স্মাৰকপত্ৰখনত অভিযোগ কৰা হৈছে যে চীনৰ পিপলছ লিবাৰেশ্যন আৰ্মীয়ে সীমান্তৰ সমীপৱৰ্তী ভাৰতীয় ভূখণ্ডৰ ভিতৰত শিবিৰ স্থাপন কৰিছে
ভাৰতৰ ভূখণ্ডত ৰঙা চীনৰ শেনচকু । ভাৰতৰ অবিচ্ছেদ্য অংগ অৰুণাচল প্ৰদেশৰ ওপৰত চকু আগ্ৰাসী চীনৰ । বছৰ বছৰ ধৰি অৰুণাচল প্ৰদেশক নিজৰ বুলি দাবী কৰি অহা চীনে এইবাৰ ভাৰতৰ মাটিত স্থাপন কৰিছে সামৰিক শিবিৰ । অৰুণাচলৰ ‘নাহ ৱেলফেয়াৰ ছ’চাইটি’ নামৰ এক সংগঠনে জিলা আয়ুক্তলৈ প্ৰেৰণ কৰা এক পত্ৰত উন্মোচিত হৈছে চীনৰ আগ্ৰাসী কাৰ্যকলাপ ।
অৰুণাচল প্ৰদেশৰ আপাৰ সোৱণশিৰি জিলাৰ টাকছিঙৰ এটি সমাজভিত্তিক সংগঠন ‘নাহ ৱেলফেয়াৰ ছ’চাইটি’ (NWS)-এ জিলা উপায়ুক্তৰ ওচৰত এক স্মাৰকপত্ৰ দাখিল কৰিছে । স্মাৰকপত্ৰখনত চীনৰ পিপলছ লিবাৰেশ্যন আৰ্মীয়ে সীমান্তৰ সমীপৱৰ্তী ভাৰতীয় ভূখণ্ডৰ ভিতৰত শিবিৰ স্থাপন কৰিছে বুলি অভিযোগ উত্থাপন কৰিছে সংগঠনটোৱে ।
২৬ জুনত প্ৰেৰণ কৰা পত্ৰখনত সংগঠনটোৱে দাবী কৰা অনুসৰি, টাকছিং চাৰ্কলৰ সীমান্তৱৰ্তী অঞ্চলসমূহত বিগত ১০-১৫ বছৰ ধৰি চীনৰ উপস্থিতি ক্ৰমান্বয়ে বৃদ্ধি পাইছে । তেওঁলোকৰ অভিযোগ মতে, পূৰ্বে যিবোৰ স্থান স্থানীয় ৰাইজে চিকাৰ কৰা, পশুধন চৰোৱা আৰু বনজ সম্পদ সংগ্ৰহৰ বাবে ব্যৱহাৰ কৰিছিল, সেই স্থানসমূহত এতিয়া চীনে পথ, দলং আৰু সামৰিক শিবিৰ নিৰ্মাণ কৰিছে ।
সংগঠনটোৱে পাঁচটা স্থানৰ নাম উল্লেখ কৰিছে- অয়িং, পানিয়াৰ (চুজাৰ্টা অঞ্চল), মাৰ্পান (মাৰ্নাফে), প’ট্ৰাং হ্ৰদ আৰু টিণ্ডিংটাং । সংগঠনটোৰ অভিযোগ অনুসৰি, ২০২০ চনৰ পৰাই এই স্থানসমূহ চীনৰ দখলত আছে । তেওঁলোকে লগতে অভিযোগ কৰে যে এই অঞ্চলসমূহ টাকছিং মুখ্য কাৰ্যালয়ৰ নিচেই ওচৰত অৱস্থিত আৰু ইয়াৰ সৈতে স্থানীয় লোকৰ সাংস্কৃতিক তথা ধৰ্মীয় বিশ্বাস জড়িত হৈ আছে ।
স্মাৰকপত্ৰখনত নাহ ৱেলফেয়াৰ ছ’চাইটিয়ে ৰাজ্য চৰকাৰ আৰু কেন্দ্ৰীয় চৰকাৰক উক্ত অঞ্চলত চীনৰ সকলো ধৰণৰ কাৰ্যকলাপ বন্ধ কৰিবলৈ তৎকালীন পদক্ষেপ গ্ৰহণ কৰিবলৈ আহ্বান জনাইছে । ভাৰতীয় সেনাৰ প্ৰতি সম্পূৰ্ণ আস্থা প্ৰকাশ কৰাৰ সমান্তৰালকৈ সংগঠনটোৱে কয় যে ভাৰতীয় ভূখণ্ড সুৰক্ষিত কৰিবলৈ অধিক শক্তিশালী হস্তক্ষেপৰ প্ৰয়োজন আছে ।
পত্ৰখনত সংগঠনটোৱে জিলা প্ৰশাসনক উপযুক্ত কৰ্তৃপক্ষৰ সৈতে এই বিষয়টো আলোচনা কৰিবলৈ অনুৰোধ জনাইছে আৰু তেওঁলোকৰ দাবীৰ সমৰ্থনত কিছু আলোকচিত্ৰও সংলগ্ন কৰিছে ।
লগতে পঢ়ক : অৰুণাচলত প্ৰলয়ংকাৰী বান; অসম চৰকাৰৰ হাই এলাৰ্ট জাৰি
