২০২৬ চনৰ ফিফা বিশ্বকাপ আৰম্ভ হ’বলৈ মাজত মাত্ৰ কেইটামান দিন বাকী থকা অৱস্থাত ক্ৰীড়াক্ষেত্ৰত এক তীব্ৰ ৰাজনৈতিক বিতৰ্কৰ সৃষ্টি হৈছে
আমেৰিকা যুক্তৰাষ্ট্ৰত অনুষ্ঠিত হ’বলগীয়া ২০২৬ চনৰ ফিফা বিশ্বকাপ আৰম্ভ হ’বলৈ মাজত মাত্ৰ কেইটামান দিন বাকী থকা অৱস্থাত ক্ৰীড়াক্ষেত্ৰত এক তীব্ৰ ৰাজনৈতিক বিতৰ্কৰ সৃষ্টি হৈছে । ইৰানে অভিযোগ উত্থাপন কৰিছে যে আমেৰিকা চৰকাৰে তেওঁলোকৰ ৰাষ্ট্ৰীয় ফুটবল দলটোৰ সৈতে জড়িত এক বৃহৎ সংখ্যক গুৰুত্বপূৰ্ণ বিষয়া আৰু সহযোগী কৰ্মচাৰীক ভিছা প্ৰদান কৰিবলৈ অস্বীকাৰ কৰিছে । ইয়াৰ ফলত প্ৰতিযোগিতাখনত দলটোৰ প্ৰথমখন মেচৰ পূৰ্বেই দুয়োখন দেশৰ মাজত উত্তেজনা বৃদ্ধি পাইছে বুলি ‘এবিচি নিউজ’এ এক প্ৰতিবেদনত প্ৰকাশ কৰিছে ।
এই সমগ্ৰ বিতৰ্কৰ সূত্ৰপাত হয় তুৰস্কত থকা আমেৰিকাৰ ৰাষ্ট্ৰদূত টম বাৰাকৰ এটা ছচিয়েল মিডিয়া প’ষ্টক কেন্দ্ৰ কৰি । বাৰাকে আংকাৰাত থকা আমেৰিকাৰ দূতাবাসৰ বিষয়া তথা কৰ্মচাৰীসকলক ইৰানৰ ৰাষ্ট্ৰীয় দলৰ ভিছা প্ৰক্ৰিয়াকৰণ কৰাৰ বাবে প্ৰশংসা কৰিছিল । তেওঁ ‘এক্স’ (পূৰ্বৰ টুইটাৰ)ত লিখিছিল যে খেল-ধেমালিয়ে সকলো সীমা অতিক্ৰম কৰে আৰু আমেৰিকাই সমগ্ৰ বিশ্বৰ প্ৰতিযোগী তথা অনুৰাগীসকলক আদৰিবলৈ উন্মুখ হৈ আছে ।
অৱশ্যে, তুৰস্কস্থিত ইৰানৰ দূতাবাসে এই বক্তব্যক তীব্ৰভাৱে খণ্ডন কৰে আৰু ক্ষোভ প্ৰকাশ কৰে । তেওঁলোকে অভিযোগ কৰে যে ইৰানৰ প্ৰতিনিধি দলটোৰ কেইবাজনো গুৰুত্বপূৰ্ণ সদস্যক প্ৰৱেশাধিকাৰ বা ভিছা দিয়া হোৱা নাই । দূতাবাছটোৱে নিজৰ প’ষ্টত কয় যে কেৱল নিজৰ প্ৰশংসা নিজে কৰি আমেৰিকাই ফিফাৰ নিয়ম উলংঘা কৰা আৰু আয়োজক দেশ হিচাপে নিজৰ দায়িত্বক অৱহেলা কৰা কাৰ্য লুকুৱাব নোৱাৰে । তেওঁলোকে প্ৰশ্ন উত্থাপন কৰে যে মেনেজমেণ্ট, কাৰ্যবাহী কৰ্মচাৰী আৰু কাৰিকৰী উপদেষ্টাৰ দৰে দলৰ এক অবিচ্ছেদ্য অংশস্বৰূপ লোকসকলৰ এটা ডাঙৰ অংশক ভিছা নাকচ কৰাৰ কথাটো কিয় লুকুৱাই ৰখা হৈছে । ইৰানৰ মতে, এয়া ক্ৰীড়াক্ষেত্ৰত ৰাজনৈতিকভাৱে পক্ষপাতদুষ্ট হস্তক্ষেপৰ আটাইতকৈ বেয়া ৰূপ আৰু ইয়াৰ বাবে ফিফাই আমেৰিকাক জবাবদিহি কৰিব লাগিব ।
একেদৰে, দক্ষিণ আফ্ৰিকাত থকা ইৰানৰ দূতাবাসেও আমেৰিকাক এক “অযোগ্য আয়োজক” বুলি আখ্যা দি তীব্ৰ সমালোচনা কৰে। ‘এবিচি নিউজ’ৰ মতে, প্ৰতিযোগিতাখন অতি সোনকালেই আৰম্ভ হ’বলগীয়া থকা স্বত্বেও দলটোৰ মেনেজমেণ্ট আৰু কাৰিকৰী দলৰ এক বৃহৎ অংশই এতিয়াও ভিছা পোৱা নাই ।
এই প্ৰত্যাহ্বানমূলক পৰিস্থিতি আৰু পশ্চিম এছিয়াৰ আঞ্চলিক উত্তেজনাৰ মাজতে ইৰানৰ দলটোৱে নিজৰ প্ৰস্তুতি চলাই গৈছে । শেহতীয়া প্ৰস্তুতিমূলক মেচত তেওঁলোকে মালি, কষ্টা ৰিকা আৰু গাম্বিয়াৰ বিৰুদ্ধে জয়লাভ কৰিছে, যদিও নাইজেৰিয়াৰ হাতত পৰাস্ত হ’বলগীয়া হৈছিল ।
নিৰ্ধাৰিত সূচী অনুসৰি, ইৰানৰ দলটো দেওবাৰে মেক্সিকোৰ টিজুৱানাত উপস্থিত হ’ব আৰু তাৰ পিছত গ্ৰুপ পৰ্যায়ৰ মেচসমূহ খেলিবলৈ আমেৰিকাত প্ৰৱেশ কৰিব । ইৰানে ১৫ জুনত কেলিফৰ্ণিয়াৰ ইংলেউডত নিউজিলেণ্ডৰ বিৰুদ্ধে নিজৰ বিশ্বকাপ অভিযান আৰম্ভ কৰিব । অৱশ্যে, ইৰানৰ সহযোগী কৰ্মচাৰীসকলৰ ভিছাৰ স্থিতি সম্পৰ্কে উত্থাপিত এই গুৰুতৰ অভিযোগৰ সন্দৰ্ভত ফিফা বা আমেৰিকা যুক্তৰাষ্ট্ৰৰ কৰ্তৃপক্ষই বৰ্তমানলৈকে ৰাজহুৱাভাৱে কোনো প্ৰতিক্ৰিয়া প্ৰকাশ কৰা নাই ।
লগতে পঢ়ক : ঐতিহাসিক ২০২৬ ফিফা বিশ্বকাপ : ৪৮ টা দল আৰু ১,২৪৮ জন খেলুৱৈৰে হ’ব সৰ্ববৃহৎ ফুটবল মহোৎসৱ
