ভাৰতীয় উইকেটকীপাৰ বেটছমেন ঈশান কিষণে আই পি এল ২০২৫ৰ দলৰ প্ৰথমখন মেচত বিস্ফোৰক বেটিং কৰি শতক অৰ্জন কৰে । আই পি এলত এয়া তেওঁৰ প্ৰথমটো শতক । ছানৰাইজাৰ্ছ হায়দৰাবাদৰ হৈ খেলা ঈশান কিষণে ৰাজস্থান ৰয়েলছৰ বিৰুদ্ধে মাত্ৰ ৪৫টা বলত এই শতক সম্পূৰ্ণ কৰে । তেওঁ ৰাজস্থানৰ প্ৰতিজন বলাৰক নিৰ্দয় প্ৰহাৰ কৰি এই শতক অৰ্জন কৰে । উল্লেখ্য যে এইখন আছিল ছানৰাইজাৰ্ছ হায়দৰাবাদৰ হৈ ঈশান কিষণৰ অভিষেক মেচ । ঈশানে ৪৭টা বলত ১০৬ ৰানৰ অপৰাজিত ইনিংছ খেলে ।

১১টা চাৰি, ৬টা ছয় আৰু ১০৬ ৰানৰ অপৰাজিত ইনিংছ-

তিনি নম্বৰত বেটিং কৰিবলৈ আহি ঈশান কিষণে প্ৰথম বলৰ পৰাই মাৰমুখী বেটিং কৰে । প্ৰথমে ধুমুহাময় ৰূপত তেওঁ অৰ্ধ শতক সম্পূৰ্ণ কৰে । শতকৰ ওচৰ চাপি অহাৰ লগে লগে সন্দীপ শৰ্মাৰ একেৰাহে দুটা বলত ঈশানে ছয় আৰু তাৰ পিছত ২ ৰান সংগ্ৰহ কৰি আই পি এলৰ ইতিহাসত প্ৰথমটো শতক অৰ্জন কৰে । ১০৬ ৰানৰ বিস্ফোৰক ইনিংছ খেলি অপৰাজিত হৈ থাকে ঈশান । এই ইনিংছত ঈশানে ১১টা চাৰি আৰু ৬টা ছয় কোবাই । ইয়াৰ পূৰ্বে আই পি এলত তেওঁৰ সৰ্বোচ্চ স্ক’ৰ আছিল ৯৯ ৰান ।

ঈশান কিষানৰ বিস্ফোৰক শতক-

ঈশান কিষণে আকৌ এবাৰ প্ৰমাণ কৰিলে যে তেওঁ কেনেধৰণৰ বেটছমেন । টিম ইণ্ডিয়াৰ বাহিৰত থকা এইগৰাকী বেটছমেনে আই পি এল ২০২৫ৰ প্ৰথমখন মেচতে উজ্জ্বল বেটিং কৰি বলাৰসকলক ব্যতিব্যস্ত কৰি তোলে । একেৰাহে কেইবাটাও ছিজন মুম্বাই ইণ্ডিয়ানছৰ হৈ খেলা ঈশান কিষণক আই পি এল ২০২৫ৰ মেগা নিলামৰ পূৰ্বে মুকলি কৰি দিছিল এম আই ফ্ৰেঞ্চাইজিয়ে । নিলামত ডাঙৰ বাজি খেলি এছ আৰ এইচে ১১.২৫ কোটি টকাত এই বিস্ফোৰক বেটছমেনজনক ক্ৰয় কৰে আৰু ঈশানে প্ৰথমখন মেচতে শতক অৰ্জন কৰি নিজৰ উদ্দেশ্য স্পষ্ট কৰি দিলে ।

কলকাতা নাইট ৰাইডাৰ্ছক ৭ উইকেটত পৰাস্ত কৰি জয়েৰে আই পি এল ২০২৫ৰ অভিযান আৰম্ভ কৰিছে আৰ চি বিয়ে । কলকাতাৰ ইডেন গাৰ্ডেনছত খেলা এই মেচখনত কে কে আৰে প্ৰথমে বেটিং কৰি ১৭৪ ৰান সংগ্ৰহ কৰে । ইয়াৰ প্ৰত্যুত্তৰত বেংগালুৰু দলে ৭ উইকেট বাকী থকা অৱস্থাত বিজয় লক্ষ্যত উপনীত হয় । বিৰাট কোহলী আৰু ফিল ছল্ট আৰ চি বিৰ জয়ৰ নায়ক হিচাপে পৰিগণিত হয় । বলিঙত ক্ৰুনাল পাণ্ডিয়াই বেংগালুৰুৰ হৈ খেলখন আৰ চি বিৰ হাতলৈ ঘূৰাই আনে ।

বিৰাট কোহলী আৰু ফিল ছল্টৰ বিস্ফোৰক বেটিং-

বিৰাট কোহলী আই পি এল ২০২৪ৰ অৰেঞ্জ কেপ বিজয়ী আছিল, আই পি এল ২০২৫তো তেওঁ শক্তিশালীভাৱে আৰম্ভ কৰিছে । প্ৰথমখন মেচতে তেওঁ ৩৬টা বলত ৫৯ ৰানৰ সুপৰিকল্পিত ইনিংছ খেলে । ফিল ছল্টৰ সৈতে তেওঁ ৯৫ ৰানৰ অংশীদাৰিত্ব গঢ়ে । ৩১ বলত ৫৬ ৰানৰ ধুমুহাময় ইনিংছেৰে আৰ চি বিক এক সুন্দৰ আৰম্ভণি দিয়ে ছল্ট । দৰাচলতে দুয়োজনে একেলগে পাৱাৰ প্লে’তেই বেংগালুৰু দলৰ স্ক’ৰ ৮০ ৰানলৈ লৈ যায় ।

আৰ চি বিৰ অধিনায়ক ৰজত পাটিদাৰেও ১৬টা বলত ৩৪ ৰান সংগ্ৰহ কৰি নিজৰ দলৰ জয়ত ডাঙৰ অৱদান আগবঢ়াই । শেষত লিয়াম লিভিংষ্টনে স্পেন্সৰ জনছনৰ বলত আৰ চি বিৰ বাবে বিজয়ী শ্বটটো মাৰে ।

কে কে আৰৰ বিৰুদ্ধে বিৰাটে সম্পূৰ্ণ কৰে ১০০০ ৰাণ-

কে কে আৰৰ বিৰুদ্ধে বিৰাট কোহলীয়ে ১০০০ ৰান সম্পূৰ্ণ কৰিছে । কলকাতা নাইট ৰাইডাৰ্ছৰ বিৰুদ্ধে ৩৩ সংখ্যক ইনিংছত তেওঁ এই কৃতিত্ব অৰ্জন কৰে । উল্লেখ্য যে আই পি এলত এটা দলৰ বিৰুদ্ধে সৰ্বাধিক ৰান সংগ্ৰহৰ অভিলেখ বৰ্তমান ডেভিদ ৱাৰ্নাৰৰ হাতত আছে, যিয়ে পঞ্জাব কিংছৰ বিৰুদ্ধে ১১৩৪ ৰান সংগ্ৰহ কৰিছে ।

শনিবাৰৰ পৰা আৰম্ভ হ’ব বিশ্বৰ সৰ্ববৃহৎ টি-২০ লীগ আই পি এল । এতিয়া ৬৫ দিনীয়া এই ক্ৰিকেট উৎসৱত চাৰি-ছয়ৰ বৰষুণ হ’ব আৰু দৰ্শকৰ পৰা হ’ব হৰ্ষোল্লাস । শনিবাৰে কলকাতাৰ ইডেন গাৰ্ডেনত অনুষ্ঠিত হ’ব লীগৰ ১৮ সংখ্যক ছিজনৰ প্ৰথমখন মেচ । ডিফেণ্ডিং চেম্পিয়ন কলকাতা নাইট ৰাইডাৰ্ছ আৰু ৰয়েল চেলেঞ্জাৰ্ছ বেংগালুৰুৰ মাজত এই মেচ অনুষ্ঠিত হ’ব । এই সংস্কৰণত পুৰণি তাৰকাসকলে নিজৰ শক্তি প্ৰদৰ্শন কৰিবলৈ চেষ্টা কৰিব, আনহাতে একাংশ যুৱ খেলুৱৈয়েও নিজৰ প্ৰতিভা আৰু প্ৰদৰ্শনেৰে জাতীয় দলৰ বাবে নিজকে দাবী কৰাৰ চেষ্টা কৰিব । এতিয়া ১০টা দলৰ মাজত হ’বলগীয়া মহা যুদ্ধৰ বাবে সাজু হৈছে ক্ৰিকেট প্ৰেমী । ১৩খন ষ্টেডিয়ামত ৭৪খন খেলৰ অন্তত ২৫ মে’ত নতুন বিজয়ীৰ সিদ্ধান্ত লোৱা হ’ব ।

কলকাতা আৰু বেংগালুৰুৰ মাজত প্ৰথমখন মেচ-

এইবাৰ আই পি এলত বহু দলৰ অধিনায়ক নতুন, গতিকে নতুন নিয়মো কাৰ্যকৰী হ’ব । দলবোৰো সলনি হ’ব আৰু আৱেগো শিখৰত থাকিব, কেৱল আই পি এলৰ জিলিকনি সলনি নহয় ৷ এই সময়ছোৱাত ১২খন ডাবল হেডাৰ মেচো অনুষ্ঠিত হ’ব । দিনৰ খেল বিয়লি ৩:৩০ বজাৰ পৰা অনুষ্ঠিত হোৱাৰ বিপৰীতে সন্ধিয়াৰ খেল সন্ধিয়া ৭:৩০ বজাৰ পৰা অনুষ্ঠিত হ’ব । অৱশ্যে শনিবাৰে অনুষ্ঠিত হ’বলগীয়া উদ্বোধনী মেচখনত বৰষুণৰ সম্ভাৱনা আছে । ইয়াৰ পিছতো ক্ৰিকেটৰ ৰঙত মনোৰঞ্জনৰ স্পৰ্শ যোগ কৰাৰ সম্পূৰ্ণ প্ৰস্তুতি চলিছে ।

দেখা যাব ৰিভাৰ্ছ ছুইঙৰ যাদু –

আই পি এল-১৮ৰ আটাইতকৈ গুৰুত্বপূৰ্ণ পৰিৱৰ্তন হৈছে লাৰ নিষেধাজ্ঞা আঁতৰোৱা । অধিনায়কসকলৰ বৈঠকত একমত হোৱাৰ পাছত এতিয়া আই পি এলত বলাৰসকলে লাৰ ব্যৱহাৰ কৰি বল জিলিকাব পাৰিব । ক’ৰ’নাৰ পিছত এইবাৰ প্ৰথমবাৰৰ বাবে বলাৰসকলে ৰিভাৰ্ছ ছুইঙৰ বাবে লাৰ ব্যৱহাৰ কৰিব পাৰিব । লক্ষ্যণীয় যে এইবাৰ ৰিভাৰ্ছ ছুইঙে বিশাল স্ক’ৰ ৰোধ কৰিব নে প্ৰথমবাৰৰ বাবে ৩০০ স্ক’ৰ দেখা যাব ।

নিশাৰ মেচত সলনি কৰিব পাৰিব বল-

লাৰ বাহিৰেও আন পৰিৱৰ্তিত নিয়মত আম্পায়াৰৰ দ্বিতীয়টো বল দিয়াৰো অধিকাৰ থাকিব । সন্ধিয়া খেলা মেচত যদি আম্পায়াৰসকলে অনুভৱ কৰে যে নিয়ৰে খেলত প্ৰভাৱ পেলাইছে তেন্তে তেওঁলোকে দ্বিতীয় ইনিংছৰ ১১ নং অভাৰৰ পৰা নতুন বলৰ ব্যৱহাৰৰ অনুমতি দিব পাৰে । বিয়লি ৩.৩০ বজাৰ পৰা আৰম্ভ হোৱা মেচত এই নিয়ম প্ৰযোজ্য নহ’ব । ইয়াৰ উপৰিও দলসমূহে উচ্চতা আৰু অফছাইডৰ বাবে ৱাইডৰ বাবেও সিদ্ধান্ত পৰ্যালোচনা ব্যৱস্থা (DRS) ব্যৱহাৰ কৰিব পাৰে । অৱশ্যে ইমপেক্ট প্লেয়াৰৰ নিয়ম আগৰ দৰেই থাকিব ।

১৩ বছৰীয়া বৈভৱৰ ওপৰত সকলোৰে দৃষ্টি-

ধোনীতকৈ ঠিক ৩০ বছৰ সৰু ১৩ বছৰীয়া বৈভৱ সূৰ্যবংশীও এইবাৰ আই পি এলৰ অংশ হ’ব । তেওঁ ৰাজস্থান ৰয়েলছৰ সৈতে জড়িত । তেওঁ কিমান মেচ খেলাৰ সুযোগ পায় সেয়া হ’ব লক্ষ্যণীয় । মুস্তাক আলী ট্ৰফীত মুম্বাইৰ জয়ৰ ক্ষেত্ৰত গুৰুত্বপূৰ্ণ ভূমিকা গ্ৰহণ কৰা সূৰ্যাশ শ্বেডজে পঞ্জাৱৰ হৈ জিলিকি উঠিব । দিল্লী প্ৰিমিয়াৰ লীগত এটা অভাৰত ছটা ছয় অৰ্জন কৰা প্ৰিয়ংশ আৰিয়াইও পঞ্জাৱৰ হৈ খেলিব ।

বহু নতুন অধিনায়কে নিজৰ শক্তি দেখুৱাব-

এইবাৰ বহু দলে নতুন অধিনায়কৰ সৈতে খিতাপৰ বাবে প্ৰতিদ্বন্দ্বিতা কৰিব । ইয়াৰ ভিতৰত আশ্চৰ্যজনক নামটো হ’ল আৰ চি বিৰ ৰজত পাটিদাৰ । অক্ষৰ পেটেলে দিল্লী কেপিটেলছৰ অধিনায়কত্ব লাভ কৰাৰ বিপৰীতে ২০২৪ চনৰ চেম্পিয়ন কে কে আৰৰ প্ৰাক্তন অধিনায়ক শ্ৰেয়াছ আয়াৰে এইবাৰ পঞ্জাৱ কিংছৰ নেতৃত্ব দিব । কলকাতা দলৰ অধিনায়কত্ব অজিংক্য ৰাহানেৰ হাতত অৰ্পণ কৰা হৈছে । এই ছিজনত লক্ষ্ণৌ ছুপাৰ জায়েন্টছৰ অধিনায়ক ঋষভ পন্ট ।