শনিবাৰে ৰাজস্থানৰ ভজনলাল শৰ্মা চৰকাৰে লৈছে এক বৃহৎ সিদ্ধান্ত । মুখ্যমন্ত্ৰী ভজনলাল শৰ্মাৰ অধ্যক্ষতাত শনিবাৰে অনুষ্ঠিত কেবিনেট বৈঠকত গেহলট চৰকাৰৰ দিনত সৃষ্টি হোৱা ৯খন জিলা বিলুপ্ত কৰাৰ সিদ্ধান্ত লোৱা হৈছে । কেবিনেট মন্ত্ৰী যোগৰাম পেটেল আৰু সুমিত গোদাৰাই শনিবাৰে সাংবাদিকৰ আগত এই তথ্য প্ৰদান কৰে ।
পূর্বৰ কংগ্রেছ চৰকাৰে সৃষ্টি কৰা ২০খন নতুন জিলা সন্দর্ভত ভজন লাল চৰকাৰে এটা ডাঙৰ সিদ্ধান্ত লৈছে বুলি তেওঁলোকে জনায় ৷ ২০খন জিলাৰ ভিতৰত ৮খন জিলা যিদৰে আছে তেনেদৰেই থাকিব বুলি তেওঁলোকে সদৰী কৰে । এতিয়া পূৰ্বৰ চৰকাৰে সৃষ্টি কৰা নতুন বিভাজনৰ অস্তিত্ব নাথাকিব ।
ভজনলাল চৰকাৰে গেহলট শাসনৰ সময়ত গঠন হোৱা ৯খন জিলা আৰু তিনিটা সংমণ্ডল বিলুপ্ত কৰে । যিবোৰ জিলা বাতিল কৰা হৈছে সেইবোৰ হ’ল- দুডু, কেকৰী, শ্বাহপুৰা, নিমকাথানা, গংগাপুৰচিটি, জয়পুৰ গ্ৰাম্য, যোধপুৰ গ্ৰাম্য, অনুপগড়, চাঞ্চোৰ ।
তেওঁলোকে কয় যে কিৱালোত্ৰা, ব্যাৱৰ, দীগ, দিদৱানা-কুচামান, কোটপুটলি-বহাৰোদ, খাইৰথাল-তিজাৰা, ফালোডী আৰু ছালুম্বাৰ এই জিলাসমূহ যিদৰে আছে তেনেকৈয়ে থাকিব ।
এতিয়া ৰাজস্থানত মুঠ ৪১খন জিলা আৰু ৭টা সংমণ্ডল-
কেবিনেট বৈঠকৰ পিছত অনুষ্ঠিত সংবাদমেলত মন্ত্ৰী যোগৰাম পেটেলে কয় যে ১৯৫৬ চনত ৰাজস্থান গঠন হৈছিল । ইয়াৰ পিছত বহুদিনলৈ ৰাজস্থানত মাত্ৰ ২৬ খন জিলা আছিল । কিন্তু পিছলৈ আৰু ৭খন নতুন জিলা গঠন হ’ল, যেতিয়া পূৰ্বৰ গেহলট চৰকাৰৰ কাৰ্যকাল শেষ হোৱাৰ সময়ত ।
তেওঁলোকে কয় যে সেই সময়ত শেষ মুহূৰ্তত ১৭খন নতুন জিলা আৰু তিনিটা সংমণ্ডল গঠনৰ সিদ্ধান্ত লোৱা হৈছিল । পূৰ্বৰ কংগ্ৰেছ চৰকাৰে আচৰণ বিধি ঘোষণাৰ ঠিক পূৰ্বে জিলা গঠনৰ কথা ঘোষণা কৰিছিল । জিলাসমূহৰ জনসংখ্যাৰ ওপৰত ভিত্তি কৰি এইটো ব্যৱহাৰিক বা শুদ্ধ নহয় ।
লগতে তেওঁলোকে কয় যে জিলা গঠন সন্দৰ্ভত কেবিনেট কমিটীত এক আলোচনা অনুষ্ঠিত হয় । এই কমিটীয়ে পাছলৈ সৃষ্টি হোৱা জিলাসমূহ ব্যৱহাৰিক নহয় বুলি বিবেচনা কৰিছিল । এতিয়া ৰাজস্থানত থাকিব মাত্ৰ ৭টা সংমণ্ডল আৰু মুঠ ৪১খন জিলা । এইদৰে চৰকাৰে গেহলট চৰকাৰৰ দিনত সৃষ্টি হোৱা ৯খন নতুন জিলা আৰু তিনিটা নতুন সংমণ্ডল – বনছোৱাৰা, ছিকাৰ আৰু পালি সংমণ্ডল বিলুপ্ত কৰাৰ সিদ্ধান্ত লয় । লগতে আইন মন্ত্ৰী যোগৰাম পেটেলে ৰাজস্থানৰ গাঁও পঞ্চায়তসমূহ পুনৰ সংগঠিত কৰা হ’ব বুলিও জানিবলৈ দিয়ে ।
