ক্ৰমান্বয়ে উত্তেজনা বৃদ্ধি পাইছে মধ্য প্ৰাচ্যত। ছিৰিয়া যুদ্ধৰ ভয়ংকৰ পৰিণতি। ছিৰিয়াত পতন হ’ল বাচাৰ আল আছাদৰ চৰকাৰৰ। আল আছাদে ছিৰিয়াৰ পৰা পলায়ন কৰি বৰ্তমান ৰাছিয়াৰ ৰাজধানী মস্কোত থকাৰ খবৰ। ২০১১ চনৰ আৰৱ স্প্ৰীঙৰ সময়ৰ পৰা আৰম্ভ হোৱা গৃহযুদ্ধই বৰ্তমান ভয়ংকৰ ৰূপ লয় যাৰ পৰিণতিত আল আছাদৰ চৰকাৰ ভংগ হয়।

কিদৰে ছিৰিয়াত সংঘটিত হ’ল এই পৰিৱৰ্তন ?
২০১১ চনৰ আৰৱ স্প্ৰীঙৰ সময়ৰ পৰা আৰম্ভ হোৱা এই গৃহযুদ্ধ বিগত এটা সম্তাহত ভয়ংকৰ পৰিস্থিতিৰ ৰূপ ধাৰণ কৰিছিল। মাত্ৰ এটা সপ্তাহ পূৰ্বে ছিৰিয়া সম্পূৰ্ণৰূপে দখল কৰিলে বিদ্ৰোহীয়ে।

ছিৰিয়াৰ এই বিদ্ৰোহৰ আঁৰত কোন জড়িত হৈ আছে ?
ছিৰিয়াৰ এই বিদ্ৰোহৰ নেতৃত্ব লৈছিল হায়াত তাহৰিৰ আলছাম নামৰ সংগঠনটোৱে। হায়াত তাহৰিৰ আলছামৰ লগতে আন বহুতো বিদ্ৰোহী একলগ হৈছিল আৰু গঠন কৰিছিল ছিৰিয়ান নেশ্যনেল আৰ্মী। এই বিদ্ৰোহী সংগঠনসমূহে প্ৰথমতে যুদ্ধ আৰম্ভ কৰে ইডলিবৰ পৰা আৰু বিদ্ৰোহ আৰম্ভ কৰিয়েই দখল কৰে ছিৰিয়াৰ আলেপ্পো চহৰ। কম সময়ৰ ভিতৰত ছিৰিয়াৰ ৰাজধানী ডামাছকাছ দখল কৰে বিদ্ৰোহীয়ে। হায়াত তাহৰিৰ আলছামৰ নেতৃত্ব দিছিল আবু মহম্মদ আল জোলানীয়ে।

ছিৰিয়াত এই বিদ্ৰোহৰ আৰম্ভণী কেনেকৈ হৈছিল?

বিগত ৫৩ বছৰ ধৰি ছিৰিয়াত শাসন কৰিছিল আল আছাদৰ পৰিয়ালে। ২০১১ চনত ছিৰিয়াত আৰৱ স্প্ৰীঙৰ সময়ত আৰম্ভ হয় গৃহযুদ্ধ। আছাদ পৰিয়ালৰ বিৰুদ্ধে ৰাজপথলৈ ওলাই আহে ছিৰিয়াৰ জনতা। ইয়াৰ পাছত ছিৰিয়াৰ পৰিৱেশ অতি ভয়ংকৰ হৈ পৰে। ISISৰ সন্ত্ৰাসবাদৰ বাবেই ক্ৰমান্বয়ে অশান্ত হৈ পৰে ছিৰিয়া। বাচাৰ আল আছাদে সহায় বিচাৰে ৰাছিয়াৰ পৰা। পুটিনৰ সহায়ত আছাদে পৰাস্ত কৰে ISISক আৰু শক্তিশালী হৈ পৰে ছিৰিয়ান সেনা। কিন্তু ছিৰিয়াৰ এই ঘটনাৰ লগত জড়িত হৈ আছে আন্তৰাষ্ট্ৰীয় শক্তি। ৰাছিয়া, আমেৰিকা, ইৰাণ, তুৰ্কী, ইজৰাইল সকলোৰে স্বাৰ্থ আছে ছিৰিয়াত। ছিৰিয়াক সহায় কৰিছিল ইৰান চৰকাৰ আৰু হিজবুল্লাই। ইজৰাইল আৰু ইৰাণৰ যুদ্ধৰ ফলত দুৰ্বল হৈ পৰিল হিজবুল্লা। ৰাছিয়া ব্যস্ত হৈ থাকিল ইউক্ৰেইনৰ লগত। আমেৰিকাই সহায় কৰিলে বিদ্ৰোহীক। তুৰ্কীৰো সহায় লাভ কৰিলে বিদ্ৰোহীয়ে আৰু দখল কৰিলে ছিৰিয়া। ইফালে বিপদৰ সময়ত আছাদৰ সংগ নেৰিলে পুটিনে। আছদ আৰু পৰিয়ালক শৰণ দিলে ৰাছিয়াই।