অসম বিধানসভাৰ বাজেট অধিৱেশন ২০২৬- ৬ জুলাইৰ পৰা আৰম্ভ, ১০ জুলাইত হ’ব বাজেট উত্থাপন ।
অহা ৬ জুলাইৰ পৰা ৩১ জুলাইলৈ অনুষ্ঠিত হ’ব ষোড়শ অসম বিধানসভাৰ বাজেট অধিৱেশন । ২০২৬-২৭ বিত্তীয় বৰ্ষৰ বাবে ৰাজ্যিক বাজেটখন অহা ১০ জুলাইত সদনত উত্থাপন কৰাৰ দিন ধাৰ্য কৰা হৈছে । অসম বিধানসভা সচিবালয়ে ইতিমধ্যে এই সন্দৰ্ভত এক সাময়িক দিনপঞ্জী প্ৰকাশ কৰিছে ।
অসম বিধানসভা সচিবালয়ৰ দিনপঞ্জী অনুসৰি, এমাহজোৰা এই অধিৱেশনৰ কাৰ্যসূচী তলত দিয়া ধৰণে যুগুত কৰা হৈছে :
৬ জুলাই (অধিৱেশনৰ আৰম্ভণি): নিয়মীয়া বিধানসভাৰ কাৰ্যাৱলী যেনে- শোকপ্ৰস্তাৱ, বিভিন্ন প্ৰতিবেদন দাখিল, চৰকাৰী বিধেয়ক উত্থাপন আৰু অনুদানৰ পৰিপূৰক দাবীৰ ওপৰত আলোচনাৰে অধিৱেশনৰ কাম-কাজ আৰম্ভ হ’ব ।
১০ জুলাই (বাজেট উত্থাপন): এই দিনটোৱেই হ’ব অধিৱেশনৰ আটাইতকৈ গুৰুত্বপূৰ্ণ দিন । চৰকাৰে আগন্তুক বৰ্ষৰ বাবে ইয়াৰ বিত্তীয় পৰিকল্পনা আৰু উন্নয়নমূলক অগ্ৰাধিকাৰসমূহ সামৰি বাৰ্ষিক বিত্তীয় বিবৃতি (বাজেট) ডাঙি ধৰিব ।
১৩ ৰ পৰা ১৫ জুলাই (সাধাৰণ আলোচনা): বাজেট উত্থাপনৰ পিছত তিনি দিন ধৰি ইয়াৰ ওপৰত সাধাৰণ আলোচনা অনুষ্ঠিত হ’ব । য’ত বিধায়কসকলে চৰকাৰৰ নীতি, ব্যয়ৰ প্ৰস্তাৱ আৰু উন্নয়নমূলক আঁচনিসমূহৰ ওপৰত বিতৰ্ক কৰিব ।
১৬ ৰ পৰা ২১ জুলাই (সদন স্থগিত/বিৰতি): বিভিন্ন বিভাগৰ অনুদানৰ দাবীসমূহ সূক্ষ্মভাৱে পৰীক্ষা কৰিবলৈ বিভাগীয় স্থায়ী কমিটীসমূহক সময় দিয়াৰ উদ্দেশ্যে এই কেইদিন সদন স্থগিত ৰখা হ’ব ।
২২ আৰু ২৩ জুলাই (ভোটগ্ৰহণ আৰু বিধেয়ক পাছ): ২২ জুলাইত বিভাগীয় অনুদানৰ দাবীৰ ওপৰত আলোচনা আৰু ভোটগ্ৰহণ হ’ব । ২৩ জুলাইত বাকী থকা দাবীৰ ভোটগ্ৰহণৰ লগতে চৰকাৰী ব্যয়ৰ অনুমতি প্ৰদান কৰা গুৰুত্বপূৰ্ণ ‘অসম বিনিয়োগ বিধেয়ক, ২০২৬’ গৃহীত কৰাৰ দিশটো বিবেচনা কৰা হ’ব ।
অসমৰ অৰ্থনীতিত পৰিব বিশেষ প্ৰভাৱ
অধিৱেশনৰ অন্তিম দিনকেইটা চৰকাৰী আইনী কাম-কাজ, বেচৰকাৰী সদস্যসকলৰ প্ৰস্তাৱ-বিধেয়ক আৰু ৰাজহুৱা স্বাৰ্থজড়িত বিভিন্ন গুৰুত্বপূৰ্ণ বিষয়ৰ আলোচনাৰ বাবে ধাৰ্য কৰা হৈছে । কেইবাটাও গুৰুত্বপূৰ্ণ বিত্তীয় আৰু আইনী বিষয় কাৰ্যসূচীত থকাৰ বাবে, এই আগন্তুক বাজেট অধিৱেশনে অসমৰ অৰ্থনৈতিক অগ্ৰাধিকাৰ, শাসন প্ৰক্ৰিয়া আৰু সৰ্বাংগীণ উন্নয়নৰ গতিধাৰা নিৰ্ধাৰণ কৰাত এক গুৰুত্বপূৰ্ণ ভূমিকা ল’ব বুলি আশা কৰা হৈছে ।
লগতে পঢ়ক : চাহিদা পূৰাবলৈ সাজু অসম: বিদ্যুতৰ অভাৱ দূৰ কৰিবলৈ বৃহৎ প্ৰস্তুতি
