈ পৰে।দৰাচলতে ইৰাণ চৰকাৰ আৰু নাৰ্গিছ মহম্মদীৰ মাজত বিগত কেইবা দশক ধৰি সংঘাত চলি আহিছে।

৫৩ বছৰীয়া অভিযন্তা আৰু লেখক নাৰ্গিছ মহম্মদী হিউমেন ৰাইটছ ডিফেণ্ডাৰছ চেণ্টাৰৰ উপ-সভাপতি আছিল,যাৰ প্ৰতিষ্ঠা নোবেল বঁটা বিজয়ী শ্বিৰিন এবাদীয়ে কৰিছিল।

নাৰ্গিছ মহম্মদীয়ে ইৰাণত মানৱ মৰ্যাদা আৰু নাৰীৰ অধিকাৰৰ বাবে চলি থকা সংগ্ৰামক প্ৰতিনিধিত্ব কৰে।তেওঁক ২০২৩ চনত ‘ইৰাণত নাৰীৰ ওপৰত কৰা অত্যাচাৰৰ বিৰুদ্ধে যুঁজ দিয়াৰ বাবে আৰু সকলোৰে বাবে মানৱ অধিকাৰ আৰু স্বাধীনতাক প্ৰসাৰিত কৰাৰ বাবে’ শান্তিৰ নোবেল বঁটাৰে সন্মানিত কৰিছিল।

নাৰ্গিছ মহম্মদীয়ে যোৱা দশকৰ বেছিভাগ সময় কাৰাগাৰত কটাবলগীয়া হৈছে ।তেহৰাণৰ ইভিন কাৰাগাৰত বন্দী হৈ থকাৰ সময়তে তেওঁৰ সন্তানসকলে অছল’ত তেওঁৰ হৈ এই বঁটা গ্ৰহণ কৰিছিল।

২০২৫ চনৰ ১২ ডিচেম্বৰত মছহাদত মানৱ অধিকাৰ অধিবক্তা খোছৰো আলিকোৰ্ডিৰ শোক সভাত অংশগ্ৰহণ কৰাৰ পিছতেই নাৰ্গিছ মহম্মদীক গ্ৰেপ্তাৰ কৰা হৈছিল।

নাৰ্গিছ মহম্মদীয়ে ‘উচটনিমূলক বক্তব্য’ দিয়াৰ লগতে সভাত উপস্থিত থকা লোকসকলক ‘নিয়ম উলংঘা কৰা শ্লোগান উত্থাপন’ আৰু ‘শান্তি বিঘ্নিত’ কৰিবলৈ উচটনি দিয়াৰ অভিযোগ উত্থাপন কৰা হৈছিল।নতুন শাস্তি ঘোষণাৰ দিনাই মহম্মদীয়ে এসপ্তাহজোৰা অনশন বন্ধ কৰি দিয়ে।

লগতে পঢ়ক: জাপানত পুনৰ ছানাই তাকাইচিৰ চৰকাৰ; নিৰ্বাচনত অভিলেখ ভংগকাৰী জয়