বুধবাৰে অসম বিধানসভাৰ মজিয়াত চৰকাৰে এই তথ্য সদৰী কৰে
অসমৰ ভূখণ্ডক লৈ এক ডাঙৰ তথ্য পোহৰলৈ আহিছে । ৰাজ্যখনৰ প্ৰায় ৮৩,০০০ হেক্টৰ ভূমি বৰ্তমান চাৰিখনকৈ চুবুৰীয়া ৰাজ্যৰ অবৈধ দখলত আছে । বুধবাৰে অসম বিধানসভাৰ মজিয়াত চৰকাৰে এই তথ্য সদৰী কৰে ।
কংগ্ৰেছ বিধায়ক ৰেকিবুদ্দিন আহমেদৰ এক গুৰুত্বপূৰ্ণ প্ৰশ্নৰ উত্তৰ দি সীমান্ত সুৰক্ষা আৰু উন্নয়ন মন্ত্ৰী অতুল বৰাই এই তথ্য সদৰী কৰে । মন্ত্ৰীগৰাকীয়ে জনায় যে অসমৰ ১৮খন জিলাৰ মুঠ ৮২,৭৫১.৮৬ হেক্টৰ ভূমি বৰ্তমান অৰুণাচল প্ৰদেশ, নাগালেণ্ড, মেঘালয় আৰু মিজোৰামৰ নিয়ন্ত্ৰণত আছে ।
কোনখন ৰাজ্যৰ দখলত কিমান ভূমি?
মন্ত্ৰী অতুল বৰাই দাঙি ধৰা চৰকাৰী পৰিসংখ্যা অনুসৰি :
নাগালেণ্ড: বিবদমান ভূমিৰ আটাইতকৈ ডাঙৰ অংশটো নাগালেণ্ডৰ দখলত আছে । ৰাজ্যখনে অসমৰ ৫৯,৪৯০.২১ হেক্টৰ ভূমি নিয়ন্ত্ৰণ কৰি ৰাখিছে ।
অৰুণাচল প্ৰদেশ: অৰুণাচল প্ৰদেশৰ দখলত আছে ১৬,১৪৪.০১ হেক্টৰ ভূমি ।
মিজোৰাম: মিজোৰামৰ অধীনত আছে ৩,৬৭৫.৭৮ হেক্টৰ ভূমি ।
মেঘালয়: চুবুৰীয়া চাৰিখন ৰাজ্যৰ ভিতৰত মেঘালয়ৰ দখলত আটাইতকৈ কম, অৰ্থাৎ ৩,৪৪১.৮৬ হেক্টৰ ভূমি আছে ।
প্ৰভাৱিত অসমৰ ১৮খন জিলা
সীমান্তৰ এই বেদখলে অসমৰ বহু কেইখন গুৰুত্বপূৰ্ণ জিলাক প্ৰভাৱিত কৰিছে । এই প্ৰভাৱিত জিলাসমূহ হৈছে-
শোণিতপুৰ, বিশ্বনাথ, লখিমপুৰ, ধেমাজি, তিনিচুকীয়া, ডিব্ৰুগড়, চৰাইদেউ, যোৰহাট, শিৱসাগৰ, গোলাঘাট, গোৱালপাৰা, কাছাৰ, কামৰূপ, কামৰূপ মহানগৰ, দক্ষিণ শালমাৰা-মানকাচৰ, পশ্চিম কাৰ্বi আংলং, হাইলাকান্দি আৰু শ্ৰীভূমি ।
সমাধানৰ বাবে চৰকাৰৰ পদক্ষেপ
এই দীৰ্ঘদিনীয়া আন্তঃৰাজ্যিক সীমান্ত বিবাদ সমাধানৰ বাবে ৰাজ্য চৰকাৰে অহৰহ প্ৰচেষ্টা চলাই থকা বুলি মন্ত্ৰী বৰাই সদনক আশ্বস্ত কৰে । তেওঁ কয়, “অসম চৰকাৰে চুবুৰীয়া ৰাজ্যসমূহৰ সৈতে শান্তিপূৰ্ণ আলোচনাৰ জৰিয়তে এই সীমান্ত বিবাদসমূহ নিষ্পত্তি কৰাৰ দিশত ইতিবাচকভাৱে অগ্ৰসৰ হৈছে ।”
মন্ত্ৰীগৰাকীয়ে লগতে উল্লেখ কৰে যে কেন্দ্ৰীয় গৃহ মন্ত্ৰালয়ৰ নিৰ্দেশ আৰু মধ্যস্থতাত অসমে ইতিমধ্যে মেঘালয় আৰু অৰুণাচল প্ৰদেশৰ সৈতে দ্বিপাক্ষিক চুক্তিত স্বাক্ষৰ কৰিছে, যাৰ জৰিয়তে বহু পৰিমাণে সীমান্ত সমস্যা সমাধানৰ পথ প্ৰশস্ত হৈছে ।
লগতে পঢ়ক : ‘কৃষকৰ পেটত লাঠ মাৰিব বিচাৰিছে অখিল গগৈয়ে’; মন্ত্ৰী পীয়ুষ হাজৰিকাৰ তীক্ষ্ণ আক্ৰমণ
