দিল্লীত বিজেপিৰ নতুন কাৰ্যালয় উদ্বোধন প্ৰধানমন্ত্ৰী মোদীৰ
সোমবাৰে প্ৰধানমন্ত্ৰী মোদীয়ে নতুন দিল্লী বিজেপিৰ নতুন কাৰ্যালয় উদ্বোধন কৰে । ভাষণত তেওঁ কয়, “আমাৰ বাবে বিজেপিৰ কাৰ্যালয় মন্দিৰতকৈ কম নহয় । আমাৰ বাবে ই অট্টালিকা নহয়, মন্দিৰহে ।” তেওঁ কয় যে বিজেপিৰ কাৰ্যালয়ে আমাক মাটিৰ লগত সংযোগ কৰি ৰাখে । দিল্লীৰ সৈতে বিজেপিৰ আন্তৰিক সম্পৰ্ক আছে । কর্মকৰ্তাসকলৰ ত্যাগে বিজেপিক শক্তিশালী কৰি তুলিছে ৷ ৰাইজৰ আকাংক্ষা পূৰণৰ বাবে কঠোৰ পৰিশ্ৰম অব্যাহত আছে বুলি মন্তব্য কৰে প্ৰধানমন্ত্ৰী মোদীয়ে ।
প্ৰধানমন্ত্ৰী মোদীয়ে কয় যে নৱৰাত্ৰিৰ শুভ ক্ষণত দিল্লী বিজেপিয়ে কাৰ্যালয় লাভ কৰিছে । বিজেপি প্ৰতিষ্ঠা হোৱাৰ ৪৫ বছৰ হ’ল । যি বীজৰ পৰা বিজেপি ডাঙৰ হৈ ইমান ডাঙৰ গছ হৈছে, সেই বীজটো ১৯৫১ চনত জন সংঘ বুলি ৰোপণ কৰা হৈছিল । ১৯৮০ চনত যেতিয়া বিজেপি প্ৰতিষ্ঠা হৈছিল তেতিয়া দিল্লী বিজেপিৰ ভি কে মালহোত্ৰা প্ৰথম সভাপতি হৈছিল । দিল্লী আৰু বিজেপিৰ সম্পৰ্ক কেৱল এখন চহৰ আৰু এটা দলৰ নহয় বুলি মন্তব্য কৰে প্ৰধানমন্ত্ৰীগৰাকীয়ে । সেৱা, সংস্কৃতি, আনন্দ-দুখত একেলগে থকাৰ । প্ৰথমে জনসংঘ হিচাপে আৰু তাৰ পিছত বিজেপি হিচাপে আমাৰ দল সদায় দিল্লীৰ স্বাৰ্থৰ প্ৰতি দায়বদ্ধ বুলি কয় তেওঁ ।
প্ৰধানমন্ত্ৰীয়ে কয় যে জনসংঘ প্ৰতিষ্ঠা হোৱাৰ পিছৰে পৰা আমি দিল্লীবাসীক সকলো প্ৰকাৰে সেৱা আগবঢ়াই আহিছো । জৰুৰীকালীন অৱস্থাত জনসংঘৰ নেতাসকলে দিল্লীৰ জনসাধাৰণৰ সমান্তৰালভাৱে চৰকাৰী দমনৰ বিৰুদ্ধে যুঁজিছিল । দিল্লীৰ আত্মাক গভীৰভাৱে আঘাত কৰা ১৯৮৪ চনৰ হিংসাৰ সময়তো দিল্লী বিজেপিয়ে আমাৰ শিখ ভাতৃ,কসক সুৰক্ষা দিছিল ।
তেওঁ লগতে কয় যে এন ডি এ চৰকাৰে দেশখনক সুশাসনৰ এক নতুন আৰ্হি প্ৰদান কৰিছে । আমি উন্নয়ন আৰু উত্তৰাধিকাৰৰ মন্ত্ৰ লৈ আগবাঢ়িছো । আমি দেশ আৰু ইয়াৰ নাগৰিকৰ সুৰক্ষাক সৰ্বোচ্চ অগ্ৰাধিকাৰ দিছো । আমি দেশখনক বৃহৎ কেলেংকাৰীৰ পৰা মুক্ত কৰি দুৰ্নীতিৰ বিৰুদ্ধে নিৰ্ণায়ক যুঁজত আস্থা জগাই তুলিছো ।
লগতে পঢ়ক : খেলপথাৰত অপাৰেচন সিন্দুৰ : ভাৰতৰ এছিয়া কাপ বিজয়ৰ পাছত প্ৰধানমন্ত্ৰী মোদীৰ বিশেষ টুইট
