বুধবাৰে দিল্লীবাসীয়ে নিজৰ চৰকাৰ নিৰ্বাচন কৰিব । ১.৫৬ কোটি ভোটাৰে ৭০খন বিধানসভা আসনৰ বাবে ৬৯৯ গৰাকী প্ৰাৰ্থীৰ ভাগ্য নিৰ্ণয় কৰিব । ১৩,৭৬৬ টা ভোটকেন্দ্ৰত পুৱা ৭ বজাৰ পৰা সন্ধিয়া ৬ বজালৈ ভোটগ্ৰহণ হ’ব । ইয়াৰ বাবে দিল্লীৰ মুখ্য নিৰ্বাচনী বিষয়াৰ কাৰ্যালয়ে প্ৰস্তুতি সম্পূৰ্ণ কৰিছে । মঙলবাৰে বিয়লি ভোটগ্ৰহণ বিষয়াসকলে ই ভি এম লৈ ভোটকেন্দ্ৰসমূহত উপস্থিত হৈ দায়িত্ব লয় । সৰ্বনিম্ন সংখ্যক প্ৰাৰ্থী পেটেল নগৰ আৰু কস্তুৰবা নগৰত পাঁচজনকৈ প্ৰাৰ্থী হোৱাৰ বিপৰীতে নতুন দিল্লীৰ আসনত ২৩ জন প্ৰাৰ্থী আছে ।

২০ শতাংশ ই ভি এম জৰুৰীকালীন অৱস্থাৰ বাবে সংৰক্ষিত-

বিষয়াসকলৰ মতে, নিৰ্ধাৰিত সময় ৬ বজালৈকে যদি কোনো ব্যক্তি শাৰীত থিয় হয় তেন্তে ভোটদান কৰিব পাৰিব । ইয়াৰ বাবে অতিৰিক্ত সময়ো দিয়া হ’ব । এটা ই ভি এমত মাত্ৰ ১৬ জন প্ৰাৰ্থীৰ নিৰ্বাচনী চিহ্ন থাকিব পাৰে । যদিহে অধিক প্ৰাৰ্থী থাকে তেন্তে দ্বিতীয়টো ই ভি এম ৰখা হৈছে । জনকপুৰী আৰু নতুন দিল্লীৰ আসনৰ ভোটকেন্দ্ৰত ব্যৱহাৰ হ’ব দুটা ই ভি এম । বাকী ৬৮খন আসনৰ বাবে কেন্দ্ৰসমূহত এটাকৈ ই ভি এম থাকিব । প্ৰায় ২০ শতাংশ ই ভি এম জৰুৰীকালীন পৰিস্থিতিৰ বাবে সংৰক্ষিত কৰি ৰখা হৈছে, যাতে ই ভি এমত কোনো ধৰণৰ বিজুতি বা সমস্যাৰ সৃষ্টি হ’লে তৎক্ষণাত সলনি কৰিব পৰা যায় ।

ভোটাৰ আই ডি কাৰ্ড নাথাকিলেও দিব পাৰিব ভোট-

ভোট দিবলৈ হ’লে ভোটাৰ তালিকাত নাম থকাটো প্ৰয়োজনীয় । ভোটাৰ তালিকাত নাম থাকিলে ভোটাৰ আই ডি কাৰ্ড নাথাকিলেও ভোট দিব পাৰিব । নিৰ্বাচন আয়োগে আন ১২ খন নথি-পত্ৰ আৰু প্ৰমাণপত্ৰক পৰিচয় পত্ৰ হিচাপে ভোটদানৰ বাবে ব্যৱহাৰ কৰিবলৈ অনুমোদন জনাইছে । এই নথিসমূহৰ যিকোনো এটাক পৰিচয় পত্ৰ হিচাপে ব্যৱহাৰ কৰি ভোটদান কৰিব পাৰি ।

কাইলৈ ​​ৰাজহুৱা বন্ধ-

দিল্লী চৰকাৰে বুধবাৰক চৰকাৰী বন্ধ ঘোষণা কৰিছে । সোমবাৰে চৰকাৰৰ সাধাৰণ প্ৰশাসন বিভাগে ৰাজহুৱা ঘোষণা কৰি এক নিৰ্দেশ জাৰি কৰিছে । চৰকাৰী বিভাগ, স্থানীয় সংস্থা, ৰাজহুৱা খণ্ডৰ কোম্পানীকে ধৰি সকলো কাৰ্যালয়তে কৰ্মচাৰীৰ বাবে বন্ধ থাকিব, যাতে কৰ্মচাৰীসকলে ভোটদান কৰিব পাৰে ।

ভোটাৰৰ সংখ্যা…

মুঠ ভোটাৰ : ১৫৬১৪০০০

পুৰুষ : ৮৩৭৬১৭৩

মহিলা : ৭২৩৬৫৬০

অন্যান্য : ১২৬৭

সোমবাৰে (৩ ফেব্ৰুৱাৰী) সন্ধিয়া ৬ বজাত দিল্লী বিধানসভা নিৰ্বাচনৰ নিৰ্বাচনী প্ৰচাৰ সমাপ্ত হয় । ৫ ফেব্ৰুৱাৰীত ভোটগ্ৰহণ হ’ব আৰু ৮ ফেব্ৰুৱাৰীত ফলাফল ঘোষণা কৰা হ’ব । নিৰ্বাচনী প্ৰচাৰৰ অন্তিম দিনা ৰাজনৈতিক দলৰ ডাঙৰ ডাঙৰ নেতাসকলে জনসাধাৰণৰক আকৰ্ষিত কৰিবলৈ চেষ্টা কৰে । ৫ ফেব্ৰুৱাৰীত দিল্লীৰ ১.৫৬ কোটি ভোটাৰে নিজৰ ভোটাধিকাৰ সাব্যস্ত কৰিব ।

এগজিট প’লৰ ওপৰত নিষেধাজ্ঞা কেতিয়ালৈ ?

ইয়াৰ পূৰ্বে নিৰ্বাচন আয়োগে ৫ ফেব্ৰুৱাৰীৰ পুৱা ৭ বজাৰ পৰা সন্ধিয়া ৬:৩০ বজালৈ এগজিট প’ল নিষিদ্ধ কৰিছিল । এই সন্দৰ্ভত দিল্লীৰ মুখ্য নিৰ্বাচনী বিষয়াৰ কাৰ্যালয়েও এক নিৰ্দেশ জাৰি কৰিছে । নিৰ্বাচন আয়োগে নিজৰ আদেশত সৰ্বসাধাৰণ ৰাইজৰ বিশেষকৈ নিউজ ব্যুৰো, মিডিয়া হাউচ, ৰেডিঅ’ আৰু টেলিভিছন চেনেল আদিৰ মনোযোগ ভাৰতীয় নিৰ্বাচন আয়োগৰ নং ৫৭৬/এগজিট /২০২৫/এছডিআৰ/পাৰ্ট-১ৰ অধিসূচনাত দিবলৈ জনোৱা হৈছে বুলি জানিবলৈ দিয়ে । ইয়াৰ দ্বাৰা এগজিট প’ল, অ’পিনিয়ন প’ল বা অন্য কোনো নিৰ্বাচনী সমীক্ষাৰ ফলাফল ছপা বা ইলেক্ট্ৰনিক মিডিয়াত বা অন্য কোনো ধৰণে প্ৰকাশ কৰাটো নিষিদ্ধ কৰা হৈছে ।

ভোটদানৰ বাবে ১৩ হাজাৰ ৭৬৬টা ভোটকেন্দ্ৰ-

দিল্লীৰ মুখ্য নিৰ্বাচনী বিষয়াৰ তথ্য অনুসৰি দিল্লীত ভোটগ্ৰহণৰ বাবে ১৩ হাজাৰ ৭৬৬টা ভোটগ্ৰহণ কেন্দ্ৰ সাজু কৰা হৈছে । ৮৩.৭৬ লাখ পুৰুষ, ৭২.৩৬ লাখ মহিলা আৰু ১২৬৭ গৰাকী তৃতীয় লিংগৰ ভোটাৰ আছে । বিশেষভাৱে সক্ষম লোকৰ বাবে সংৰক্ষিত হৈছে ৭৩৩টা ভোটগ্ৰহণ কেন্দ্ৰ ।

ঘৰৰ পৰাই ভোটদান কৰিলে ৬৯৮০ জন লোকে-

জ্যেষ্ঠ নাগৰিক আৰু বিশেষভাৱে সক্ষম লোকৰ বাবে ঘৰৰ পৰাই ভোটদানৰ সুবিধাৰ অধীনত ৭৫৫৩ জন যোগ্য ভোটাৰৰ ভিতৰত ইতিমধ্যে ৬৯৮০ জন লোকে ভোটদান কৰিছে । ২৪ জানুৱাৰীৰ পৰা ঘৰৰ পৰা ভোটদানৰ সুবিধা আৰম্ভ হৈছে আৰু ই ৪ ফেব্ৰুৱাৰীলৈকে চলিব ।

আচৰণ বিধি উলংঘাৰ ১০০০ৰো অধিক গোচৰ পঞ্জীয়ন-

৭ জানুৱাৰীৰ পৰা আচৰণ বিধি বলবৎ হোৱাৰ পিছত আচৰণ বিধি উলংঘা কৰাৰ অভিযোগত ১০০০ৰো অধিক গোচৰ ৰুজু কৰা হৈছে ।

দিল্লীত নিয়োজিত অৰ্ধসামৰিক বাহিনীৰ ২২০টা কোম্পানী-

দিল্লীত অৰ্ধসামৰিক বাহিনীৰ ২২০টা কোম্পানী নিয়োগ কৰিছে নিৰ্বাচন আয়োগে । ১৯ হাজাৰ হোমগাৰ্ড আৰু ৩৫ হাজাৰ ৬২৬ দিল্লী আৰক্ষী জোৱানকো মোতায়েন কৰা হৈছে ।

আজি ৭৬ সংখ্যক গণৰাজ্য দিৱস। সমগ্ৰ দেশৰ প্ৰান্তে প্ৰান্তে পালন কৰা হৈছে গণৰাজ্য দিৱস । দিল্লীত কৰ্তব্য পথত গণৰাজ্য দিৱসত প্ৰদৰ্শিত হ’ব দেশৰ প্ৰতীৰক্ষা, সুৰক্ষা আদি ক্ষেত্ৰৰে জড়িত সেনাকে ধৰি আন আন সুৰক্ষা বিভাগ সমূহৰ লগতে বিভিন্ন ৰাজ্য, কেন্দ্ৰীয় শাসিত অঞ্চলৰ প্ৰতীকপট ।

১৯৫০ চনৰ আজিৰ দিনটোতে বিশ্বৰ সৰ্ববৃহৎ গণতান্ত্ৰিক দেশ ভাৰতৰ সংবিধান কাৰ্যকৰী কৰা হৈছিল । এই উপলক্ষে দিল্লীত আয়োজিত ৰাষ্ট্ৰীয় গণৰাজ্য দিৱসৰ উপলক্ষে কৰ্তব্য পথত ৰাষ্ট্ৰীয় পতাকা উৰুৱাব দেশৰ ৰাষ্ট্ৰপতি দ্ৰৌপদী মুৰ্মুৱে ।

আজি পুৱা ১০:৩০ বজাৰ পৰা দিল্লীত আৰম্ভ হ’ব গণৰাজ্য দিৱসৰ পেৰেড আৰু অনুষ্ঠিত হ’ব প্ৰায় ৯০ মিনিটৰ এক বৰ্ণাঢ্য অনুষ্ঠান।গণতন্ত্ৰ দিৱসৰ এইবাৰৰ মুখ্য অতিথি হিচাপে উপস্থিত থাকিব ইণ্ডোনেছিয়াৰ ৰাষ্ট্ৰপতি প্ৰবোও চুবিয়েন্টো ।

প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰীয় যুদ্ধ স্মাৰকত শ্বহীদসকলক শ্ৰদ্ধাঞ্জলি জ্ঞাপন কৰিব, তাৰ পিছত তেওঁ কৰ্তব্য পথত পেৰেড চাবলৈ উপস্থিত হ’ব।

ইয়াৰ পিছত পৰম্পৰা অনুসৰি জাতীয় পতাকা উত্তোলন কৰা হ’ব আৰু তাৰ পিছত ৰাষ্ট্ৰীয় সংগীত আৰু তাৰ পিছত ২১ জাঁট টোপধ্বনি প্ৰদৰ্শন কৰা হ’ব।

উল্লেখ্য যে এই দিনটোতে ১৯৫০ চনত ভাৰতৰ সংবিধান গৃহীত হৈছিল আৰু ভাৰত এখন সার্বভৌমত্ব ৰাষ্ট্ৰ হিচাপে প্ৰতিষ্ঠিত হৈছিল।

মহাত্মা গান্ধীৰ দৰে অসংখ্য স্বাধীনতা সংগ্ৰামীৰ অধ্যৱসায়, কঠোৰ পৰিশ্ৰম আৰু ত্যাগৰ ফলত এইয়া সম্ভৱ হৈ উঠিছিল।

তেতিয়াৰে পৰা জানুৱাৰীৰ ২৬ দিনটোক ভাৰতৰ গণতন্ত্ৰ দিৱস বা গণৰাজ্য দিৱস হিচাপে স্বীকৃতি দি উদযাপন কৰি আহিছে।

সমগ্ৰ দেশৰ লগতে আজি অসমৰো প্ৰান্তে প্ৰান্তে গণৰাজ্য দিৱস পালন কৰা হৈছে। মহানগৰীৰ খানাপাৰাৰ পশু চিকিৎসা মহাবিদ্যালয়ৰ খেলপথাৰত পালন কৰা হৈছে গণৰাজ্য দিৱস।