নৰৱে’ৰ বিৰুদ্ধে খেলখনত ব্ৰাজিল ১-২ গ’লত পৰাস্ত হয়। দলটোৰ সমৰ্থকসকলে এতিয়াও এই পৰাজয়ৰ বাবে শোকত থকাৰ সময়তেই নেইমাৰে আন এক বৃহৎ আঘাত দিছে। তেওঁ আন্তঃৰাষ্ট্ৰীয় ফুটবলৰ পৰা অৱসৰৰ কথা ঘোষণা কৰিছে।
ব্ৰাজিলৰ তাৰকা খেলুৱৈ নেইমাৰে আন্তঃৰাষ্ট্ৰীয় ফুটবলৰ পৰা অৱসৰ ঘোষণা কৰি সকলোকে আচৰিত কৰি তুলিছে। ব্ৰাজিল ফিফা বিশ্বকাপ ২০২৬-ৰ পৰা বাহিৰ হোৱাৰ লগে লগেই তেওঁ এই সিদ্ধান্ত গ্ৰহণ কৰে। আজি ‘ৰাউণ্ড অৱ ১৬’ (Round of 16) ৰ খেলখনত নৰৱে’এ ব্ৰাজিলক ২-১ গ’লত পৰাস্ত কৰি তেওঁৰ যাত্ৰা সমাপ্ত কৰে।
নেইমাৰে নিজৰ কেৰিয়াৰৰ আৰম্ভণি মেটলাইফ ষ্টেডিয়াম (নিউ জাৰ্চি)ত খেলি কৰিছিল আৰু নিজৰ অন্তিমখন আন্তঃৰাষ্ট্ৰীয় খেলো এই একেখন খেলপথাৰতে খেলিলে। খেলৰ ৯০ মিনিটৰ পিছত অতিৰিক্ত সময় অন্ত পৰাৰ কিছু সময় পূৰ্বে তেওঁ এটা গ’ল দিয়ে, যিটো ব্ৰাজিলৰ প্ৰথমটো গ’ল আছিল। কিন্তু নৰৱে’ ইয়াৰ পূৰ্বেই ২ টা গ’ল দি থৈছিল। নেইমাৰে অৱসৰৰ কথা ঘোষণা কৰি কয় যে তেওঁ এতিয়া ভাগৰুৱা হৈ পৰিছে।
ব্ৰাজিল বনাম নৰৱে’ খেলখনৰ ফাইনেল হুইচেল বজাৰ আৰু ব্ৰাজিল বিশ্বকাপৰ পৰা বাহিৰ হোৱাৰ কিছু সময়ৰ পিছতেই নেইমাৰে নিজৰ অৱসৰৰ কথা আনুষ্ঠানিকভাৱে ঘোষণা কৰে। তেওঁ কয়, “মই বহুত চেষ্টা কৰিলোঁ, কিন্তু সকলো শেষ হৈ গ’ল। মই বহুত ভাগৰুৱা হৈ পৰিছোঁ, ক্লান্ত হৈ পৰিছোঁ। মই মেটলাইফ ষ্টেডিয়ামৰ পৰাই আৰম্ভণি কৰিছিলোঁ আৰু ইয়াতেই মোৰ আন্তঃৰাষ্ট্ৰীয় যাত্ৰা শেষ কৰিছোঁ।”
নেইমাৰে ২০১০ চনত ছিনিয়ৰ দলত আত্মপ্ৰকাশ কৰিছিল। তেওঁ ১২৯ খন আন্তঃৰাষ্ট্ৰীয় মেচ খেলি ৮০ টা গ’ল স্ক’ৰ কৰিছে। তেওঁ ব্ৰাজিলৰ পুৰুষ ফুটবলৰ সৰ্বকালৰ সৰ্বাধিক গ’ল স্ক’ৰাৰ (All-time leading goalscorer)। আন্তঃৰাষ্ট্ৰীয় পৰ্যায়ত নেইমাৰৰ কিছুমান ডাঙৰ সাফল্য আছিল, যেনে- ৰিঅ’ ২০১৬ অলিম্পিকত ব্ৰাজিলক স্বৰ্ণ পদক উপহাৰ দিয়া। ইয়াৰ পূৰ্বে লণ্ডন গেমছত তেওঁ ৰূপৰ পদক জিকিছিল। লগতে ২০১৩ চনত তেওঁ ফিফা কনফেডাৰেচন কাপো জয় কৰিছিল।
লগতে পঢ়ক: প্ৰি-কোৱাৰ্টাৰত আৰ্জেণ্টিনা; পৰাজিত হৈয়ো হৃদয় জিনিলে কেপ ভাৰ্ডেই
