তাৎক্ষণিক যুদ্ধবিৰতিৰ সহমতত উপনীত পাকিস্তান-আফগানিস্তান
কাটাৰৰ বৈদেশিক মন্ত্ৰালয়ে দেওবাৰে পুৱা ঘোষণা কৰে যে তুৰ্কীৰ মধ্যস্থতাত কাটাৰৰ ডোহাত অনুষ্ঠিত হোৱা আলোচনাত পাকিস্তান আৰু আফগানিস্তানে তাৎক্ষণিক যুদ্ধবিৰতিৰ বাবে সন্মতি প্ৰকাশ কৰিছে । এই যুদ্ধবিৰতিৰ লক্ষ্য হৈছে এসপ্তাহ ধৰি চলি থকা ভয়াৱহ সীমান্ত সংঘৰ্ষৰ অন্ত পেলোৱা, য’ত কেইবা ডজন লোকৰ মৃত্যু আৰু শ শ লোক আহত হৈছে ।
প্ৰকাশিত এক তথ্য অনুসৰি কাটাৰে কয় যে যুদ্ধবিৰতি স্থায়ী আৰু সঠিকভাৱে কাৰ্যকৰী হোৱাটো নিশ্চিত কৰাৰ বাবে আগন্তুক দিনত আৰু অধিক বৈঠক অনুষ্ঠিত কৰিবলৈ দুয়োপক্ষই সন্মতি প্ৰকাশ কৰিছে । শেহতীয়াকৈ সীমান্তত সংঘটিত হোৱা যুদ্ধত কেইবাজনো লোকৰ মৃত্যু হোৱাৰ লগতে শতাধিক লোক আহত হোৱাৰ পিছত এই আলোচনা অনুষ্ঠিত হৈছে । ২০২১ চনত তালিবান পুনৰ ক্ষমতালৈ অহাৰ পিছত চুবুৰীয়া দেশ দুখনৰ মাজত এইটোৱেই আটাইতকৈ গুৰুতৰ সংঘাত ।
আফগান বিষয়াসকলে কয় যে কাবুলৰ প্ৰতিনিধি দলটোৰ নেতৃত্বত প্ৰতিৰক্ষা মন্ত্ৰী মোল্লা মহম্মদ ইয়াকুব, আনহাতে পাকিস্তানৰ প্ৰতিৰক্ষা মন্ত্ৰী খোৱাজা আছিফে তালিবানৰ প্ৰতিনিধিৰ সৈতে আলোচনাত অংশগ্ৰহণ কৰে ।
পাকিস্তানৰ অভিযোগ-
পাকিস্তানৰ বৈদেশিক মন্ত্ৰালয়ে কয় যে আফগানিস্তানৰ পৰা পাকিস্তানলৈ সীমা অতিক্ৰম কৰা সন্ত্ৰাসবাদ বন্ধ কৰি পাক-আফগান সীমান্তত শান্তি আৰু স্থিতিশীলতা ঘূৰাই অনাটোৱেই আছিল আলোচনাৰ মূল লক্ষ্য । ইছলামবাদে সীমান্তৰ সিপাৰৰ পৰা পাকিস্তানত আক্ৰমণ চলাই থকা সন্ত্ৰাসবাদীক ৰুধিবলৈ দাবী জনোৱাৰ পিছতে হিংসাত্মক পৰিস্থিতিৰ সৃষ্টি হয় ।
তালিবানৰ প্ৰত্যুত্তৰ-
তালিবানে উগ্ৰপন্থীক আশ্ৰয় দিয়া বুলি অস্বীকাৰ কৰি পাকিস্তানে ভুল তথ্য প্ৰচাৰ কৰা আৰু আফগানিস্তানক অস্থিৰ কৰাৰ বাবে ইছলামিক ষ্টেটৰ সৈতে জড়িত গোটসমূহক সমৰ্থন কৰা বুলি অভিযোগ উত্থাপন কৰে । পাকিস্তানে অৱশ্যে এই অভিযোগ নাকচ কৰি কয় যে উগ্ৰপন্থীয়ে দীৰ্ঘদিন ধৰি চৰকাৰক উফৰাই দেশখনত কঠোৰ ইছলামিক শাসন প্ৰয়োগ কৰাৰ ষড়যন্ত্ৰ ৰচনা কৰি আহিছে ।
ইফালে শুকুৰবাৰে যুদ্ধবিৰতিৰ সময়সীমা বৃদ্ধি কৰাৰ মাত্ৰ কেইঘণ্টামানৰ পিছতে পাকিস্তানে সাধাৰণ নাগৰিকক লক্ষ্য কৰি বিমান আক্ৰমণ চলাইছিল বুলি আফগানিস্তানে প্ৰকাশ কৰিছে । কাবুলে কয় যে আলোচনা চলি থাকিবলৈ তেওঁলোকৰ সৈন্যক আক্ৰমণ নকৰিবলৈ নিৰ্দেশ দিয়া হৈছে । পাক্তিকা প্ৰদেশত সংঘটিত পাকিস্তানৰ এই আক্ৰমণত তিনিগৰাকী আফগান খেলুৱৈ নিহত হয় । ইয়াৰ পিছতে পাকিস্তানত অনুষ্ঠিত হোৱা টি-২০ ক্ৰিকেট শৃংখলাৰ পৰা আফগানিস্তান আঁতৰি যায় ।
লগতে পঢ়ক : বাংলাদেশত অথন্তৰঃ জুই আৰু ক’লা ধোঁৱাই আৱৰি ধৰিলে ঢাকা বিমানবন্দৰ
