ইতিহাস সৃষ্টিলৈ আৰু এটা খোজ… সফলতাৰে সম্পন্ন গগণযানৰ দ্বিতীয়টো এয়াৰ ড্ৰপ টেষ্ট
ভাৰতীয় মহাকাশ গৱেষণা সংস্থাই দেশৰ অভিলাষী গগণযান অভিযানৰ বাবে দ্বিতীয়টো ইণ্টিগ্ৰেটেড এয়াৰ ড্ৰপ টেষ্ট সফলতাৰে সম্পন্ন কৰিছে
কেন্দ্ৰীয় মন্ত্ৰী জিতেন্দ্ৰ সিঙে শুকুৰবাৰে ভাৰতীয় মহাকাশ গৱেষণা সংস্থা চমুকৈ ইছৰোৱে দেশৰ অভিলাষী ‘গগণযান’ অভিযানৰ বাবে দ্বিতীয়টো ইণ্টিগ্ৰেটেড এয়াৰ ড্ৰপ টেষ্ট (IADT-02) সফলতাৰে সম্পন্ন কৰাৰ বাবে অভিনন্দন জ্ঞাপন কৰে । এই সফলতা অহা বছৰত হ’বলগীয়া ভাৰতৰ প্ৰথমটো মানৱ মহাকাশ যাত্ৰাৰ দিশত এক গুৰুত্বপূৰ্ণ পদক্ষেপ হিচাপে বিবেচিত হৈছে ।
এক্সৰ এটা পোষ্টত মন্ত্ৰী সিঙে কয়, “গগণযানৰ দ্বিতীয়টো ইণ্টিগ্ৰেটেড এয়াৰ ড্ৰপ টেষ্ট (IADT-02) সফলতাৰে সম্পন্ন কৰাৰ বাবে ISRO-ক অভিনন্দন । শ্ৰীহৰিকোটাৰ সতীশ ধাৱান মহাকাশ কেন্দ্ৰত এই পৰীক্ষণ সফলতাৰে সম্পন্ন কৰা হয় । ই গগণযান অভিযানৰ প্ৰস্তুতিৰ ক্ষেত্ৰত এক গুৰুত্বপূৰ্ণ মাইলৰ খুঁটি হিচাপে চিহ্নিত হৈছে ।”
২০২৫ চনৰ ২৪ আগষ্টত সতীশ ধাৱান মহাকাশ কেন্দ্ৰত সম্পন্ন হোৱা প্ৰথমটো পৰীক্ষণৰ (IADT-01) পাছতে এই দ্বিতীয়টো পৰীক্ষণ কৰা হয় । পূৰ্বৰ পৰীক্ষণটোৱে গগণযান অভিযানৰ ক্ৰু মডিউলৰ বাবে ডিজাইন কৰা পেৰাচুট-আধাৰিত অৱতৰণ প্ৰণালীৰ সামগ্ৰিক কাৰ্যক্ষমতা প্ৰদৰ্শন কৰিছিল ।
ইছৰোৰ মতে, গগণযান অভিযান হৈছে দেশৰ প্ৰথমটো মানৱ মহাকাশ কাৰ্যসূচী । ইয়াৰ উদ্দেশ্য হৈছে তিনিজনীয়া এটা দলক ৪০০ কিলোমিটাৰ কক্ষপথলৈ তিনিদিনীয়া অভিযানৰ বাবে প্ৰেৰণ কৰি তেওঁলোকক নিৰাপদে পৃথিৱীলৈ ওভতাই অনাৰ থলুৱা সামৰ্থ্য প্ৰদৰ্শন কৰা । এই অভিযানৰ বাবে মানৱ-উপযোগী LVM3 উৎক্ষেপণ যান ব্যৱহাৰ কৰা হ’ব ।
অৱতৰণৰ চূড়ান্ত পৰ্যায়ত পেৰাচুট-আধাৰিত এই প্ৰণালীটোৱে গুৰুত্বপূৰ্ণ ভূমিকা পালন কৰে । ই ক্ৰু মডিউলটোৰ গতিবেগ নিয়ন্ত্ৰণ কৰি সাগৰত ইয়াৰ নিৰাপদ অৱতৰণ নিশ্চিত কৰে । এই প্ৰণালীটোত এপেক্স কভাৰ চেপাৰেচন পেৰাচুট, ড্ৰ’গ পেৰাচুট, পাইলট পেৰাচুট আৰু মেইন পেৰাচুটসহ একাধিক পেৰাচুট থাকে, যিবোৰ এক নিৰ্দিষ্ট ক্ৰমত খোল খায় ।
IADT-01-ৰ সময়ত ভাৰতীয় বায়ুসেনাৰ চিনুক হেলিকপ্টাৰ ব্যৱহাৰ কৰি প্ৰায় ৩ কিলোমিটাৰ উচ্চতাৰ পৰা প্ৰায় ৪.৮ টন ওজনৰ এটা কৃত্ৰিম ক্ৰু মডিউল পেলাই দিয়া হৈছিল । এই পৰীক্ষণত পেৰাচুটসমূহৰ সক্ৰিয়তা আৰু কাৰ্যক্ষমতা সফলভাবে প্ৰমাণিত হৈছিল, যিয়ে মডিউলটোৰ স্পৰ্শকালীন গতিবেগ প্ৰতি ছেকেণ্ডত প্ৰায় ৮ মিটাৰলৈ হ্ৰাস কৰিছিল ।
ইয়াৰ লগতে উৎক্ষেপণ স্থলীত হ’ব পৰা যিকোনো আকস্মিক বিফলতাৰ পৰিস্থিতিকো এই পৰীক্ষণত অনুকৰণ কৰা হৈছিল । অৱতৰণৰ পিছত নৌসেনাৰ দলে মডিউলটো উদ্ধাৰ কৰে । গগণযান কাৰ্যসূচীত DRDO, ভাৰতীয় বায়ুসেনা, ভাৰতীয় নৌসেনা আৰু উপকূলৰক্ষী বাহিনীসহ একাধিক সংস্থাই সহযোগিতা আগবঢ়াইছে । বিভিন্ন পৰিস্থিতিত প্ৰণালীটোৰ কাৰ্যক্ষমতা অধিক পৰীক্ষা কৰিবলৈ আগন্তুক সময়ত এনেধৰণৰ আৰু অধিক পৰীক্ষণৰ পৰিকল্পনা কৰা হৈছে ।
লগতে পঢ়ক : ঐতিহাসিক যাত্ৰাৰ অন্তিম পৰ্যায়ত নাছাৰ আৰ্টেমিছ-২ অভিযান