নুমলীগড়-গহপুৰ সুৰংগ পথ আমাক কিয় লাগে? ক’লে মুখ্যমন্ত্ৰী ড০ হিমন্ত বিশ্ব শৰ্মাই

মুখ্যমন্ত্ৰী ড° হিমন্ত বিশ্ব শৰ্মাই কয় যে গহপুৰ আৰু নুমলীগড়ৰ মাজত প্রস্তাৱিত পানীৰ তলৰ সুৰংগটো অর্থনৈতিক বিবেচনা বা যান-বাহনৰ চাহিদাতকৈ প্রধানকৈ কৌশলগত আৰু ৰাষ্ট্রীয় নিৰাপত্তাৰ দৃষ্টিকোণৰ পৰা গঢ়ি তোলা হৈছে৷

প্ৰস্তাৱিত গহপুৰ-নুমলীগড়ৰ মাজৰ পানীৰ তলৰ সুৰংগটোক লৈ এক গুৰুত্বপূৰ্ণ মন্তব্য কৰিছে অসমৰ মুখ্যমন্ত্ৰী ড° হিমন্ত বিশ্ব শৰ্মাই । শনিবাৰে সংবাদ মাধ্যমৰ আগত মুখ্যমন্ত্ৰীগৰাকীয়ে স্পষ্ট কৰি দিয়ে যে এই ব্যয়বহুল প্ৰকল্পটো কোনো অৰ্থনৈতিক দিশ বা যান-বাহনৰ চলাচলৰ সাধাৰণ প্ৰয়োজনীয়তাৰ বাবে নিৰ্মাণ কৰা হোৱা নাই । বৰঞ্চ এক কৌশলগত আৰু ৰাষ্ট্ৰীয় নিৰাপত্তাৰ দৃষ্টিভংগীৰ পৰাহে ইয়াক নিৰ্মাণ কৰাৰ সিদ্ধান্ত লোৱা হৈছে ।

প্ৰধানমন্ত্ৰীৰ বৃহৎ পৰিকল্পনা আৰু অসমৰ গুৰুত্ব

সংবাদ মাধ্যমক সম্বোধন কৰি মুখ্যমন্ত্ৰী ড০ শৰ্মাই কয় যে এই প্ৰকল্পটোৱে প্ৰধানমন্ত্ৰী নৰেন্দ্ৰ মোদীৰ বৃহৎ পৰিকল্পনাত অসমৰ কৌশলগত গুৰুত্বক প্ৰতিফলিত কৰে । ইয়াৰ মূল লক্ষ্য হৈছে জৰুৰীকালীন সময়ত ব্ৰহ্মপুত্ৰৰ উত্তৰ আৰু দক্ষিণ পাৰৰ মাজত অবিৰত সংযোগ নিশ্চিত কৰা । মুখ্যমন্ত্ৰীৰ ভাষ্য অনুসৰি :

“গহপুৰ আৰু নুমলীগড়ৰ মাজৰ পানীৰ তলৰ সুৰংগটো মাননীয় প্ৰধানমন্ত্ৰী ডাঙৰীয়াৰ বৃহৎ পৰিকল্পনাত অসমৰ কৌশলগত গুৰুত্বৰ এক অন্যতম উদাহৰণ । এই প্ৰকল্পটো যান-বাহনৰ চাহিদা বা অৰ্থনৈতিক লাভৰ দ্বাৰা পৰিচালিত হোৱা নাই ।”

যুদ্ধকালীন পৰিস্থিতি আৰু দলংসমূহৰ নিৰাপত্তা

প্ৰকল্পটোৰ অন্তৰালৰ প্ৰকৃত যুক্তি বাখ্যা কৰি মুখ্যমন্ত্ৰীগৰাকীয়ে যুদ্ধকালীন পৰিস্থিতিৰ আশংকাৰ কথা প্ৰকাশ কৰে । তেওঁ কয় যে ব্ৰহ্মপুত্ৰৰ ওপৰৰ পৰম্পৰাগত দলংসমূহ যুদ্ধৰ পৰিস্থিতিত অতি সহজে শত্ৰুপক্ষৰ আক্ৰমণৰ লক্ষ্য হৈ পৰিব পাৰে ।

তেওঁ সতৰ্ক কৰি দি কয়, “যদি যুদ্ধ লাগে, ব্ৰহ্মপুত্ৰৰ ওপৰৰ দলংসমূহ শত্ৰুপক্ষৰ লক্ষ্য হৈ পৰিব পাৰে । তেনে পৰিস্থিতিত অসমৰ উত্তৰ আৰু দক্ষিণ পাৰৰ মাজৰ সংযোগ বিছিন্ন হৈ পৰাৰ সম্ভাৱনা থাকে ।”

বগীবিল আৰু কলীয়াভোমোৰা দলঙৰ প্ৰসংগ

মুখ্যমন্ত্ৰী শৰ্মাই উল্লেখ কৰে যে বৰ্তমান বগীবিল আৰু কলীয়াভোমোৰাৰ দৰে গুৰুত্বপূৰ্ণ দলংসমূহ ৰাজ্যখনৰ বিভিন্ন প্ৰান্তক সংযোগ কৰা অতি অপৰিহাৰ্য পৰিবহণ মাধ্যম । কিন্তু সামৰিক বা জৰুৰীকালীন প্ৰেক্ষাপটত এই সংযোগসমূহত কোনো ধৰণৰ ব্যাঘাত জন্মিলে সমগ্ৰ যাতায়াত আৰু ৰণকৌশলগত সামগ্ৰী সৰবৰাহৰ ক্ষেত্ৰত গুৰুতৰ প্ৰভাৱ পৰিব পাৰে ।

কেন্দ্ৰীয় চৰকাৰে সকলো পৰিস্থিতিতে যাতে অসম তথা উত্তৰ-পূৰ্বাঞ্চল দেশৰ মূল ভূখণ্ডৰ সৈতে সুৰক্ষিত আৰু সংযুক্ত হৈ থাকে, তাক অতি গুৰুত্বপূৰ্ণ বুলি গণ্য কৰিছে । সেইবাবেই কোনো ধৰণৰ আপোচ নকৰি ব্ৰহ্মপুত্ৰৰ তলেৰে এই পানীৰ তলৰ সুৰংগ নিৰ্মাণৰ প্ৰস্তাৱ আগবঢ়াইছে ।

লগতে পঢ়ক: গুৱাহাটীত হ’ব ছেটেলাইট চিটী : কেবিনেট বৈঠকত ৰাজ্য চৰকাৰৰ ডাঙৰ সিদ্ধান্ত