১০ দিনৰ অন্তত অৱশেষত ৰাজস্থানৰ আলৱাৰৰ কোটপুটলীত আৱদ্ধ হৈ থকা তিনি বছৰীয়া চেতনাক বোৰৱেলৰ পৰা উদ্ধাৰ কৰা হয়।

শিশুটিক ১৭০ ফুট গভীৰ সুৰংগৰ পৰা বাহিৰলৈ উলিয়াই আনি চিকিৎসালয়ত ভৰ্তি কৰোৱা হৈছিল।য’ত চিকিৎসকে তেওঁক মৃত বুলি ঘোষণা কৰিছিল।

উল্লেখ্য যে ২৩ ডিচেম্বৰৰ দিনা দুপৰীয়া প্ৰায় ১:৩০ বজাত খেলি থাকোতে অৱস্তাতে এটা বোৰৱেলত পৰি গৈছিল ৩ বছৰীয়া চেতনা । এই বাতৰি পোৱাৰ লগে লগে সমগ্ৰ অঞ্চলটোত এক উদ্বেগৰ পৰিৱেশ সৃষ্টি হৈছিল।

শিশুটিক প্ৰথমে ১৫০ ফুট গভীৰ গাঁতটোৰ পৰা ৩০ ফুট ওপৰলৈ লৈ অনা হৈছিল, কিন্তু তাৰ পিছত  তাতেই আবদ্ধ হৈ পৰিছিল চেতনা। এই পদক্ষেপে আশা জাগ্ৰত কৰিছিল, কিন্তু ইয়াৰ পিছত প্ৰত্যাহ্বানটো বাকী আছিল।

পাইলিং মেচিনেৰে উদ্ধাৰ কাৰ্য্য আৰম্ভ কৰাৰ পূৰ্বে, জেচিবিৰ সহায়ত খননৰ কাম আৰম্ভ কৰা হৈছিল।উদ্ধাৰকাৰী দলটোৱে গাঁতটোত সোমাই থকা চেতনাক নিৰন্তৰ অক্সিজেন প্ৰদান কৰিছিল। 

উত্তৰাখণ্ডৰ পৰা এটা বিশেষ দল মাতি অনা হৈছিল, যাৰ পিছত এটা পাইলিং মেচিনেৰে নিৰন্তৰ খনন কৰা হৈছিল।  এই সময়ছোৱাত, মাজে মাজে হোৱা বৰষুণৰ বাবে উদ্ধাৰ কাৰ্যত যথেষ্ট অসুবিধা হৈছিল।

কিন্তু ১০ টা দিনৰ বহু কষ্টৰ পিছটো জীৱিত অৱস্থাত উদ্ধাৰ কৰিব পৰা নগ’ল কণমানি চেতনাক।চেতনাক হেৰুৱাই শোকত ভাগি পৰিছে পৰিয়ালবৰ্গ।