আজিৰে পৰা ১৯ জুলাইলৈ ফুটবল উন্মাদনাত ডুব যাব সমগ্ৰ বিশ্ব । আজিৰে পৰা সমগ্ৰ বিশ্বক ফুটবলৰ যাদুৰে সন্মোহিত কৰিবলৈ আৰম্ভ হ’ব ফিফা বিশ্বকাপ ২০২৬ ।
প্ৰতীক্ষাৰ অৱসান! আজিৰে পৰা সমগ্ৰ বিশ্বক ফুটবলৰ যাদুৰে সন্মোহিত কৰিবলৈ আৰম্ভ হ’বলৈ গৈ আছে ফিফা বিশ্বকাপ ২০২৬ । কানাডা, মেক্সিকো আৰু আমেৰিকা যুক্তৰাষ্ট্ৰৰ যুটীয়া আয়োজনত হ’বলগীয়া এইবাৰৰ বিশ্বকাপ ইতিহাসৰ আটাইতকৈ বৃহৎ ক্ৰীড়া মহোৎসৱ, য’ত প্ৰথমবাৰৰ বাবে অংশ ল’ব ৪৮টা দলে আৰু অনুষ্ঠিত হ’ব মুঠ ১০৪খন শ্বাসৰুদ্ধকৰ মেচ । ফুটবল জগতৰ কেইবাজনো মহা তাৰকাৰ দুভৰিৰ যাদু চাবলৈ এতিয়া উদগ্ৰীৱ হৈ পৰিছে কোটি কোটি অনুৰাগী ।
উদ্বোধনী খেলখনতে মুখামুখি হ’ব গ্ৰুপ ‘এ’ৰ দুই মহাশক্তি যুটীয়া আয়োজক মেক্সিকো আৰু আফ্ৰিকান শক্তি দক্ষিণ আফ্ৰিকা । ঘৰুৱা দৰ্শকৰ বিপুল সমৰ্থনৰ জোৰত মেক্সিকোৰ দল ‘এল ত্ৰি’ এই খেলখনত ফেভাৰিট হিচাপে খেলপথাৰত নামিব ।
আমোদজনক কথাটো হ’ল, এই খেলখনে অনুৰাগীক মনত পেলাই দিছে ২০১০ চনৰ দক্ষিণ আফ্ৰিকা বিশ্বকাপৰ উদ্বোধনী মেচখনলৈ । সেইবাৰ চিপিৱে চাবালালাৰ ঐতিহাসিক গ’লেৰে দক্ষিণ আফ্ৰিকাই অগ্ৰগতি লাভ কৰিছিল যদিও মেক্সিকোৰ তাৰকা ৰাফায়েল মাৰ্কেজে গ’ল পৰিশোধ কৰি খেলখন ১-১ ড্ৰ’ কৰিছিল ।
সেই সময়ৰ তাৰকা খেলুৱৈ ৰাফায়েল মাৰ্কেজ এইবাৰ খেলপথাৰত নহয়, বৰঞ্চ মেক্সিকোৰ মুখ্য প্ৰশিক্ষক হাভিয়াৰ এগুইৰেৰ সহকাৰী প্ৰশিক্ষক হিচাপে ডাগ-আউটত বহি ৰণনীতি প্ৰস্তুত কৰিব!
ইফালে এই বিশ্বকাপত ভাৰতৰ কোনো দল নাই যদিও লক্ষ লক্ষ ভাৰতীয় ফুটবল অনুৰাগীয়ে অধীৰ আগ্ৰহেৰে এই ক্ৰীড়া মহোৎসৱৰ শুভাৰম্ভণিৰ ক্ষণলৈ বাট চাইছে । নিজৰ প্ৰিয় তাৰকাগৰাকীৰ দুভৰিৰ ছন্দত নাচি উঠিবলৈ সাজু হৈছে অনুৰাগী ।
ফিফা বিশ্বকাপ ২০২৬ ৰ লাইভ মেচ কেনেকৈ চাব ?
সকলোবোৰ মেচ টিভিত জি এণ্টাৰটেইনমেণ্টৰ (Zee Entertainment) নতুন স্পৰ্টচ নেটৱৰ্ক ‘ইউনাইট৮ স্পৰ্টচ’ (Unite8 Sports)-ত পোনপটীয়াকৈ সম্প্ৰচাৰ কৰা হ’ব । আনহাতে, OTT প্লেটফৰ্মৰ কথা ক’বলৈ গ’লে, মেচসমূহৰ লাইভ ষ্ট্ৰীমিং জি৫-ত হ’ব । কোৱাৰ্টাৰ ফাইনেলৰ পৰা পৰৱৰ্তী আটাইকেইখন মেচৰ লগতে কেইখনমান নিৰ্বাচিত মেচ ডিডি স্পৰ্টচ-তো দেখুওৱা হ’ব ।
ইয়াত মন কৰিবলগীয়া এটা কথা হ’ল যে জি৫-ত মেচ চাবলৈ আপোনাৰ ওচৰত জি৫ চাবস্ক্ৰিপচন থকাটো প্ৰয়োজনীয় । যদি আপোনাৰ ওচৰত জি৫ চাবস্ক্ৰিপচন নাই, তেন্তে আপুনি এনেকুৱা যিকোনো ৰিচাৰ্জ প্লেন বাছি ল’ব পাৰে যাৰ সৈতে আপুনি জি৫-ৰ সুবিধা লাভ কৰে, অথবা আপুনি জি৫-ৰ অফিচিয়েল চাইটৰ জৰিয়তেও চাবস্ক্ৰিপচন প্লেন ক্ৰয় কৰিব পাৰে ।
কেতিয়া আৰু ক’ত হ’ব উদ্বোধনী মেচ ?
ফিফা বিশ্বকাপ ২০২৬-ৰ প্ৰথমখন খেল ১১ জুনৰ নিশা ভাৰতীয় সময় অনুসৰি ১২:৩০ বজাত আৰম্ভ হ’ব, য’ত মেক্সিকো চিটি ষ্টেডিয়ামত মেক্সিকো আৰু দক্ষিণ আফ্ৰিকাৰ মাজত মুখামুখি হ’ব । ইয়াৰ পৰৱৰ্তী খেলখন দক্ষিণ কোৰিয়া আৰু চেকিয়াৰ মাজত অনুষ্ঠিত হ’ব । এই মেচখন শুকুৰবাৰে ভাৰতীয় সময় অনুসৰি পুৱা ৭:৩০ বজাত আৰম্ভ হ’ব । ১৩ জুনত ভাৰতীয় সময় অনুসৰি নিশা ১২:৩০ বজাত কানাডাৰ মুখামুখি হ’ব বছনিয়া আৰু হাৰ্জেগোভিনা আৰু ইয়াৰ পিছতে আমেৰিকা যুক্তৰাষ্ট্ৰ আৰু পেৰাগুৱেৰ মাজত অনুষ্ঠিত হ’ব মেচ, যিখন লচ এঞ্জেলছ ষ্টেডিয়ামত ভাৰতীয় সময় অনুসৰি পুৱা ৬:৩০ বজাত আৰম্ভ হ’ব ।
লগতে পঢ়ক : একমাত্ৰ টেষ্টত ঐতিহাসিক জয় ভাৰতৰ : এক ইনিংছ আৰু ৩০০ ৰানৰ বৃহৎ ব্যৱধানত ধূলিস্যাৎ আফগানিস্তান
