আগন্তুক অসম বিধানসভা নিৰ্বাচনৰ বাবে বিজেপিয়ে নিৰ্বাচনী প্ৰভাৰী নিযুক্তি দিছে ।
২০২৬ৰ অসম বিধানসভা নিৰ্বাচনৰ কাউণ্টডাউন ইতিমধ্যে আৰম্ভ হৈছে । আগন্তুক নিৰ্বাচনৰ প্ৰতি লক্ষ্য ৰাখি ভাৰতীয় জনতা পাৰ্টীয়ে নিৰ্বাচনৰ দায়িত্বত থকা বিষয়াসকলৰ নাম ঘোষণা কৰিছে । সোমবাৰে ৰাষ্ট্ৰীয় বিজেপিৰ সভাপতি জগত প্ৰকাশ নাড্ডাই আনুষ্ঠানিকভাৱে এই নিযুক্তি প্ৰদান কৰিছে ।
দলৰ ৰাষ্ট্ৰীয় উপ-সভাপতি তথা সাংসদ বৈজয়ন্ত পাণ্ডাক অসমৰ নিৰ্বাচনী প্ৰভাৰী নিযুক্তি দিছে বিজেপিয়ে । লগতে জম্মু-কাশ্মীৰ বিধানসভাৰ বিৰোধী দলৰ নেতা তথা বিধায়ক সুশীল কুমাৰ শৰ্মা আৰু কেন্দ্ৰীয় চৰকাৰৰ প্ৰাক্তন মন্ত্ৰী দৰ্শনা বেন জৰ্দোশক নিৰ্বাচনৰ সহ-প্ৰভাৰী হিচাবে নিযুক্তি দিয়া হৈছে ।
বিজেপিৰ ৰাষ্ট্ৰীয় সাধাৰণ সম্পাদক অৰুণ সিঙৰ স্বাক্ষৰ সম্বলিত পত্ৰত কোৱা হৈছে যে, এই নিযুক্তিসমূহ তাৎক্ষণিকভাৱে কাৰ্যকৰী হোৱাকৈ প্ৰদান কৰা হৈছে ।
লগতে পঢ়ক : বিজেপিৰ মুখ্য কাৰ্যালয়ত দায়িত্ব গ্ৰহণ কৰিলে নীতিন নবীনে, শ্বাহ-নাড্ডাই জনালে শুভেচ্ছা
