ভাৰতৰ অপাৰেচন সিন্দুৰ আৰু তেতিয়াৰে পৰা পাকিস্তানৰ সৈতে অব্যাহত থকা চৰম উত্তেজনাৰ মাজতে এটা বৃহৎ চোৰাংচোৱা ৰেকেট জালত পৰিছে । পঞ্জাৱ আৰু হাৰিয়ানাৰ পৰা ৬ চোৰাংচোৱাক গ্ৰেপ্তাৰ কৰাত সফল হৈছে নিৰাপত্তা সংস্থা । হাৰিয়ানাৰ কাইথাল, হিছাৰ, নুহ আৰু পানীপটৰ লগতে পঞ্জাৱৰ মালেৰকোটলাৰ পৰা ধৰা হৈছে এই দেশ বিৰোধীকেইটাক । গ্ৰেপ্তাৰ কৰা আটাইকেইটাৰ বিৰুদ্ধে ভাৰতৰ গোপনীয় সামৰিক তথ্য পাকিস্তানলৈ প্ৰেৰণ কৰাৰ অভিযোগ উত্থাপন হৈছে ।

শেহতীয়াকৈ ভাৰত চৰকাৰে পাকিস্তান উচ্চায়ুক্তৰ বিষয়া ডেনিছক ২৪ ঘন্টাৰ ভিতৰত ভাৰত এৰি যাবলৈ নিৰ্দেশ দিছিল । পাঞ্জাৱ আৰু হাৰিয়ানাৰ মালেৰকোটলাৰ পৰা এতিয়ালৈকে ডেনিছৰ নিৰ্দেশত কাম কৰি থকা মুঠ ৬টা পাকিস্তানী চোৰাংচোৱাক গ্ৰেপ্তাৰ কৰা হৈছে । এই সকলো লোক ডেনিছৰ সংস্পৰ্শত আছিল ।

ইফালে ভাৰতৰ গোপনীয় সামৰিক তথ্য পাকিস্তানলৈ প্ৰেৰণ কৰাৰ অভিযোগত হাৰিয়ানাৰ হিছাৰৰ পৰা নিৰাপত্তা সংস্থাই গ্ৰেপ্তাৰ কৰিছে মহিলা ইউটিউবাৰ জ্যোতি মালহোট্ৰাক । মহিলা ইউটিউবাৰগৰাকীয়ে ২০২৩ চনত তেওঁৰ ট্ৰেভেল চেনেল “ট্ৰেভেল উইথ জো”ৰ শ্বুটিঙৰ বাবে পাকিস্তানলৈ গৈছিল, য’ত পাকিস্তান দূতাবাসৰ এজন বিষয়াৰ নিৰ্দেশত তেওঁ পাকিস্তানৰ চোৰাংচোৱা সংস্থা আই এছ আইৰ বিষয়াৰ সংস্পৰ্শলৈ আহিছিল আৰু তেতিয়াৰ পৰাই তেওঁ পাকিস্তানলৈ ভাৰত বিৰোধী তথ্য অহৰহ প্ৰেৰণ কৰিছিল ।

জেৰাৰত বহু গুৰুত্বপূৰ্ণ তথ্য প্ৰকাশ কৰিলে জ্যোতিয়ে-

এই গোচৰত জ্যোতিৰ জেৰাৰ সময়ত বহু গুৰুত্বপূৰ্ণ তথ্য প্ৰকাশ পাইছে । জেৰাৰ সময়ত জ্যোতিয়ে কয় যে তেওঁ ২০২৩ চনত পাকিস্তান ভিছাৰ বাবে দিল্লীস্থিত পাকিস্তান হাইকমিচনলৈ গৈছিল, য’ত তেওঁ আহছান-উৰ-ৰহিম ওৰফে ডেনিছক লগ পাইছিল । জ্যোতিয়ে দুবাৰ পাকিস্তান ভ্ৰমণ কৰাৰ কথা উল্লেখ কৰিছে, য’ত ডেনিছৰ অনুৰোধত তেওঁৰ চিনাকি আলী আহৱানক লগ পাইছিল, যিয়ে থকা আৰু ভ্ৰমণৰ ব্যৱস্থা কৰিছিল ।

জ্যোতিয়ে জনোৱা অনুলৰি পাকিস্তানত আলী আহোৱানে পাকিস্তানৰ নিৰাপত্তা আৰু চোৰাংচোৱা বিষয়াৰ সৈতে তেওঁৰ সাক্ষাৎৰ ব্যৱস্থা কৰিছিল । তাতেই ছাকিৰ আৰু ৰানা শ্বাহবাজকো লগ পোৱাৰ কথা উল্লেখ কৰে জ্যোতিয়ে । ছাকিৰৰ মোবাইল নম্বৰ লৈ জাট ৰন্ধাৱা নামেৰে ম’বাইলত চেভ কৰিছিল যাতে কোনেও সন্দেহ নকৰে । ইয়াৰ পিছত তেওঁ ভাৰতলৈ উভতি আহে বুলি স্বীকাৰ কৰিছে ।

জ্যোতিয়ে কয় যে তেওঁ সকলোৰে সৈতে হোৱাটছএপ, স্নেপচ্যাট আৰু টেলিগ্ৰামকে ধৰি অন্যান্য ছ’চিয়েল মিডিয়া প্লেটফৰ্মৰ জৰিয়তে যোগাযোগ ৰাখি ৰাষ্ট্ৰীয় বিৰোধী তথ্য প্ৰেৰণ কৰিবলৈ আৰম্ভ কৰে । জ্যোতিয়ে দিল্লীত পাকিস্তান উচ্চায়ুক্তৰ এজন বিষয়া ডানিছক কেইবাবাৰো লগ পোৱাৰ কথাও জানিব পৰা গৈছে । এতিয়া ভাৰতৰ গোপন তথ্য পাকিস্তানলৈ প্ৰেৰণ কৰি ভাৰতৰ সাৰ্বভৌমত্ব, ঐক্য আৰু অখণ্ডতাক বিপদত পেলোৱাৰ অভিযোগ উত্থাপন হৈছে জ্যোতিৰ বিৰুদ্ধে ।

ইফালে চোৰাংচোৱাগিৰিৰ গোচৰত গ্ৰেপ্তাৰ হোৱা অভিযুক্তৰ ভিতৰত আছে ৩২ বছৰীয়া গাজালা নামৰ এগৰাকী মহিলা । গাজালা ডেনিছৰ সৈতে আৰ্থিক লেনদেনত জড়িত আছিল আৰু ভিছা প্ৰক্ৰিয়াত সহায় কৰিছিল । ইয়াৰ উপৰিও ইয়ামিন মহম্মদো এই কাৰ্যত জড়িত, যিয়ে পূৰ্বে হাৱালা আৰু অন্যান্য উপায়েৰে ডেনিছক ধন পঠোৱাত সহায় কৰিছিল । লগতে হাৰিয়ানাৰ কাইথালৰ পৰা দেৱীন্দৰ সিং ধিলনক গ্ৰেপ্তাৰ কৰা হৈছে । পাকিস্তান ভ্ৰমণৰ সময়ত তেওঁৰ সংস্পৰ্শলৈ আহিছিল । তেওঁ পাকিস্তানী এজেণ্টলৈ পটিয়ালা কেণ্টনমেণ্টৰ ভিডিঅ’ প্ৰেৰণ কৰিছিল ।

ইয়াৰ উপৰিও হাৰিয়ানাৰ নুহৰ পৰা আৰমান নামৰ এজন স্থানীয় যুৱকক গ্ৰেপ্তাৰ কৰা হৈছে, যিয়ে ভাৰতীয় চিম কাৰ্ড যোগান ধৰিছিল আৰু ২০২৫ চনত পাকিস্তানী এজেণ্টৰ নিৰ্দেশত ডিফেন্স এক্সপ’ৰ স্থান পৰিদৰ্শন কৰিছিল । চৰকাৰ আৰু সংস্থাসমূহে এতিয়া ছ’চিয়েল মিডিয়া প্লেটফৰ্মত সক্ৰিয় সন্দেহযুক্ত লোকৰ ওপৰত নিৰীক্ষণ আৰু তদন্ত আৰু অধিক তীব্ৰতৰ কৰাৰ পৰিকল্পনা কৰিছে ।