প্ৰধানমন্ত্ৰী নৰেন্দ্ৰ মোদীয়ে মেলবৰ্ণত ভাৰতীয় সমাজক সম্বোধন কৰে।এই অনুষ্ঠানত ৩০ হাজাৰৰো অধিক লোক উপস্থিত থাকে। এই সময়চোৱাত প্ৰধানমন্ত্ৰী মোদীয়ে অষ্ট্ৰেলিয়াৰ উন্নয়নত ভাৰতীয়ৰ অৱদানৰ প্ৰশংসা কৰে।
প্ৰধানমন্ত্ৰী নৰেন্দ্ৰ মোদী বৰ্তমান তিনিদিনীয়া অষ্ট্ৰেলিয়া ভ্ৰমণসূচীৰে মেলবৰ্ণত আছে। এই ভ্ৰমণকালতে তেওঁ বৃহস্পতিবাৰে মেলবৰ্ণত থকা প্ৰৱাসী ভাৰতীয়ক সম্বোধন কৰে। এই অনুষ্ঠানত ৩০ হাজাৰ ভাৰতীয়ৰ মাজত অষ্ট্ৰেলিয়াৰ প্ৰধানমন্ত্ৰী এন্থনী আলবানিজো উপস্থিত থাকে। সমগ্ৰ ষ্টেডিয়ামখন ‘মোদী-মোদী’ ধ্বনিৰে মুখৰিত হৈ পৰে।
মেলবৰ্ণত অষ্ট্ৰেলিয়াৰ প্ৰধানমন্ত্ৰী এন্থনী আলবানিজে প্ৰধানমন্ত্ৰী মোদীক উষ্ম আদৰণি জনায়। তেওঁ প্ৰধানমন্ত্ৰী মোদীক অষ্ট্ৰেলিয়াৰ এজন প্ৰকৃত বন্ধু বুলি অভিহিত কৰে। আলবানিজে কয়— ‘এয়া দুখন বৃহৎ গণতান্ত্ৰিক দেশৰ বন্ধুত্বৰ উদযাপন।’
প্ৰধানমন্ত্ৰী মোদীয়ে নিজৰ ভাষণত উষ্ম আদৰণি জনোৱাৰ বাবে অষ্ট্ৰেলিয়াৰ প্ৰধানমন্ত্ৰীগৰাকীক ধন্যবাদ জ্ঞাপন কৰে। তেওঁ কয়, ‘মই মোৰ বন্ধু প্ৰধানমন্ত্ৰী আলবানিজৰ ওচৰত কৃতজ্ঞ। মেলবৰ্ণে মোক এক সুন্দৰ আদৰণি জনাইছে। মই মেলবৰ্ণবাসীক লগ পাবলৈ আগ্ৰহেৰে বাট চাই আছিলোঁ। মেলবৰ্ণে সঁচাকৈয়ে হৃদয় জয় কৰিলে। এই অনুষ্ঠানটো সম্পূৰ্ণ হাউচফুল।’ প্ৰধানমন্ত্ৰীগৰাকীয়ে লগতে কয়, ‘আহমেদাবাদ য’ত বিশ্বৰ সৰ্ববৃহৎ ক্ৰিকেট ষ্টেডিয়াম আছে আৰু মেলবৰ্ণ য’ত ঐতিহাসিক ক্ৰিকেট ষ্টেডিয়াম আছে, আমি দুয়োখন ঠাইতে একেলগে আছোঁ। আমি সকলোৱে দেখিছোঁ, প্ৰধানমন্ত্ৰী আলবানিজে যেতিয়া ভাষণ দিয়ে, তেতিয়া তেওঁ ভাৰতীয়সকলৰ হৃদয় আৰু মনত স্থান লাভ কৰে। চিডনীতো আপুনি ধুমুহা তুলিছিল আৰু ইয়াতেও আপুনি সকলোৰে দৃষ্টি আকৰ্ষণ কৰিছে।’
প্ৰধানমন্ত্ৰী নৰেন্দ্ৰ মোদীয়ে ভাৰত আৰু অষ্ট্ৰেলিয়াৰ সম্পৰ্কক প্ৰশংসা কৰি কয় যে দুয়োখন দেশৰ সম্পৰ্ক এক নতুন উচ্চতাত উপনীত হৈছে। তেওঁ উল্লেখ কৰে যে কেৱল ভাৰতীয়সকলৰ বাবেই ভাৰত আৰু অষ্ট্ৰেলিয়াৰ সম্পৰ্ক ইমান শক্তিশালী হৈ পৰিছে। যোৱা ১২ বছৰত তৃতীয়বাৰৰ বাবে অষ্ট্ৰেলিয়াত উপস্থিত হোৱা প্ৰধানমন্ত্ৰী মোদীৰ মতে, ভাৰতীয়সকলে মিলি মেলবৰ্ণক অধিক সজীৱ আৰু স্পন্দনশীল কৰি তুলিছে।
প্ৰধানমন্ত্ৰী মোদীয়ে লগতে কয় যে অষ্ট্ৰেলিয়াৰ উন্নয়নত ভাৰতীয়সকলৰ এক ডাঙৰ অৱদান আছে। ভাৰতীয়সকল য’তেই থাকে, তাতেই মৰম-প্ৰীতিৰ ৰং সানি দিয়ে। অষ্ট্ৰেলিয়াত বসবাস কৰা ভাৰতীয়সকলক লৈ মই গৌৰৱান্বিত। ইয়াৰ মানুহৰ চকু সদায় ভাৰতৰ ওপৰত থাকে আৰু একবিংশ শতিকাৰ ভাৰত বিকশিত হোৱাৰ লক্ষ্যৰ দিশে অগ্ৰসৰ হৈছে। ভাৰতে নিজাকৈ মহাকাশ কেন্দ্ৰ নিৰ্মাণৰ পথত আছে আৰু মহাকাশলৈ নিজৰ গগনযান পঠিয়াবলৈ সাজু হৈছে।
এই সময়ছোৱাত প্ৰধানমন্ত্ৰী মোদীয়ে সমবেত ৰাইজৰ সৈতে একেলগে ‘Grow More Achieve More’ ধ্বনি দিয়ে। তেওঁ কয়, ‘আজি ভাৰত বিশ্বৰ দ্বিতীয় বৃহত্তম 5G বজাৰ হয়। ভাৰতৰ ৯৯ শতাংশ জিলা 5G ব্যৱস্থাৰে সুসজ্জিত। ভাৰতত বিশ্বৰ তৃতীয় বৃহত্তম নেটৱৰ্ক আছে।’
তেওঁ লগতে কয়, ‘আমি ১৪০ কোটি আকাংক্ষাৰে ভৰপূৰ এখন ৰাষ্ট্ৰ। আমি অধীৰ, আমি বিশ্বৰ আটাইতকৈ দ্ৰুতগতিত বৃদ্ধি পোৱা অৰ্থনীতি, কিন্তু আমি যিমান পাৰোঁ সোনকালে বিশ্বৰ শীৰ্ষ ৩খন অৰ্থনীতিৰ ভিতৰত স্থান পাব বিচাৰোঁ। কিয়নো এয়াই আমাৰ অনুপ্ৰেৰণা— Grow more, Achieve more…’
প্ৰধানমন্ত্ৰী নৰেন্দ্ৰ মোদীয়ে এই সময়ছোৱাত ‘অপাৰেচন সিন্দূৰ’ৰ কথাও উল্লেখ কৰে। তেওঁ কয়, ‘অপাৰেচন সিন্দূৰৰ সময়ত ডেম’টো দেখিবলৈ পাইছিলেই, বিস্ফোৰণ প্ৰতিৱেশীৰ ওপৰত হৈছিল আৰু ইয়াৰ প্ৰতিধ্বনি সমগ্ৰ বিশ্বই শুনিবলৈ পাইছিল। সন্ত্ৰাসবাদী শিবিৰৰ ওপৰত কৰা এই তীব্ৰ প্ৰহাৰে আপোনালোকক গৌৰৱান্বিত কৰিলে নে নাই? বন্ধুসকল, ভাৰত ইয়াতেই থমকি ৰব নোখোজে। ভাৰতে কৈছে— “Grow More”… সেইবাবেই আজি জীপৰ পৰা জাহাজলৈকে সকলো উৎপাদনৰ বাবে ভাৰতত এক নতুন ইক’চিষ্টেম গঢ়ি তোলা হৈছে।’
ভাৰতৰ উদাৰতাৰ কথা উল্লেখ কৰি প্ৰধানমন্ত্ৰী মোদীয়ে কয় যে বিগত মাহত ভেনিজুৱেলাত এক ডাঙৰ ভূমিকম্পই জোকাৰি গৈছিল, য’ত ব্যাপক ধ্বংসলীলা ঘটিছিল আৰু শ শ লোকে প্ৰাণ হেৰুৱাইছিল। তেওঁ কয়, ‘আমি দূৰত্ব কিমান সেয়া চোৱা নাছিলোঁ, ভাৰতে ভেনিজুৱেলাৰ এই যন্ত্ৰণাক নিজৰ যন্ত্ৰণা বুলি গণ্য কৰিছিল। ভাৰতে সাহায্য আৰু উদ্ধাৰ অভিযান চলাইছিল আৰু যিমান দ্ৰুত পৰ্যায়ত সম্ভৱ সহায় আগবঢ়াইছিল। ভাৰতে যেতিয়া সহায় কৰে, তেতিয়া পাছপোৰ্ট নাচায়, পাছপোৰ্টৰ ৰং নাচায়। সেইবাবেই বিশ্বয়ো ভাৰতৰ ওপৰত ইমান গভীৰ বিশ্বাস ৰাখে।’
