প্ৰশাসনীয় ব্যৱস্থা অধিক খৰতকীয়া তথা স্বচ্ছ কৰিবলৈ বিজ্ঞান আৰু প্ৰযুক্তিৰ ব্যৱহাৰ ক্ৰমান্বয়ে বৃদ্ধি কৰিছে
অসম চৰকাৰে ৰাজ্যখনৰ দীৰ্ঘম্যাদী উন্নয়নমূলক প্ৰত্যাহ্বানসমূহৰ মোকাবিলা কৰিবলৈ আৰু প্ৰশাসনীয় ব্যৱস্থা অধিক খৰতকীয়া তথা স্বচ্ছ কৰিবলৈ বিজ্ঞান আৰু প্ৰযুক্তিৰ ব্যৱহাৰ ক্ৰমান্বয়ে বৃদ্ধি কৰিছে । ৩ জুলাইত এই কথা প্ৰকাশ কৰে অসমৰ মুখ্যমন্ত্ৰী ড° হিমন্ত বিশ্ব শৰ্মাই ।
বিজ্ঞান আৰু প্ৰযুক্তিৰ সফল প্ৰয়োগৰ জৰিয়তে চৰকাৰী সেৱাসমূহ জনসাধাৰণৰ ওচৰলৈ লৈ যোৱাৰ লগতে পৰিৱেশ আৰু উন্নয়নৰ ক্ষেত্ৰত থকা সমস্যামূলাক দিশবোৰ বৈজ্ঞানিক পদ্ধতিৰে সমাধান কৰাৰ বাবে চৰকাৰে বিশেষ লক্ষ্য হাতত লৈছে ।
ASSAC-ৰ প্ৰশংসনীয় ভূমিকা আৰু ৬০ টাতকৈও অধিক প্ৰকল্প
এই সন্দৰ্ভত অসম ৰাজ্যিক মহাকাশ প্ৰয়োগ কেন্দ্ৰ (ASSAC)-ৰ ভূমিকাৰ ওপৰত বিশেষভাৱে আলোকপাত কৰে মুখ্যমন্ত্ৰীগৰাকীয়ে । তেওঁ জনায় যে যোৱা পাঁচ বছৰত এই সংস্থাটোৱে মেপিং (মানচিত্ৰংকন), আগলি বতৰা বা পূৰ্বানুমান আৰু ভূ-স্থানিক প্ৰয়োগৰ দৰে বিভিন্ন গুৰুত্বপূৰ্ণ ক্ষেত্ৰত ৬০ টাতকৈও অধিক প্ৰকল্প সফলতাৰে ৰূপায়ণ কৰিছে ।
তথ্য-প্ৰমাণ ভিত্তিক সিদ্ধান্ত গ্ৰহণ আৰু জনসেৱা
মুখ্যমন্ত্ৰী হিমন্ত বিশ্ব শৰ্মাৰ মতে, ASSAC-ৰ এই প্ৰকল্পসমূহে অসম চৰকাৰক তথ্য-প্ৰমাণ ভিত্তিক সিদ্ধান্ত গ্ৰহণ, সঠিক পৰিকল্পনা আৰু জনসাধাৰণক অতি দক্ষতাপূৰ্ণভাৱে চৰকাৰী সেৱা প্ৰদান কৰাত ব্যাপকভাৱে সহায় কৰিছে ।
মহাকাশ ভিত্তিক প্ৰযুক্তি আৰু বৈজ্ঞানিক সঁজুলিসমূহৰ এই ব্যৱহাৰে কেৱল চৰকাৰী প্ৰশাসনক শক্তিশালী কৰাই নহয়, বৰঞ্চ বানপানী, গৰাখহনীয়াৰ দৰে পাৰিপাৰ্শ্বিক প্ৰত্যাহ্বানসমূহৰো এক দীৰ্ঘম্যাদী আৰু স্থায়ী সমাধান উলিওৱাত সহায় কৰিব ।
লগতে পঢ়ক : অসমত মেগা বৃক্ষৰোপণৰ প্ৰস্তুতি: ১৪ আগষ্টৰ ভিতৰত ১ কোটি পুলি ৰোপণ কৰিব বন বিভাগে
