অসম পৰ্যটনৰ সোণালী দশক: যোৱা ১০ বছৰত ৬ কোটি পৰ্যটকৰ আগমন
যোৱা এটা দশকত ৰাজ্যখনৰ পৰ্যটন উদ্যোগত অভূতপূৰ্ব উত্থান পৰিলক্ষিত হৈছে
অসম বিধানসভাৰ মজিয়াত দাখিল কৰা তথ্য অনুসৰি, যোৱা এটা দশকত ৰাজ্যখনৰ পৰ্যটন উদ্যোগত অভূতপূৰ্ব উত্থান পৰিলক্ষিত হৈছে । যোৱা ১০ বছৰত অসমে ৬ কোটিতকৈও অধিক দেশী-বিদেশী পৰ্যটকক আদৰণি জনাইছে ।
বিধানসভাৰ চলিত অধিবেশনত কংগ্ৰেছ বিধায়ক ৰেকিবুদ্দিন আহমেদৰ এক প্ৰশ্নৰ লিখিত উত্তৰ দি পৰ্যটন মন্ত্ৰী অজন্তা নেওগে এই গুৰুত্বপূৰ্ণ তথ্য সদৰী কৰে ।
১০ বছৰৰ পৰ্যটকৰ পৰিসংখ্যা
পৰ্যটন মন্ত্ৰীগৰাকীয়ে সদনক জনোৱা মতে, ২০১৬-১৭ বৰ্ষৰ পৰা ২০২৫-২৬ বৰ্ষৰ ভিতৰত অসমলৈ অভিলেখসংখ্যক পৰ্যটকৰ আগমন ঘটিছে ।
সৰ্বমুঠ পৰ্যটক: ৬,০৪,৮৫,৬৩৮ গৰাকী
বিদেশী পৰ্যটক: ২,৪১,১৯২ গৰাকী
ক’ভিডৰ প্ৰভাৱ আৰু পৰৱৰ্তী অভিলেখ
প্ৰতিবেদন অনুসৰি, ক’ভিড মহামাৰীৰ ভয়াৱহতা আৰু লকডাউনৰ বাবে ২০২০-২১ বৰ্ষত অসমৰ পৰ্যটন খণ্ড আটাইতকেই বেছি প্ৰভাৱিত হৈছিল । কিন্তু তাৰ ঠিক পৰৱৰ্তী সময়ছোৱাতে পৰ্যটন খণ্ডই এক বৃহৎ জাঁপ মাৰিবলৈ সক্ষম হয় ।
সৰ্বাধিক আগমন (২০২২-২৩): মহামাৰীৰ পৰৱৰ্তী এই বৰ্ষটোত অসমে সৰ্বাধিক পৰ্যটক লাভ কৰে । এই সময়ছোৱাত ১৮,৯৪৬ গৰাকী বিদেশী পৰ্যটকসহ মুঠ ৯৮,৩১,১৪১ গৰাকী লোকে ৰাজ্যখন ভ্ৰমণ কৰে ।
সৰ্বনিম্ন আগমন (২০২০-২১): ক’ভিডকালীন ভ্ৰমণ নিষেধাজ্ঞা তথা ভীতিৰ বাবে এই বৰ্ষত পৰ্যটকৰ সংখ্যা মাত্ৰ ১৩,৫২,০৩৭ গৰাকীলৈ হ্ৰাস পায়, যাৰ ভিতৰত বিদেশী পৰ্যটক আছিল মাত্ৰ ৩৪৭ গৰাকী ।
বিদেশী পৰ্যটকৰ মূল আকৰ্ষণস্থল অসম
অসম ভ্ৰমণ কৰা বিদেশী নাগৰিকসকলৰ মূল উৎস দেশসমূহৰ ভিতৰত প্ৰধানকৈ যুক্তৰাজ্য, ফ্ৰান্স, সংযুক্ত আৰৱ আমিৰশ্বাহী, অষ্ট্ৰেলিয়া, আমেৰিকা যুক্তৰাষ্ট্ৰ, চুইজাৰলেণ্ড, নেপাল, বাংলাদেশ, কানাডা, শ্ৰীলংকা, জাপান, স্পেইন, বেলজিয়াম আৰু ইজৰাইল আদি দেশ অন্তৰ্ভুক্ত আছে ।
উন্নত আইন-শৃংখলা আৰু ভ্ৰমণ নিৰ্দেশনা সংশোধন
ৰাজ্যখনৰ পৰ্যটন খণ্ডৰ বাবে এক ডাঙৰ ইতিবাচক বাৰ্তা কঢ়িয়াই মন্ত্ৰী অজন্তা নেওগে সদনক জনায় যে অসমৰ আইন-শৃংখলা পৰিস্থিতিৰ লক্ষণীয় উন্নতি ঘটিছে ।
তেওঁ কয়- “ৰাজ্যৰ শান্তিপূৰ্ণ পৰিৱেশৰ প্ৰতি লক্ষ্য ৰাখি শেহতীয়াকৈ অষ্ট্ৰেলিয়া, জাপান আৰু ইউৰোপীয় ইউনিয়নৰ সকলো ২৭ খন সদস্য ৰাষ্ট্ৰই অসমৰ বাবে জাৰি কৰা তেওঁলোকৰ পূৰ্বৰ ভ্ৰমণ নিৰ্দেশনা সংশোধন কৰিছে ।”
লগতে পঢ়ক : ৰাজ্যত শীঘ্ৰে গঠন হ’ব ১৪টা নতুন চক্ৰ বিষয়াৰ কাৰ্যালয়