ফিফা বিশ্বকাপৰ এই মহাযুদ্ধত বৰ্তমান কোনে সৰ্বাধিক গ’ল দি আগবাঢ়ি আছে, আহক এক চকু ফুৰাওঁ…
ফিফা বিশ্বকাপ ২০২৬ ক্ৰমান্বয়ে ৰোমাঞ্চকৰ দিশলৈ গতি কৰিছে । ইংলেণ্ডৰ অধিনায়ক হেৰী কেইনে কঙ্গো ডিআৰৰ বিৰুদ্ধে শেষ মুহূৰ্তত এটা আকৰ্ষণীয় ব্ৰেচ (দুটা গ’ল) স্ক’ৰ কৰি গোল্ডেন বুটৰ দৌৰ তীব্ৰতৰ কৰি তুলিছে । ইয়াৰ সৈতে তেওঁ নৰৱেৰ তাৰকা আৰ্লিং হালেণ্ডৰ সমকক্ষ হৈ পৰিছে আৰু তালিকাৰ শীৰ্ষত থকা লিয়নেল মেছি তথা কাইলিয়ান এমবাপেৰ অতি ওচৰ চাপিছে ।
৭৫ আৰু ৮৬ মিনিটত কৰা গ’লেৰে হেৰী কেইনে খেলৰ শেষৰ ফালে দেখুওৱা এক চমৎকাৰ প্ৰদৰ্শনে ডিআৰ কঙ্গোক ২-১ ব্যৱধানত পৰাস্ত কৰি ইংলেণ্ডক ৰাউণ্ড অৱ ১৬ লৈ লৈ যায় ।
ফুটবল বিশ্বৰ এই মহাযুদ্ধত বৰ্তমান কোনে সৰ্বাধিক গ’ল দি আগবাঢ়ি আছে, আহক এক চকু ফুৰাওঁ গোল্ডেন বুটৰ শেহতীয়া তালিকাত :
কাইলিয়ান এমবাপে- ফ্ৰান্স
গ’ল: ৬, এচিষ্ট: ২, মেচ: ৪
এমবাপেই বৰ্তমান গোল্ডেন বুটৰ দৌৰত আগবাঢ়ি আছে । চেনেগালৰ বিৰুদ্ধে ব্ৰেচেৰে অভিযান আৰম্ভ কৰা এমবাপেই ইৰাকৰ বিৰুদ্ধেও দুটা গ’ল দিছিল । ৰাউণ্ড অৱ ৩২ ৰ খেলখনত ছুইডেনৰ বিৰুদ্ধে ফ্ৰান্সৰ ৩-০ ৰ জয়ত তেওঁ আন এটা ব্ৰেচ স্ক’ৰ কৰি সামগ্ৰিক গ’লৰ সংখ্যা ৬ টা কৰে । ইয়াৰ সৈতে এমবাপেৰ সৰ্বমুঠ বিশ্বকাপৰ গ’লৰ সংখ্যা ১৮ টা হৈছে, যাৰ ফলত তেওঁ সৰ্বকালৰ সৰ্বাধিক গ’লদাতাৰ তালিকাত মেছিৰ ঠিক পিছতে (দ্বিতীয় স্থানত) অৱস্থান কৰিছে ।
লিয়নেল মেছি- আৰ্জেণ্টিনা
গ’ল: ৬, এচিষ্ট: ০, মেচ: ৩
আৰ্জেণ্টিনাৰ কিংবদন্তি লিয়নেল মেছিয়ে আলজেৰিয়াৰ বিৰুদ্ধে হেট্ৰিক অৰ্জন কৰি অভিযান আৰম্ভ কৰিছিল । ৩৮ বছৰ ৩৫৭ দিন বয়সত মেছিয়ে বিশ্বকাপৰ ইতিহাসত আটাইতকৈ বয়োজ্যেষ্ঠ খেলুৱৈ হিচাপে হেট্ৰিক কৰাৰ অভিলেখ গঢ়ে । ইয়াৰ পিছত অট্ৰিয়াৰ বিৰুদ্ধে এটা ব্ৰেচ আৰু জৰ্ডানৰ বিৰুদ্ধে এটা গ’ল দি তেওঁ নিজৰ গ’লৰ সংখ্যা ৬ টা কৰে । বৰ্তমান ১৯ টা কেৰিয়াৰ বিশ্বকাপ গ’লেৰে তেওঁ ইতিহাসৰ সৰ্বাধিক গ’লদাতা । অৱশ্যে এচিষ্ট নথকাৰ বাবে তেওঁ এমবাপতকৈ সামান্য পিছপৰি আছে ।
আৰ্লিং হালেণ্ড- নৰৱে
গ’ল: ৫, এচিষ্ট: ০
নৰৱেৰ গ’ল মেচিন আৰ্লিং হালেণ্ডে ইৰাকৰ বিৰুদ্ধে ব্ৰেচ আৰু চেনেগালৰ বিৰুদ্ধে দুটা গ’ল কৰিছিল । ইয়াৰ পিছত আইভৰি কোষ্টৰ বিৰুদ্ধে ৰাউণ্ড অৱ ৩২ ৰ খেলত তেওঁ আন এটা গ’ল কৰে । ৫ টা গ’লেৰে হালেণ্ড বৰ্তমান তৃতীয় স্থানত আছে আৰু ৰাউণ্ড অৱ ১৬ ত ব্ৰাজিলৰ বিৰুদ্ধে তেওঁ পুনৰ আক্ৰমণাত্মক ৰূপত দেখা পোৱাৰ সম্ভাৱনা আছে ।
হেৰী কেইন- ইংলেণ্ড
গ’ল: ৫, এচিষ্ট: ০
ক্ৰ’ৱেচিয়াৰ বিৰুদ্ধে প্ৰথমখন খেলত ব্ৰেচ স্ক’ৰ কৰা কেইনে পানামাৰ বিৰুদ্ধেও এটা গ’ল কৰিছিল । কঙ্গো ডিআৰৰ বিৰুদ্ধে যেতিয়া ইংলেণ্ড ০-১ ত পিছপৰি আছিল, তেতিয়া কেইনে শেষ মুহূৰ্তত দুটা গ’ল দি দলক ২-১ ৰ এক মহাকাব্যিক জয় উপহাৰ দিয়ে । এই প্ৰদৰ্শনৰ জৰিয়তে ৫ টা গ’লেৰে তেওঁ এতিয়া হালেণ্ডৰ সৈতে যুটীয়াভাৱে তৃতীয় স্থানত আছে ।
তালিকাৰ আন দুই তাৰকা:
ওচমান ডেম্বেলে ফ্ৰান্স): ৪ টা গ’ল আৰু ২ টা এচিষ্টৰ সৈতে তেওঁ চতুৰ্থ স্থানত আছে । নৰৱেৰ বিৰুদ্ধে তেওঁ এটা চমৎকাৰ হেট্ৰিক অৰ্জন কৰিছিল ।
ভিনিচিয়াছ জুনিয়ৰ (ব্ৰাজিল): ৪ টা গ’ল আৰু ১ টা এচিষ্টৰ সৈতে ব্ৰাজিলৰ এই তাৰকা খেলুৱৈগৰাকী তালিকাৰ পঞ্চম স্থানত আছে ।
লগতে পঢ়ক : মেছিৰ ১০ নম্বৰ জাৰ্ছিত ষ্টেডিয়ামত যশস্বী জয়ছোৱাল!
