ইছৰোৱে পুনৰবাৰ নিজৰ দক্ষতা প্ৰদৰ্শন কৰিছে । এইবাৰ আন এক শক্তিশালী অভিযানৰ বাবে সাজু হৈছে মহাকাশ সংস্থাটো ।
ভাৰতীয় মহাকাশ গৱেষণা সংস্থা চমুকৈ ইছৰোৱে পুনৰবাৰ নিজৰ দক্ষতা প্ৰদৰ্শন কৰিছে । অন্ধ্ৰ প্ৰদেশৰ শ্ৰীহৰিকোটাৰ সতীশ ধাৱান মহাকাশ কেন্দ্ৰৰ পৰা অহা ২৪ ডিচেম্বৰ, ২০২৫ তাৰিখে পুৱা ৮:৫৪ বজাত এল ভি এম-৩ ৰকেটৰ ষষ্ঠটো অপাৰেশ্যনেল উৎক্ষেপণ হ’ব । এই অভিযানৰ নাম LVM3-M6/Bluebird Block-2 মিছন ।
এইটো এটা সম্পূৰ্ণ বাণিজ্যিক অভিযান, যাৰ জৰিয়তে আমেৰিকাৰ কোম্পানী এ এছ টি স্পেচম’বাইলৰ ব্লুবাৰ্ড ব্লক-২ যোগাযোগ উপগ্ৰহ উৎক্ষেপণ কৰা হ’ব । ইছৰোৰ বাণিজ্যিক শাখা নিউস্পেচ ইণ্ডিয়া লিমিটেড (এন এছ আই এল)ৰ জৰিয়তে এই অভিযান চলোৱা হৈছে ।
প্ৰায় ৬.৫ টন ওজনৰ ব্লুবাৰ্ড ব্লক-২ উপগ্ৰহটো হ’ব পৃথিৱীৰ নিম্ন কক্ষপথত নিয়োজিত হ’বলগীয়া আটাইতকৈ ডাঙৰ বাণিজ্যিক যোগাযোগ উপগ্ৰহ । ইয়াৰ উপৰিও ই ভাৰতৰ মাটিৰ পৰা এল ভি এম-৩ ৰকেটৰ দ্বাৰা উৎক্ষেপণ কৰিবলগা আটাইতকৈ গধুৰ পেলোড হ’ব ।
LVM-3 ৰকেট কি ?
ইছৰোৰ দ্বাৰা নিৰ্মিত আৰু পূৰ্বতে GSLV Mk-III নামেৰে জনাজাত LVM-3 (Launch Vehicle Mark-3) ভাৰতৰ আটাইতকৈ শক্তিশালী ৰকেট । ইয়াক প্ৰায়ে বাহুবলী ৰকেট বুলি কোৱা হয় । ই তিনিটা ষ্টেজৰ এটা ৰকেট-
দুটা চলিড ষ্ট্ৰেপ-অন মটৰ (S200)
এটা লিকুইড কোৰ ষ্টেজ (L110)
এটা ক্ৰাইজেনিক আপাৰ ষ্টেজ (C25)
ইয়াৰ উচ্চতা ৪৩.৫ মিটাৰ, লিফ্ট অফ ওজন ৬৪০ টন আৰু ই ৪ টন পৰ্যন্ত পেলোড জিঅ’চিনক্ৰ’নাছ ট্ৰেন্সফাৰ অৰ্বিট (GTO)লৈ কঢ়িয়াই নিব পাৰে । পৃথিৱীৰ কম কক্ষপথৰ বাবে ইয়াৰ ক্ষমতা প্ৰায় ১০ টন ।
ইয়াৰ পূৰ্বে LVM-3 এ চন্দ্ৰযান-২, চন্দ্ৰযান-৩ আৰু দুটা OneWeb অভিযানকে ধৰি কেইবাটাও গুৰুত্বপূৰ্ণ অভিযান সফলতাৰে উৎক্ষেপণ কৰি ৭২টা উপগ্ৰহ উৎক্ষেপণ কৰিছে । ইয়াৰ পূৰ্বৰ অভিযান আছিল LVM3-M-5, যিয়ে ২০২৫ চনৰ ২ নৱেম্বৰত CMS-03 উপগ্ৰহ সফলতাৰে উৎক্ষেপণ কৰিছিল ।
লগতে পঢ়ক : সাতটাকৈ উৎক্ষেপণৰ প্ৰস্তুতি ইছৰোৰ, ২০২৬ৰ মাৰ্চৰ ভিতৰত প্ৰথমটো মানৱবিহীন অভিযান
