ভাৰত-পাকিস্তানৰ উত্তেজনাৰ মাজত বন্ধ হৈ থকা আই পি এল ২০২৫ প্ৰতিযোগিতাখন ১৫ মে’ৰ পৰা পুনৰ আৰম্ভ হোৱাৰ সম্ভাৱনা আছে । নিজৰ দেশলৈ উভতি যোৱা অষ্ট্ৰেলিয়ান খেলুৱৈসকলকো এই বিষয়ে অৱগত কৰা হৈছে । বি চি চি আইৰ উপাধ্যক্ষ ৰাজীৱ শুক্লাই নিশ্চিত কৰিছে যে আজি এখন গুৰুত্বপূৰ্ণ বৈঠক অনুষ্ঠিত হ’ব য’ত স্থানকে ধৰি সকলো দিশ পুনৰ বিবেচনা কৰা হ’ব ।

অষ্ট্ৰেলিয়াকে ধৰি সকলো দেশৰ খেলুৱৈয়ে আই পি এল স্থগিত ৰখাৰ পিছত ভাৰত এৰি গৈছে, কিছুমানে নিজৰ দেশলৈ উভতি যোৱাৰ বিপৰীতে বহুতে পৰ্যটনৰ বাবে আন দেশলৈ গৈছে । বিদেশী খেলুৱৈসকলো প্ৰতিযোগিতাখন পিছুৱাই দিয়াৰ এটা ডাঙৰ কাৰণ আছিল, কিয়নো তেওঁলোকে এই মানসিক চাপৰ পৰিস্থিতিত থাকিব বিচৰা নাছিল । কিন্তু এতিয়া ভাৰত আৰু পাকিস্তানৰ মাজত উত্তেজনা কমি অহাৰ লগে লগে খেলুৱৈসকলক কোৱা হৈছে যে শীঘ্ৰে প্ৰতিযোগিতাখন আৰম্ভ হ’ব পাৰে ।

অষ্ট্ৰেলিয়াৰ ৱেবছাইট ক’ডস্প’ৰ্টছৰ প্ৰতিবেদনত প্ৰকাশ পাইছে যে ১৫ মে’ বৃহস্পতিবাৰৰ পৰা আই পি এল পুনৰ আৰম্ভ হ’ব পাৰে, এই তথ্য অষ্ট্ৰেলিয়াৰ খেলুৱৈসকলক দিয়া হৈছে । এই সন্দৰ্ভত আজি বি চি চি আইৰ এখন গুৰুত্বপূৰ্ণ বৈঠক অনুষ্ঠিত হ’ব, য’ত গভৰ্নিং কাউন্সিল আৰু বিষয়াসকলে পৰিস্থিতিৰ ওপৰত আলোচনা কৰি চূড়ান্ত সিদ্ধান্ত ল’ব পাৰে ।

আজি বি চি চি আইৰ বৈঠক-

বি চি চি আইৰ উপাধ্যক্ষ ৰাজীৱ শুক্লাই কয়, “যুদ্ধবিৰতিৰ নতুন পৰিঘটনাৰ লগে লগে ​​১১ মে’ত বি চি চি আই, আই পি এল গভৰ্নিং কাউন্সিল আৰু বিষয়াসকলৰ বৈঠকত পৰিস্থিতিৰ বিষয়ে আলোচনা হ’ব । আমি প্ৰতিযোগিতাৰ সময়সূচী পুনৰীক্ষণ কৰি ইয়াক সম্পূৰ্ণ কৰাৰ সৰ্বোত্তম উপায়ৰ বিষয়ে সিদ্ধান্ত লম । যুদ্ধবিৰতিৰ সময়ত প্ৰথমে নিৰ্ধাৰণ কৰা স্থানসমূহকে ধৰি সকলো দিশকে পুনৰ বিবেচনা কৰা হ’ব । অতি সোনকালে চূড়ান্ত সিদ্ধান্ত লোৱা হ’ব ।”

কিমান মেচ বাকী আছে ?

ধৰমশালাত অনুষ্ঠিত পঞ্জাব কিংছ বনাম দিল্লী কেপিটেলছৰ খেলখন মাজভাগত বন্ধ কৰি দিয়া হয়, তাৰ পিছতে আই পি এল পিছুৱাই দিয়াৰ সিদ্ধান্ত লোৱা হয় । এতিয়া পুনৰ আই পি এল আৰম্ভ হ’লে এই মেচখনো অনুষ্টিত হোৱাৰ সম্ভাৱনা আছে ।  এই মেচকে ধৰি চলিত আই পি এলৰ লীগ পৰ্যায়ত এতিয়াও ১৩খন খেল বাকী আছে । তিনিটা দল (চি এছ কে, আৰ আৰ, এছ আৰ এইচ) দৌৰৰ বাহিৰত থকাৰ সময়ত প্লে অফৰ বাবে কোনো দলে যোগ্যতা অৰ্জন কৰা নাই ।

পইণ্ট তালিকাত ১৬-১৬ পইণ্টেৰে ক্ৰমে প্ৰথম আৰু দ্বিতীয় স্থানত আছে গুজৰাট (জি টি) আৰু বাংগালুৰু (আৰ চি বি) । ১৫ পইণ্টেৰে তৃতীয় স্থানত আছে পঞ্জাব কিংছ আৰু ১৪ পইণ্টেৰে চতুৰ্থ স্থানত আছে মুম্বাই ইণ্ডিয়ানছ । দিল্লী (ডি চি), কলকাতা (কে কে আৰ) আৰু লক্ষ্ণৌ (এল এছ জি)ও প্লে অফৰ দৌৰত আছে ।

ভাৰত আৰু পাকিস্তানৰ মাজত চলি থকা উত্তেজনাৰ মাজতে দুয়োখন দেশৰ মাজত যুদ্ধবিৰতি ঘোষণা কৰা হৈছে । ভাৰতৰ পৰাক্ৰমৰ আগত নতশিৰ হৈ যুদ্ধবিৰতিৰ প্ৰস্তাৱ দিয়ে পাকিস্তানে । ইয়াৰ পাছতে ভাৰতে যুদ্ধবিৰতিৰ বাবে সন্মতি প্ৰকাশ কৰে । এই কথা সামাজিক মাধ্যমৰ জৰিয়তে প্ৰথমে নিশ্চিত কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে । এনে পৰিস্থিতিত এতিয়া ভাৰতীয় ক্ৰিকেট নিয়ন্ত্ৰণ ব’ৰ্ডে শীঘ্ৰে ইণ্ডিয়ান প্ৰিমিয়াৰ লীগ (আই পি এল) ২০২৫ পুনৰ আৰম্ভ কৰাৰ সন্দৰ্ভত আনুষ্ঠানিক ঘোষণা কৰিব পাৰে ।

উল্লেখ্য যে শেহতীয়াকৈ ভাৰত আৰু পাকিস্তানৰ মাজত ক্ৰমাৎ বৃদ্ধি পোৱা উত্তেজনাৰ বাবে শুকুৰবাৰে এসপ্তাহৰ বাবে আই পি এল স্থগিত ৰখা হৈছিল । অৱশ্যে এই প্ৰতিযোগিতাখন পুনৰ কেতিয়াৰ পৰা আৰম্ভ হ’ব সেই সন্দৰ্ভত সিদ্ধান্ত ল’ব পৰা নগ’ল । কিন্তু এতিয়া শেহতীয়া পৰিস্থিতিৰ পিছত অনুমান কৰা হৈছে যে বি চি চি আইয়ে অতি সোনকালে এই সন্দৰ্ভত কিছু নিৰ্দেশনা জাৰি কৰিব পাৰে ।

৫৭ খন মেচ খেলা হৈছে, ৫৮ সংখ্যক মেচ মাজভাগত স্থগিত-

২০২৫ চনৰ আই পি এলত মুঠ ৫৭খন মেচ অনুষ্ঠিত হয় । ৮ মে’ত ধৰমশালাত পঞ্জাব কিংছ (পি বি কে এছ) আৰু দিল্লী কেপিটেলছ (ডি চি)ৰ মাজত ৫৮ সংখ্যক মেচখন অনুষ্ঠিত হৈছিল যদিও মাত্ৰ ১০.১ অভাৰৰ অন্তত খেলখন বন্ধ হৈ পৰে । এই মেচখন পুনৰ অনুষ্ঠিত হ’ব নে নহয় সেয়া এতিয়াও সিদ্ধান্ত লোৱা হোৱা নাই । ৮ মে’ত যেতিয়া মেচখন বন্ধ হৈছিল তেতিয়া পঞ্জাব কিংছে ১০.১ অভাৰত ১ উইকেট হেৰুৱাই ১২২ ৰান সংগ্ৰহ কৰিছিল । প্ৰিয়ংশ আৰ্য্যই ৫টা চাৰি আৰু ৬টা ছয়ৰ সহায়ত ৩৪টা বলত ৭০ ৰান সংগ্ৰহ কৰে । প্ৰভসিমৰণ সিঙে ২৮টা বলত ৫০ ৰান আৰু শ্ৰেয়াছ আয়েৰে ০ ৰান সংগ্ৰহ কৰি অপৰাজিত হৈ আছিল ।

এতিয়া লীগ পৰ্যায়ত মাত্ৰ ১২খন মেচ বাকী আছে, তাৰ পিছত প্লে অফৰ ৪খন মেচ থাকিব । পূৰ্বৰ সূচী অনুসৰি কোৱালিফায়াৰ ১ আৰু এলিমিনেটৰ হায়দৰাবাদত অনুষ্ঠিত হ’ব, আনহাতে কোৱালিফায়াৰ ২ আৰু ফাইনেল কলকাতাত অনুষ্ঠিত হ’ব ।

ইণ্ডিয়ান প্ৰিমিয়াৰ লীগৰ বুধবাৰে অনুষ্ঠিত হোৱা ৫৭ সংখ্যক মেচখনত কলকাতা নাইট ৰাইডাৰ্ছ (কে কে আৰ) চেন্নাই ছুপাৰ কিংছ (চি এছ কে)ৰ হাতত ২ উইকেটত পৰাস্ত হয় । এই পৰাজয়ৰ পিছত কে কে আৰৰ প্লে অফত প্ৰৱেশৰ আশা প্ৰায় ছিন্নভিন্ন হৈ পৰিছে ।

এই মেচখনত কলকাতা নাইট ৰাইডাৰ্ছে চেন্নাই ছুপাৰ কিংছক ১৮০ ৰানৰ লক্ষ্য বান্ধি দিছিল, যিটো চেন্নাইয়ে হাতত ২টা উইকেট থকা অৱস্থা ১৯.২ অভাৰত উপনীত হয় । ইতিমধ্যে প্লে অফৰ দৌৰৰ পৰা তিনিটা দল বাহিৰ হৈছে আৰু ৭ মে’ৰ নিশা পৰাজয়ৰ পিছত কে কে আৰো এই দলকেইটাৰ সৈতে যোগদান কৰাৰ সম্ভাৱনা আছে ।

নূৰৰ চাৰি উইকেট লয়, ব্ৰেভিছৰ বিস্ফোৰক ইনিংছ-

টছত জয়ী হৈ কলকাতা নাইট ৰাইডাৰ্ছে প্ৰথমে বেটিং কৰি ৬ উইকেটত ১৭৯ ৰান সংগ্ৰহ কৰে । কলকাতা নাইট ৰাইডাৰ্ছৰ হৈ অধিনায়ক অজিংক্য ৰাহানেই সৰ্বাধিক ৪৮ ৰান সংগ্ৰহ কৰে । ৩৩ বলৰ ইনিংছত ৰাহানেই ৪টা চাৰি আৰু দুটা ছয় কোবাই । আন্দ্ৰে ৰাছেলে ৪টা চাৰি আৰু ৩টা ৬ৰ সহায়ত ২১টা বলত ৩৮ ৰানৰ বিস্ফোৰক ইনিংছ খেলে ।

আনহাতে অভিজ্ঞ বেটছমেন মনীষ পাণ্ডেই অপৰাজিত ৩৬ ৰান আৰু অ’পেনাৰ সুনীল নাৰিনে ২৬ ৰান আগবঢ়ায় । চেন্নাই ছুপাৰ কিংছৰ হৈ স্পীনাৰ নূৰ আহমেদে সৰ্বাধিক ৪টা উইকেট দখল কৰে । আনহাতে বেগী বলাৰ অংশুল কাম্বোজ আৰু স্পীনাৰ ৰবীন্দ্ৰ জাডেজাই এটাকৈ সফলতা লাভ কৰে ।

ইয়াৰ প্ৰত্যুত্তৰত উৰভিল পেটেল (১১ বলত ৩১), দেৱাল্ড ব্ৰেভিছ (২৫ বলত ৫২) আৰু শিৱম ডুবে (৪০ বলত ৪৫) বাবে চি এছ কেয়ে লক্ষ্যত উপনীত হয় । ১৭ ৰানত অপৰাজিত হৈ উভতি আহে ধোনী । এই মেচখনৰ শ্ৰেষ্ঠ খেলুৱৈ আছিল নূৰ আহমেদ । নুৰে ৪টা উইকেট দখল কৰে ।

চলিত আই পি এলত মঙলবাৰে অনুষ্ঠিত হোৱা এখন মেচত গুজৰাট টাইটানছে মুম্বাই ইণ্ডিয়ানছক তিনি উইকেটত পৰাস্ত কৰে । ডি এল এছ পদ্ধতিত এই মেচখনত জয়লাভ কৰে গুজৰাটে । বৰ্ষা বিঘ্নিত মেচখনত গুজৰাটে ১৯ অভাৰত ১৪৭ ৰানৰ লক্ষ্য লাভ কৰিছিল, যিটো দলটোৱে সহজেই উপনীত হয় । ইয়াৰ পূৰ্বে মুম্বাই দলে ২০ অভাৰত ৮টা উইকেট হেৰুৱাই ১৫৫ ৰান সংগ্ৰহ কৰে । মুম্বাইৰ হৈ উইল জেকছে ৫৩ ৰানৰ সৰ্বোচ্চ ইনিংছ খেলে ।

পইন্ট তালিকাৰ শীৰ্ষত গুজৰাট-

ছিজনৰ অষ্টমটো জয়ৰ জৰিয়তে গুজৰাটে ১৬ পইণ্ট আৰু ০.৭৯৩ নেট ৰান ৰেটেৰে পইণ্ট তালিকাৰ শীৰ্ষ স্থানলৈ আগবাঢ়িছে । ৰয়েল চেলেঞ্জাৰছ বাংগালুৰুক অতিক্ৰম কৰি দলটোৱে শীৰ্ষত উপনীত হৈছে । আনহাতে মুম্বাই ইণ্ডিয়ানছে ১২খন খেলৰ ভিতৰত ৭খন খেলত জয়লাভ কৰি ৫খন খেলত পৰাস্ত হৈ চতুৰ্থ স্থান দখল কৰিছে । ইয়াৰ লগে লগে মুম্বাইৰ বিজয়ৰথ ৰুদ্ধ হৈ পৰিছে । ইয়াৰ পূৰ্বে মুম্বাইয়ে একেৰাহে ৬ খন মেচত জয়লাভ কৰিছিল ।

মুম্বাইৰ বাবে সমস্যা হৈ পৰিল বৰষুণ-

বৰষুণ প্ৰভাৱিত এই খেলখনত গুজৰাটে শেষ অভাৰত এক দৰ্শনীয় জয় লাভ কৰে । আচলতে ১৮ নং অভাৰৰ পিছত বৰষুণ আৰম্ভ হয় আৰু মেচ বন্ধ হৈ পৰে । সেই সময়ত গেৰাল্ড কোটজি আৰু ৰাহুল টেৱাটিয়াই ৫ ৰানত ক্ৰীজত আছিল । গুজৰাটৰ স্ক’ৰ আছিল ১৩২/৬ । সেই সময়ত তেওঁলোকক জয়ী হ’বলৈ শেষৰ দুটা অভাৰত ২৪ ৰানৰ প্ৰয়োজন হৈছিল । কিন্তু বৰষুণৰ বাবে খেলখন পলম হোৱাত ডি এল এছ পদ্ধতি অনুসৰি ১৯ অভাৰত ১৪৭ ৰানৰ নতুন লক্ষ্য দিয়া হয় ।

গুজৰাটৰ ইনিংছ-

লক্ষ্য অনুসৰণ কৰাৰ সময়ত গুজৰাটৰ আৰম্ভণি দুৰ্বল আছিল । দ্বিতীয় অভাৰত ট্ৰেণ্ট ব’ল্টে ছাই সুদৰ্শনৰ উইকেট দখল কৰে । তেওঁ মাত্ৰ পাঁচ ৰানহে কৰে । ইয়াৰ পাছতে শুভমন গীলে জোছ বাটলাৰৰ সৈতে দ্বিতীয় উইকেটত ৬৩টা বলত ৭২ ৰান সংযোজন কৰে । অশ্বিনী কুমাৰে বাটলাৰক ৰিয়ান ৰিকেলটনৰ হাতত ধৰা পেলায় । ২৭টা বলত ৩০ ৰান সংগ্ৰহ কৰি তেওঁ আউট হয় । ইয়াৰ পিছত গীলৰ সৈতে ইনিংছ আগুৱাই নিয়ে শ্বাৰফেন ৰাদাৰফোৰ্ডে । দুয়োজনে তৃতীয় উইকেটত ৩৫ ৰান সংযোজন কৰে ।

অধিনায়ক গীলক বল্ড আউট কৰে যশপ্ৰীত বুমৰাহে । তেওঁ তিনিটা চাৰি আৰু এটা ৬ৰ সহায়ত ৪৩ ৰান কৰিবলৈ সক্ষম হয় । ইয়াৰ পিছত বল্টে ৰাদাৰফোৰ্ডক পেভিলিয়নৰ বাট দেখুৱাই । ২৮ ৰান সংগ্ৰহ কৰি তেওঁ আউট হয় । ইয়াৰ উপৰিও শ্বাহৰুখ খানে ৬, ৰছিদ খানে ২ আৰু গেৰাল্ড ক’টজীয়ে ১২ ৰান সংগ্ৰহ কৰে । একে সময়তে ৰাহুল তেৱাতিয়াই ১১ ৰানত অপৰাজিত হৈ থাকে আৰু আৰছাদ খান ১ ৰানত অপৰাজিত হৈ থাকে । মুম্বাইৰ হৈ ট্ৰেণ্ট ব’ল্ট, যশপ্ৰীত বুমৰাহ আৰু অশ্বিনী কুমাৰে দুটাকৈ উইকেট দখল কৰাৰ বিপৰীতে দীপক চহৰে এটা সফলতা লাভ কৰে ।

মুম্বাইৰ ইনিংছ-

উইল জেকছ আৰু সূৰ্য্যকুমাৰ যাদৱৰ ড্ৰপ কেচৰ সুযোগ ল’ব নোৱাৰিলে মুম্বাই ইণ্ডিয়ানছে । এটা সময়ত মুম্বাইৰ স্ক’ৰ আছিল দুটা উইকেটত ৯৭ ৰান । জেক আৰু সূৰ্য্য ক্ৰীজত আছিল যদিও ২৬ ৰানৰ ভিতৰত ৫টা উইকেট হেৰুৱাই গুজৰাটৰ বিৰুদ্ধে মুম্বাইৰ বেটছমেনসকলে ৮ উইকেটত ১৫৫ ৰান কৰে । ২৬ ৰানত প্ৰথম দুটা উইকেট হেৰুৱাই জেক আৰু সূৰ্য্যই ৪৩টা বলত ৭১ ৰান সংগ্ৰহ কৰি মুম্বাইৰ ইনিংছ চম্ভালে ।

পূর্বৰ মেচখনত অল ৰাউণ্ড প্রদর্শনৰ বাবে প্লেয়াৰ অৱ দ্য মেচৰ সন্মান লাভ কৰা জেকে ৫টা চাৰি আৰু তিনিটা ৬ৰ সহায়ত ৩৫টা বলত ৫৩ ৰান সংগ্ৰহ কৰি মুম্বাইৰ হৈ অর্ধশতক অর্জন কৰাৰ বিপৰীতে সূর্যই ২৪টা বলত ৫টা চাৰিৰ সহায়ত ৩৫ ৰান সংগ্ৰহ কৰে ৷ ৭ উইকেটত ১২৩ ৰানৰ অন্তত কৰবিন বছে ২২টা বলত এটা চাৰি আৰু দুটা ৬ৰ সহায়ত ২৭ ৰান সংগ্ৰহ কৰি মুম্বাইক ১৫০ৰ সীমা অতিক্ৰম কৰাত সহায় কৰে ।

আই পি এলৰ প্লে অফত প্ৰৱেশৰ বাবে শক্তিশালী প্ৰতিদ্বন্দ্বীৰ ভিতৰত মুম্বাই ইণ্ডিয়ানছ (এম আই) আৰু গুজৰাট টাইটানছ (জি টি)ৰ মাজত আজি অনুষ্ঠিত হ’বলগীয়া মেচখন অতি ৰোমাঞ্চকৰ হ’ব বুলি আশা কৰা হৈছে, য’ত গুজৰাটৰ শক্তিশালী টপ অৰ্ডাৰ বেটিঙে মুম্বাইৰ মাৰাত্মক বলিঙৰ সন্মুখীন হ’ব ।

বৰ্তমান পইণ্ট তালিকাত তৃতীয় স্থানত আছে মুম্বাই ইণ্ডিয়ানছ । কিন্তু মুম্বাইৰ নেট ৰান ৰেট সকলো দলৰ ভিতৰত সৰ্বোত্তম । প্লে অফত প্ৰত্যক্ষ স্থান নিশ্চিত কৰিবলৈ বাকী তিনিখন মেচৰ ভিতৰত মাত্ৰ দুখন খেলত জয়ী হ’ব লাগিব দলটো । পাঁচবাৰৰ চেম্পিয়ন মুম্বাইয়ে ইয়াৰে দুখন মেচ নিজৰ ঘৰুৱা খেলপথাৰ ৱাংখেড়ে ষ্টেডিয়ামত খেলিব, য’ত এতিয়ালৈকে পাঁচখন খেলৰ ভিতৰত চাৰিখন খেলত জয়লাভ কৰিছে দলটোৱে ।

একে সময়তে গুজৰাট টাইটানছ পইন্ট তালিকাৰ চতুৰ্থ স্থানত আছে আৰু তেওঁলোকৰ হাতত চাৰিখন খেল বাকী আছে । ইয়াৰে দুখন খেল তেওঁলোকৰ ঘৰুৱা খেলপথাৰ আহমেদাবাদত অনুষ্ঠিত হ’ব, য’ত তেওঁলোকেও পাঁচখন খেলৰ ভিতৰত চাৰিখন খেলত জয়লাভ কৰিছে । শুভমন গীলৰ অধিনায়কত্বত থকা এই দলটোক প্লে অফত প্ৰৱেশ কৰিবলৈ আৰু দুটা জয়ৰ প্ৰয়োজন ।

গুজৰাটৰ বেটিং লাইন আপৰ মেৰুদণ্ড গঠন কৰা তিনিগৰাকী খেলুৱৈ – বি ছাই সুদৰ্শন (৫০৪ ৰান), জোছ বাটলাৰ (৪৭০ ৰান) আৰু অধিনায়ক শুভমন গীল (৪৬৫ ৰান)য়ে সমগ্ৰ প্ৰতিযোগিতাখনত উজ্জ্বল প্ৰদৰ্শন আগবঢ়াই দলটোক বহুবাৰ জয়ৰ দিশত আগুৱাই লৈ গৈছে ।

অৱশ্যে মঙলবাৰৰ খেলখন মুম্বাই ইণ্ডিয়ানছৰ অতি সুষম আৰু মাৰাত্মক বলিং আক্ৰমণৰ বিৰুদ্ধে গুজৰাটৰ বেটছমেনসকলে কেনে প্ৰদৰ্শন আগবঢ়াব তাৰ ওপৰত নিৰ্ভৰ কৰিব । ট্ৰেণ্ট ব’ল্ট (১৬ উইকেট), হাৰ্দিক পাণ্ডিয়া (১৩ উইকেট), যশপ্ৰীত বুমৰাহ (১১ উইকেট) আৰু দীপক চহৰৰ (৯ উইকেট)ৰ দৰে বলাৰৰ সৈতে বিপক্ষৰ বেটছমেনৰ বাবে ৰান সংগ্ৰহ কৰাটো সহজ নহ’ব ।

মুম্বাইয়ে জয়ৰ ধাৰা আৰম্ভ কৰাৰ পিছৰে পৰা (এতিয়ালৈকে একেৰাহে ছটা জয়) ঘৰুৱা বা বিপক্ষৰ মাটিত কোনো দলক ২০০ ৰানতকৈ অধিক ৰান কৰিবলৈ দিয়া নাই । গুজৰাটৰ বাবে এয়া এক সতৰ্কবাণী, যাৰ শক্তি হৈছে ডাঙৰ স্ক’ৰ কৰা আৰু জয় সাব্যস্ত কৰা ।

গুজৰাট টাইটানছৰ সম্ভাৱ্য মূল একাদশ :

ছাই সুদৰ্শন, শুভমন গীল (অধিনায়ক), জোছ বাটলাৰ (উইকেটকীপাৰ), ৱাশ্বিংটন সুন্দৰ, ৰাহুল তেৱাটিয়া, শ্বাহৰুখ খান, ৰছিদ খান, আৰ ছাই কিশোৰ, গেৰাল্ড কোটজী, মহম্মদ চিৰাজ, প্ৰসিদ্ধ কৃষ্ণ ।

ইমপেক্ট চাব : ঈশান্ত শৰ্মা ।

মুম্বাই ইণ্ডিয়ানছৰ সম্ভাৱ্য মূল একাদশ :

ৰিয়ান ৰিকেলটন (উইকেটকীপাৰ), ৰোহিত শৰ্মা, উইল জেকছ, সূৰ্য্যকুমাৰ যাদৱ, তিলক বাৰ্মা, হাৰ্দিক পাণ্ডিয়া (অধিনায়ক), নমন ধীৰ, কৰ্বিন বছ, দীপক চহৰ, ট্ৰেণ্ট ব’ল্ট, যশপ্ৰীত বুমৰাহ ।

ইমপেক্ট চাব : কৰ্ণ শৰ্মা ।

সোমবাৰে অক্ষৰ পেটেলৰ নেতৃত্বত দিল্লী কেপিটেলছে পইন্ট তালিকাৰ শেষৰফালে থকা ছানৰাইজাৰ্ছ হায়দৰাবাদৰ বিৰুদ্ধে খেলপথাৰত নামিব । এই মেচত দিল্লী কেপিটেলছে ঘৰুৱা দুৰ্বল প্ৰদৰ্শনৰ পৰা উভতি আহি জয়ৰ পথলৈ ঘূৰি আহিবলৈ চেষ্টা কৰিব । ঘৰুৱা খেলপথাৰ অৰুণ জেটলী ষ্টেডিয়ামত কলকাতা নাইট ৰাইডাৰ্ছ (কে কে আৰ)ৰ বিৰুদ্ধে অন্তিমখন খেলত ১৪ ৰানত পৰাস্ত হৈছিল দিল্লী কেপিটেলছ । অৱশ্যে বিপক্ষৰ খেলপথাৰত উন্নত প্ৰদৰ্শনৰ বাবে দলটোৱে প্লে অফত প্ৰৱেশৰ আশা জীয়াই ৰাখিছে । আজি হায়দৰাবাদৰ ৰাজীৱ গান্ধী আন্তঃৰাষ্ট্ৰীয় ষ্টেডিয়ামত সন্ধিয়া ৭.৩০ বজাত মুখামুখি হ’ব দুয়োটা দল ।

প্ৰত্যাৱৰ্তনৰ চেষ্টা কৰিব দিল্লীয়ে-

দিল্লী দলে নিজৰ ঘৰুৱা খেলপথাৰত পেট কামিন্স দলৰ বিৰুদ্ধে জয়লাভৰ ওপৰত চকু ৰাখিব । ঘৰুৱা ক্ষেত্ৰত কে কে আৰ আৰু ৰয়েল চেলেঞ্জাৰছ বেংগালুৰু (আৰ চি বি)ৰ বিৰুদ্ধে যোৱা দুখন খেলত পৰাজয়ৰ সন্মুখীন হৈছে দলটোৱে । যোৱা পাঁচখন মেচৰ ভিতৰত তিনিখন খেলত পৰাস্ত হোৱা দিল্লীয়ে লীগৰ এই গুৰুত্বপূৰ্ণ পৰ্যায়ত আৰু অধিক বিপৰ্যয়ৰ পৰা হাত সাৰিবলৈ চেষ্টা কৰিব ।

অক্ষৰ পেটেলৰ আঘাত চিন্তনীয়-

দক্ষিণ আফ্ৰিকাৰ প্ৰবীণ প্ৰবীণ ফাফ ডু প্লেছিছে কে কে আৰৰ বিৰুদ্ধে অৰ্ধশতক অৰ্জন কৰি ফৰ্মলৈ উভতি আহিছে যদিও লেহেমীয়া খেলপথাৰৰ লগত খাপ খুৱাই লোৱাটো তেওঁৰ বাবে চিন্তাৰ কাৰণ হৈয়েই আছে । কে এল ৰাহুলে ৯ খন মেচত ৩৭১ ৰান সংগ্ৰহ কৰি দিল্লীৰ সৰ্বোচ্চ ৰান সংগ্ৰহকাৰী হিচাপে পৰিগণিত হৈছে । ৰাহুলৰ উপৰিও অভিষেক পোৰেলে শীৰ্ষ ক্ৰমত আগ্ৰাসীভাৱে বেটিং কৰি অৰ্ধশতকসহ ২৫০ৰো অধিক ৰান সংগ্ৰহ কৰিছে । দলটোত আছে অল ৰাউণ্ডাৰ বিপৰাজ নিগম যাৰ শেষ অভাৰত দ্ৰুত ৰান সংগ্ৰহ কৰাৰ ক্ষমতা আছে ।

দিল্লীৰ বলিং আক্ৰমণৰ নেতৃত্বত আছে পেচাৰ মিচেল ষ্টাৰ্ক, দুষমন্ত আৰু মুকেশ কুমাৰ আৰু যদি অক্ষৰ সম্পূৰ্ণ ফিট হয় তেন্তে দিল্লী কেপিটেলছৰ আক্রমণ শক্তিশালী হ’ব ৷ আঘাতত ভুগি আছে ​​অধিনায়ক অক্ষৰ পেটেল । ৩০ এপ্ৰিলত কে কে আৰৰ বিৰুদ্ধে ফিল্ডিং কৰি থকাৰ সময়ত বাওঁহাতত আঘাত পোৱাৰ পিছত খেলপথাৰৰ পৰা ওলাই আহিছিল । আঘাতৰ পৰা সুস্থ হৈ ছানৰাইজাৰ্ছৰ বিৰুদ্ধে তেওঁ আজি খেলিব নে নেখেল সেয়া হ’ব লক্ষ্যণীয় ।

আনহাতে, ছানৰাইজাৰ্ছৰ দলে তেওঁলোকৰ অভিজ্ঞতাৰ সুবিধা ল’ব পৰা নাই । পেট কামিন্সৰ নেতৃত্বত ট্ৰেভিছ হেড, ঈশান কিষণ, হেনৰিখ ক্লাচেন আৰু জয়দেৱ উনাদকাটৰ থকা দলটোৱে জয়ৰ বাবে সংগ্ৰাম কৰি আছে ।  শেহতীয়াকৈ উনাদকাটে ছানৰাইজাৰ্ছৰ আই পি এলৰ দুৰ্বল অভিযানৰ বিষয়ে মুকলিকৈ কয় । তেওঁ দলটোৰ হতাশাজনক প্ৰদৰ্শনৰ বাবে দুৰ্বল বলিং আৰু পিটচৰ পৰিস্থিতি সলনি হোৱাৰ বাবে দোষাৰোপ কৰে । অৱশ্যে পেট কামিন্স, মহম্মদ ছামি আৰু হৰ্শাল পেটেলৰ ৰূপত তেওঁৰ শক্তিশালী দল আছে । শুকুৰবাৰে গুজৰাট টাইটানছৰ বিৰুদ্ধে ৩৮ ৰানৰ পৰাজয়ৰ পিছত দলটো প্লে অফৰ দৌৰৰ পৰা প্ৰায় বাহিৰ হৈ পৰিছে ।