দেশত সোনকালেই আৰম্ভ হ’ব প্লাষ্টিক নোটৰ পৰীক্ষা
আপোনাৰ হাতত থকা ১০ বা ২০ টকাৰ কাগজৰ নোট সোনকালেই সলনি হ’ব নেকি? এই প্ৰশ্নৰ মাজতেই আহিল ডাঙৰ আপডেট । সংসদত মোদী চৰকাৰে নিশ্চিত কৰিছে- দেশত অতি সোনকালে আৰম্ভ হ’ব ১০ আৰু ২০ টকাৰ পলিমাৰ (প্লাষ্টিক) নোটৰ ফিল্ড ট্ৰায়েল ।
ভাৰতীয় ৰিজাৰ্ভ বেংক (RBI)-ৰ প্ৰস্তাৱত কেন্দ্ৰীয় চৰকাৰে অনুমোদন জনোৱাৰ পিছতে এই গুৰুত্বপূৰ্ণ তথ্য সংসদত প্ৰকাশ কৰা হৈছে । প্ৰথম পৰ্যায়ত ১০ টকা আৰু ২০ টকাৰ ১০০-১০০ কোটি পলিমাৰ নোট পৰীক্ষামূলকভাৱে বজাৰত এৰা হ’ব । যদি এই পৰীক্ষা সফল হয়, তেন্তে এই নোটসমূহ নিয়মীয়াকৈ জাৰি কৰাৰ পৰিকল্পনা আছে ।
কাগজৰ নোট বন্ধ হ’ব নেকি?
এই প্ৰশ্নটোৰ উত্তৰো চৰকাৰে স্পষ্টকৈ দিছে- নহয় । বৰ্তমান চলি থকা কাগজৰ ১০ আৰু ২০ টকাৰ নোট বন্ধ কৰা নহ’ব । নতুন প্লাষ্টিক নোটৰ সৈতে কাগজৰ নোটো একেলগে চলি থাকিব ।
চৰকাৰৰ মতে, এই মুহূৰ্তত কাগজৰ নোট সম্পূৰ্ণৰূপে পলিমাৰ নোটেৰে সলনি কৰাৰ কোনো পৰিকল্পনা নাই ।
প্লাষ্টিক নোট কিয় বিশেষ?
বিশেষজ্ঞসকলৰ মতে, পলিমাৰ নোট সাধাৰণ কাগজৰ নোটতকৈ অধিক দীৰ্ঘদিন ব্যৱহাৰ কৰিব পাৰি । এই নোট সহজে ফাটি নাযায়, পানীত সহজে নষ্ট নহয় আৰু নকল কৰাও যথেষ্ট কঠিন । সেইবাবে দীৰ্ঘম্যাদীভাৱে ছপাৰ খৰচো হ্ৰাস হোৱাৰ সম্ভাৱনা থাকে ।
বিশ্বত কেতিয়াৰ পৰা আৰম্ভ হৈছিল?
প্লাষ্টিক নোট প্ৰথমবাৰৰ বাবে ১৯৮৮ চনত অষ্ট্ৰেলিয়াই প্ৰৱৰ্তন কৰিছিল । এতিয়া বিশ্বৰ ৫০ৰো অধিক দেশত এই ধৰণৰ নোট ব্যৱহাৰ কৰা হৈ ছে। ভাৰততো এতিয়া সেই দিশতে এক গুৰুত্বপূৰ্ণ পদক্ষেপ লোৱা হৈছে ।
অৱশ্যে, এই প্ৰকল্প এতিয়াও ফিল্ড ট্ৰায়েল পৰ্যায়ত আছে । পৰীক্ষাৰ ফলাফল সন্তোষজনক হ’লেহে ভৱিষ্যতে এই নোটসমূহ নিয়মীয়াকৈ বজাৰত উপলব্ধ হ’ব ।
লগতে পঢ়ক : পশ্চিম এচিয়াৰ সংঘাতৰ আশংকাৰ মাজতো ভাৰতৰ অৰ্থনীতিৰ বাবে আশাব্যঞ্জক খবৰ
