গুৱাহাটীত ভংগ হ’ল ১৪৮ বছৰীয়া এক পৰম্পৰা
গুৱাহাটীৰ বৰ্ষাপাৰা ক্ৰিকেট ষ্টেডিয়ামত ভাৰত আৰু দক্ষিণ আফ্ৰিকাৰ মাজত অনুষ্ঠিত হোৱা দ্বিতীয়খন টেষ্ট মেচত ইতিহাস সৃষ্টি হয় । দৰাচলতে ক্ৰিকেটৰ আটাইতকৈ দীঘলীয়া ফৰ্মেটৰ ১৪৮ বছৰীয়া ইতিহাসত প্ৰথমবাৰৰ বাবে নিয়মীয়া টেষ্ট মেচত দুপৰীয়াৰ আহাৰ গ্ৰহণৰ পূৰ্বে চাহ বিৰতি লোৱা হয় । দিবা-নৈশ টেষ্টত সাধাৰণতে ৰাতিৰ আহাৰ খোৱাৰ আগতে চাহ খোৱা হয় যদিও প্ৰথম টেষ্ট আয়োজন কৰা গুৱাহাটীয়ে দুপৰীয়াৰ আহাৰ গ্ৰহণৰ পূৰ্বে চাহৰ বিৰতি লৈ এক নতুন অভিলেখ গঢ়ি তুলিছে ।
কিয় লোৱা হ’ল এই সিদ্ধান্ত ?
উত্তৰ-পূব ভাৰতত আগতীয়াকৈ হোৱা সূৰ্য্য উদয় আৰু সূৰ্যাস্তৰ বাবেই এই সিদ্ধান্ত লোৱা হয় । ফলত টেষ্ট মেচৰ প্ৰথম অধিবেশন পুৱা ৯:০০ বজাৰ পৰা ১১:০০ বজালৈ অনুষ্ঠিত হয়, তাৰ পিছত পুৱা ১১ বজাৰ পৰা ১১:২০ বজালৈ চাহৰ বিৰতি অনুষ্ঠিত হয় ।
উল্লেখ্য যে, গুৱাহাটীৰ বৰ্ষাপাৰা ক্ৰিকেট ষ্টেডিয়ামত ভাৰতৰ বিৰুদ্ধে অনুষ্ঠিত দ্বিতীয়খন টেষ্টত দক্ষিণ আফ্ৰিকাৰ অধিনায়ক টেম্বা বাভুমাই টছত জয়লাভ কৰি প্ৰথমে বেটিং কৰিবলৈ সিদ্ধান্ত লয় । ইতিমধ্যে এই শৃংখলাত ১-০ ব্যৱধানত পিছ পৰি আছে টিম ইণ্ডিয়া । দুখন মেচৰ শৃংখলাৰ দ্বিতীয়খন মেচত জয়ী হোৱাটো ভাৰতৰ বাবে অতি গুৰুত্বপূৰ্ণ ।
