প্ৰকৃতিৰ কোপদৃষ্টিত এইখন দেশ । বিগত ৩০ দিনত সংঘটিত হ’ল ১৪০০ টা ভূমিকম্প ।

ইণ্ডোনেছিয়াত বিগত ৩০ দিনত ১৪০০ৰো অধিক ভূমিকম্প সংঘটিত হৈছে । ২০২৫ চনৰ ২৭ নৱেম্বৰত সুমাত্ৰাৰ সমীপত ৬.৩ প্ৰাৱল্যৰ আন এক বৃহৎ ভূমিকম্পৰ সৃষ্টি হয় । মানুহৰ মাজত আতংকৰ সৃষ্টি হৈছিল যদিও এতিয়ালৈকে কোনো লোকৰ মৃত্যু বা বৃহৎ ক্ষতিৰ খবৰ পোৱা নাই । কিন্তু সমগ্ৰ দেশখনতে শংকা অব্যাহত আছে কিয়নো বান আৰু ভূমিস্খলনেও ভাবুকিৰ সৃষ্টি কৰিছে ।

ৰিং অৱ ফায়াৰত অৱস্থিত ইণ্ডোনেছিয়া-

ইণ্ডোনেছিয়া প্ৰশান্ত মহাসাগৰক আগুৰি থকা ৰিং অৱ ফায়াৰত অৱস্থিত । এইখনেই হৈছে বিশ্বৰ আটাইতকৈ ভয়ংকৰ বিপজ্জনক স্থান । ইয়াত পোন্ধৰখন ডাঙৰ টেকটনিক প্লেটৰ সংঘৰ্ষ হৈ থাকে । বিশ্বৰ ৯০% ভূইকঁপ ইয়াতেই সংঘটিত হয় । ইণ্ডোনেছিয়াত প্ৰতি বছৰে হাজাৰ হাজাৰ সৰু-বৰ ভূমিকম্প সংঘটিত হয় । এয়া এক সাধাৰণ কথা ।

কিয় আটাইতকৈ বেছি কঁপিছে সুমাত্ৰা ?

সুমাত্ৰা দ্বীপৰ তলত ইন্দো-অষ্ট্ৰেলিয়ান প্লেট ইউৰেছিয়ান প্লেটৰ তললৈ লাহে লাহে (বছৰত ৫-৭ চেণ্টিমিটাৰ) নামি আহিছে । ইয়াৰ ফলত অপৰিসীম চাপৰ সৃষ্টি হয় । এই চাপ হঠাৎ মুক্ত হ’লে ভূইকঁপৰ সৃষ্টি হয় । সুমাত্ৰাতো গ্ৰেট সুমাত্ৰা ফল্ট নামৰ এটা বৃহৎ ফল্ট আছে, যাৰ ফলত সঘনাই কম্পন হয় । এই কাৰণেই শেহতীয়াকৈ দেশখনত ৬.৬ প্ৰাবল্যৰ ভূইকঁপ আৰু বৰ্তমানৰ ৬.৩ প্ৰাবল্যৰ ভূমিকম্প সংঘটিত হৈছে ।

এতিয়াও সতেজ ২০০৪ চনৰ ভয়ানক স্মৃতি-

২০০৪ চনত সুমাত্ৰাৰ সমীপত ৯.১ প্ৰাবল্যৰ এক বৃহৎ ভূইকঁপ সংঘটিত হৈছিল । ইয়াৰ ফলত সৃষ্টি হোৱা ছুনামীৰ ফলত ২ লাখ ৩০ হাজাৰৰো অধিক লোকৰ মৃত্যু হয় । এইবাৰৰ ভূইকঁপটো মাত্ৰ ১০ কিলোমিটাৰ গভীৰতাত আছিল’, গতিকে মাটি প্ৰচণ্ডভাৱে কঁপিছিল যদিও ছুনামীৰ কোনো ভাবুকি নাছিল ।

বানপানী আৰু ভূমিকম্পৰো প্ৰহাৰ-

একে সময়তে স্যেন্যাৰ ঘূৰ্ণীবতাহৰ ফলত সুমাত্ৰাত ভয়াৱহ বান আৰু ভূমিস্খলনৰ সৃষ্টি হৈছে । এই ঘটনাত এতিয়ালৈকে ২৫ জনতকৈ অধিক লোকৰ মৃত্যু হৈছে আৰু ১০ জন নিৰুদ্দেশ হৈছে । ৮ হাজাৰৰো অধিক লোকক স্থানান্তৰ কৰা হৈছে । বাট-পথ বিধ্বস্ত হৈ পৰিছে, গাঁওবোৰ পানীত ডুব গৈছে । তাৰ ওপৰত ভূতৰ ওপৰত দাৱহ পৰাদি ভূমিকম্পই মানুহক আতংকিত কৰি তুলিছে ।

ইয়াৰ পিছত কি হ’ব ?

বিজ্ঞানীসকলে কয় যে আৰু অধিক কম্পনৰ সম্ভাৱনা আছে । আগন্তুক দিনত প্ৰবল বৰষুণ আৰু বানপানীৰ সতৰ্কবাণী দিছে বতৰ বিজ্ঞান বিভাগে । চৰকাৰে হেলিকপ্টাৰেৰে খাদ্য-পানী যোগান ধৰিছে । ৰাইজক সজাগ হৈ থাকিবলৈ আহ্বান জনোৱা হৈছে । ইণ্ডোনেছিয়াৰ দৰে দেশত বছৰি ভূমিকম্প আৰু বানপানী সংঘটিত হয় যদিও জলবায়ু পৰিৱৰ্তনে বৰষুণ অধিক তীব্ৰতৰ কৰি তুলিছে আৰু ভূমিকম্পৰ প্ৰভাৱ অধিক হৈছে ।

লগতে পঢ়ক : শ্ৰীলংকাত দিটৱাহৰ তাণ্ডৱ; অপাৰেচন সাগৰ বন্ধুৰ জৰিয়তে সহায়ৰ হাত ভাৰতৰ