লণ্ডনত হোৱা এই নিলামত উপস্থিত আছিল কাব্যা মাৰাণ, দলৰ মুখ্য প্ৰশিক্ষক ডেনিয়েল ভেট্টৰী
ইংলেণ্ডৰ ফ্ৰেঞ্চাইজি লীগ দ্য হাণ্ড্ৰেডৰ খেলুৱৈ নিলামৰ পিছতে বিতৰ্কৰ আৱৰ্তত সোমাই পৰিছে ছানৰাইজাৰ্ছ লীডছ । ২০২৬ চনৰ ছিজনৰ নিলামত বৃহস্পতিবাৰে (১২ মাৰ্চ) পাকিস্তানী মিষ্ট্ৰী স্পীনাৰ আব্ৰাৰ আহমেদক ১ লাখ ৯০ হাজাৰ পাউণ্ড (প্ৰায় ২.৩৪ কোটি টকা)ত ক্ৰয় কৰা দলটোৱে ছ’চিয়েল মিডিয়াত এক ব্যাপক বিতৰ্কৰ সৃষ্টি কৰে । এই সিদ্ধান্তৰ বিষয়ে আলোচনা কৰা হৈছে কাৰণ ভাৰতীয় মালিকানাধীন ফ্ৰেঞ্চাইজিটোয়ে প্ৰথমবাৰৰ বাবে দ্য হাণ্ড্ৰেডত পাকিস্তানী খেলুৱৈক চুক্তিবদ্ধ কৰিছে ।
আব্ৰাৰ আহমেদক ক্ৰয় কৰাৰ পিছত ভাৰতৰ বহু ক্ৰিকেট অনুৰাগীয়ে ছ’চিয়েল মিডিয়াত ক্ষোভ প্ৰকাশ কৰে । ব্যৱহাৰকাৰীসকলে ছানৰাইজাৰ্ছ ফ্ৰেঞ্চাইজি আৰু ইয়াৰ চিইঅ’ কাব্যা মাৰাণক লক্ষ্য কৰি কয় যে পাকিস্তানী খেলুৱৈক চুক্তিবদ্ধ কৰাটো “ৰাষ্ট্ৰীয় আৱেগৰ” বিৰুদ্ধে । ২০০৮ চনৰ পৰা পাকিস্তানী খেলুৱৈ ইণ্ডিয়ান প্ৰিমিয়াৰ লীগৰ পৰা বৰ্জন হৈ থকাৰ সময়ত ভাৰতীয় মালিকনাধীন এটা দলে কেনেকৈ এনে পদক্ষেপ ল’ব পাৰে বুলিও একাংশ ব্যৱহাৰকাৰীয়ে প্ৰশ্ন উত্থাপন কৰে । উল্লেখ্য যে ভাৰত আৰু পাকিস্তানৰ মাজত ৰাজনৈতিক উত্তেজনাৰ বাবে ২০০৮ চনৰ পৰা পাকিস্তানী খেলুৱৈক আই পি এলৰ পৰা বাহিৰত ৰখা হৈছে ।
লণ্ডনত হোৱা এই নিলামৰ টেবুলত উপস্থিত আছিল কাব্যা মাৰাণ, দলৰ মুখ্য প্ৰশিক্ষক ডেনিয়েল ভেট্টৰী । নিলামৰ সময়ত ছানৰাইজাৰ্ছ লিডছে ট্ৰেণ্ট ৰকেটছক পৰাস্ত কৰি আব্ৰাৰ আহমেদক ক্ৰয় কৰে । আব্ৰাৰক ক্ৰয় কৰাৰ কেইঘণ্টামানৰ পাছত ছানৰাইজাৰ্ছ লিডছৰ অফিচিয়েল এক্স একাউণ্টো ছাচপেন্ড কৰা হয় । অৱশ্যে প্লেটফৰ্মে ইয়াৰ কাৰণ স্পষ্ট কৰা নাই ।
ছানৰাইজাৰ্ছ লিডছৰ গৰাকী হৈছে উদ্যোগপতি কালানিথি মাৰাণৰ নেতৃত্বৰ ভাৰতীয় সংবাদ মাধ্যমৰ সংঘবদ্ধ সংস্থা ছান গ্ৰুপ । যোৱা বছৰ এই গোটটোৱে ছানৰাইজাৰ্ছ লিডছৰ সম্পূৰ্ণ অংশীদাৰিত্ব লাভ কৰিছিল । ইয়াৰ পূৰ্বে এই দলটো নৰ্দাৰ্ণ ছুপাৰচাৰ্জাৰ নামেৰে জনাজাত আছিল ।
লগতে পঢ়ক : ফিফা বিশ্বকাপতো মধ্যপ্ৰাচ্যৰ যুদ্ধৰ প্ৰভাৱ, ইৰানে ল’লে ডাঙৰ সিদ্ধান্ত
