বৰ্তমান জৰ্ডান ভ্ৰমণত আছে প্ৰধানমন্ত্ৰী মোদী । এই ভ্ৰমণ কালত বাৰতে জৰ্ডানৰ সৈতে পাঁচখন বুজাবুদিৰ চুক্তিত স্বাক্ষৰ কৰে ।
সোমবাৰে ভাৰত আৰু জৰ্ডানৰ মাজত সন্ত্ৰাসবাদ বিৰোধী ব্যৱস্থা, গাজাকে ধৰি আঞ্চলিক উন্নয়ন আৰু দ্বিপাক্ষিক সহযোগিতাৰ সন্দৰ্ভত আলোচনা হয় । আম্মানত প্ৰধানমন্ত্ৰী নৰেন্দ্ৰ মোদী আৰু দ্বিতীয় ৰজা আব্দুল্লাৰ মাজত হোৱা আলোচনাৰ অন্তত দুয়োপক্ষই পাঁচখন বুজাবুজিৰ চুক্তিত স্বাক্ষৰ কৰে । এই আলোচনাত বাণিজ্য আৰু বিনিয়োগ, প্ৰতিৰক্ষা আৰু নিৰাপত্তা, সন্ত্ৰাসবাদ বিৰোধী আৰু উগ্ৰবাদমুক্তকৰণ, সাৰ আৰু কৃষি, নবীকৰণযোগ্য শক্তি আৰু পৰ্যটন আদি খণ্ডত সহযোগিতা বৃদ্ধিৰ ওপৰত গুৰুত্ব আৰোপ কৰা হয় ।
সন্ত্ৰাসবাদ আৰু উগ্ৰবাদৰ বিৰুদ্ধে যুঁজ দিয়াৰ ক্ষেত্ৰত দ্বিতীয় ৰজা আব্দুল্লাৰ ভূমিকাক প্ৰশংসা কৰি প্ৰধানমন্ত্ৰী মোদীয়ে অঞ্চলটোত শান্তি আৰু স্থিতিশীলতাৰ প্ৰতি ভাৰতৰ সমৰ্থন পুনৰ দৃঢ় কৰে ।
তিনিখন দেশৰ ভ্ৰমণৰ প্ৰথম কাৰ্যসূচী হিচাবে জৰ্ডানত উপস্থিত হয় প্ৰধানমন্ত্ৰী মোদী, য’ত ইথিওপিয়া আৰু ওমানো অন্তৰ্ভুক্ত আছে । উল্লেখ্য যে, ৩৭ বছৰৰ ভিতৰত ভাৰতীয় প্ৰধানমন্ত্ৰীৰ এয়া জৰ্ডানলৈ প্ৰথম পূৰ্ণাংগ দ্বিপাক্ষিক ভ্ৰমণ । এই ভ্ৰমণ দুয়োখন দেশৰ কূটনৈতিক সম্পৰ্কৰ ৭৫ বছৰীয়া জয়ন্তীৰ লগত সংগতি ৰাখি কৰা হৈছে । সোমবাৰে আম্মান বিমানবন্দৰত মোদীক উষ্ম আদৰণি জনায় জৰ্ডানৰ প্ৰধানমন্ত্ৰী জাফৰ হাছানে ।
পাঁচখন বুজাবুজিৰ চুক্তিত স্বাক্ষৰ-
-নতুন আৰু নবীকৰণযোগ্য শক্তি খণ্ডত কাৰিকৰী সহযোগিতাৰ বুজাবুজি চুক্তি
-জলসম্পদ ব্যৱস্থাপনা আৰু উন্নয়ন খণ্ডত সহযোগিতাৰ বুজাবুজি চুক্তি
-পেট্ৰা আৰু ইলোৰাৰ মাজত চুক্তি
-২০২৫-২০২৯ বৰ্ষৰ বাবে সাংস্কৃতিক বিনিময় কাৰ্যসূচীৰ নবীকৰণ
-ডিজিটেল ৰূপান্তৰৰ বাবে পৰিসৰত ৰূপায়িত সফল ডিজিটেল সমাধানসমূহ ভাগ-বতৰা কৰাৰ খণ্ডত সহযোগিতাৰ উদ্দেশ্য পত্ৰ
ভাৰত জৰ্ডানৰ তৃতীয় বৃহত্তম বাণিজ্যিক অংশীদাৰ বুলি উল্লেখ কৰি প্ৰধানমন্ত্ৰী মোদীয়ে আগন্তুক পাঁচ বছৰত দ্বিপাক্ষিক বাণিজ্য বৰ্তমানৰ ২.৮ বিলিয়ন ডলাৰৰ পৰা ৫ বিলিয়ন ডলাৰলৈ বৃদ্ধি কৰাৰ প্ৰস্তাৱ আগবঢ়ায় । তেওঁ জৰ্ডানৰ ডিজিটেল পেমেণ্ট চিষ্টেম আৰু ভাৰতৰ ইউনিফাইড পেমেণ্টছ ইন্টাৰফেছৰ মাজত সহযোগিতাৰো আহ্বান জনায় ।
লগতে পঢ়ক : ভাৰত-ৰাছিয়াৰ সামৰিক সহযোগিতাত অনুমোদন, RELOS চুক্তিত স্বাক্ষৰ পুটিনৰ
