ভাৰতৰ তাৰকা শ্বাটলাৰ ছাইনা নেহৱালে এক কঠোৰ সিদ্ধান্তৰ কথা ঘোষণা কৰি সকলোকে আচৰিত কৰিছে । তেওঁ লোৱা এই নীৰৱ সিদ্ধান্তই বিস্মিত কৰিছে ক্ৰীড়া জগতক…

নিজৰ জীৱন তথা কেৰিয়াৰক লৈ এক কঠোৰ সিদ্ধান্ত গ্ৰহণ কৰিছে ভাৰতৰ তাৰকা শ্বাটলাৰ ছাইনা নেহৱালে । তেওঁৰ এই সিদ্ধন্তই আচৰিত কৰি তুলিছে সকলোকে । মাত্ৰ ৩৫ বছৰ বয়সতে বেডমিন্টনৰ পৰা সন্যাস লোৱাৰ কথা ঘোষণা কৰিছে ছাইনা নেহৱালে । দীৰ্ঘ সময় ধৰি ভোগি অহা আঘাতৰ গুৰুতৰ সমস্যা আৰু সুস্থ নোহোৱাৰ অৱস্থাই খেলুৱৈগৰাকীক এই সিদ্ধান্ত ল’বলৈ বাধ্য কৰে বুলি উল্লেখ কৰিছে তেওঁ । ছ’চিয়েল মিডিয়াৰ পৰিৱৰ্তে এটা প’ডকাষ্টত ছাইনাই কয় যে আঁঠুৰ গুৰুতৰ আঘাতৰ বাবে এতিয়া উচ্চ পৰ্যায়ৰ প্ৰশিক্ষণ সম্ভৱ নহয় ।

ছাইনা নেহৱালৰ এই ঘোষণাই ভাৰতীয় বেডমিণ্টনৰ আখ্যান সলনি কৰা এটা অধ্যায়ৰ অন্ত পেলায় । ২১ বছৰীয়া কেৰিয়াৰত ছাইনাই অলিম্পিকৰ পদক, বিশ্ব চেম্পিয়নশ্বিপৰ প’ডিয়াম, বিশ্বৰ ১ নং ৰেংকিং আৰু ১০টা ছুপাৰ ছিৰিজৰ খিতাপ লাভ কৰিছিল । এই সকলোবোৰ কৃতিত্ব পূৰ্বে ভাৰতীয় খেলুৱৈৰ বাবে বিৰল আছিল ।

কেইবামাহো ধৰি আন্তঃৰাষ্ট্ৰীয় চাৰ্কিটৰ পৰা আঁতৰি থকাৰ পিছত ছাইনা নেহৱালে অৱসৰৰ কথা ঘোষণা কৰিছে । ২০২৩ চনত ছিংগাপুৰ অ’পেন তেওঁৰ শেষ প্ৰতিযোগিতামূলক অংশগ্ৰহণ আছিল । ইয়াৰ পিছত বাৰম্বাৰ আঘাত আৰু অস্ত্ৰোপচাৰৰ পৰামৰ্শই তেওঁৰ পুনৰ প্ৰত্যাৱৰ্তনৰ সম্ভাৱনাত কাৰ্যতঃ চেঁচা পানী ঢালিছিল ।

ইফালে ছাইনাই এই সিদ্ধান্ত কোনো ডাঙৰ প্লেটফৰ্ম, সংবাদমেল, বা ছ’চিয়েল মিডিয়া পোষ্টৰ জৰিয়তে ঘোষণা কৰা নাই । এয়া কিংবদন্তিসকলে প্ৰায়ে লাভ কৰা ধৰণৰ নাটকীয় বিদায় নাছিল । বৰঞ্চ ই আছিল এক নীৰৱ সিদ্ধান্ত, যিদৰে ছাইনাই নিজৰ কেৰিয়াৰৰ বেছিভাগ সময়  বক্তব্যৰ জৰিয়তে নহয়, খেলৰ জৰিয়তে নিজকে প্ৰমাণ কৰিছে ।

প’ডকাষ্টত ছাইনা নেহৱালে স্বীকাৰ কৰে যে তেওঁৰ শৰীৰ বেডমিন্টনলৈ ঘূৰি আহিব পৰাকৈ ফিট হয় নে নহয় সেয়া নিৰ্ণয় কৰিবলৈ কেইবামাহো ধৰি চেষ্টা কৰিছিল । কিন্তু আঁঠুৰ গুৰুতৰ অৱস্থা আৰু ধাৰাবাহিক বিষে এই প্ৰচেষ্টা অসম্ভৱ কৰি তুলিছিল । তেওঁ কয়, “মই সদায় আঘাতৰ বিৰুদ্ধে যুঁজি প্ৰত্যাৱৰ্তন কৰি আহিছো, কিন্তু এইবাৰ মোৰ শৰীৰে মোক স্পষ্ট সংকেত দিলে ।”

লগতে পঢ়ক : ‘ভাৰতত বিশ্বকাপ খেলক নহ’লে বাহিৰত থাকক’!; বাংলাদেশক আইচিচিয়ে দিলে চূড়ান্ত সতৰ্কবাণী