বিহু প্ৰদৰ্শনৰ বাবে গৈ থকা অৱস্থাতে ভয়ংকৰ দুৰ্ঘটনা; নিহত এগৰাকী বিহুৱতী
নিশা বিহু অনুষ্ঠানৰ বাবে ঘৰৰ পৰা ওলাই যোৱা নিশামণি হালৈৱে মঞ্চত নাপালে নাচিবলৈ। বিহু প্ৰদৰ্শনৰ বাবে গৈ থকা অৱস্থাতে পথ দুৰ্ঘটনাত হেৰুৱালে প্ৰাণ।
তামুলপুৰ-নাগ্ৰীজুলী পথৰ নোৱাখাটত নিশা এক শোকাৱহ পথ দুৰ্ঘটনা সংঘটিত হয়। নলবাৰীৰ হাৰিভাঙাৰ ‘ভাস্কৰজ্যোতি বিহু হুঁচৰি দল’টোৱে এখন ট্ৰেভেলাৰ বাহনেৰে তামুলপুৰৰ বাঙালীপাৰলৈ বিহু প্ৰদৰ্শনৰ বাবে গৈ থকা অৱস্থাতে বিপৰীত দিশৰ পৰা অহা PB 03 AP 6681 নম্বৰৰ এখন দ্ৰুতবেগী ট্ৰেইলাৰৰ সৈতে মুখামুখী সংঘৰ্ষ হোৱাৰ ফলতে এই শোকাৱহ দুৰ্ঘটনাটো ঘটে।
এই মৰ্মান্তিক দুৰ্ঘটনাত দলটোৰ নিশামণি হালৈ নামৰ এগৰাকী ২৫ বছৰীয়া নাচনীৰ থিতাতে মৃত্যু হোৱাৰ লগতে আন ১১ গৰাকী বিহুৱা-বিহুৱতী গুৰুতৰভাৱে আহত হয়। নিহত নিশামণি হালৈৰ ঘৰ তামুলপুৰ জিলাৰ নিজ ঝাৰগাঁওত বুলি জানিব পৰা গৈছে। নিহত নিশামণি হালৈ নাগাৰা নামৰ এগৰাকী পাঠকো আছিল।
উল্লেখযোগ্য যে AS-25-DC-5893 নম্বৰৰ ট্ৰেভেলাৰখনত মুঠ ৩০ জনীয়া বিহু দলটো আছিল। দুৰ্ঘটনাটোত অৰুণ মেধি, বিদ্যুৎ দাস, জগত ৰায়, চালক পংকজ বৈশ্য, অংকিতা দাস, ৰতন কলিতা, নিতু বৰুৱা, শিৱানী বৰুৱা, কাব্যশ্ৰী চাৰুৱা আৰু দিবাকৰ মৰাণ আহত হোৱাৰ লগতে ৫ জনৰ অৱস্থা অতি সংকটজনক বুলি জানিব পৰা গৈছে। আহত সকলক চিকিৎসালয়ত ভৰ্তি কৰোৱা হৈছে। বিহুৰ আনন্দৰ উল্লাসৰ মাজতে সংঘটিত এই কৰুণ ঘটনাই সমগ্ৰ অঞ্চলটোতে শোকৰ ছাঁ পেলাইছে।