দ্বিতীয় এদিনীয়াটো ব্যৰ্থ বিৰাট কোহলী
ভাৰতৰ প্ৰবীণ বেটছমেন বিৰাট কোহলীয়ে অষ্ট্ৰেলিয়া ভ্ৰমণত ৰান সংগ্ৰহৰ বাবে সংগ্ৰাম কৰি থকা পৰিলক্ষিত হৈছে । এই পৰ্যন্ত দুখন মেচত কোনো ৰান নকৰাকৈ আউট হৈছে কোহলী ।
পাৰ্থত অনুষ্ঠিত হোৱা প্ৰথমখন এদিনীয়াত আন্তঃৰাষ্ট্ৰীয় ক্ৰিকেটত দীৰ্ঘদিনৰ অন্তত প্ৰত্যাৱৰ্তন ঘটাইছিল এই প্ৰবীণ বেটছমেনগৰাকীয়ে । সকলোৱে আশা কৰিছিল দীৰ্ঘদিনৰ অন্তত প্ৰত্যাৱৰ্তন ঘটোৱা কিং কোহলীয়ে চমকপ্ৰদ প্ৰদৰ্শন আগবঢ়াব । কিন্তু এই আশাত চেঁচা পানী ঢালে তাৰকা বেটছমেনজনে । মেচখনত শূণ্যতে আউট হয় বেটছমেনগৰাকী । ইয়াৰ পিছতে দ্বিতীয়খন এদিনীয়াত কোহলীয়ে নিজৰ ছন্দ ঘূৰাই পাব বুলি আশা কৰা হৈছিল যদিও এইখন মেচতো আশাহত হয় অনুৰাগী । আজি এডিলেইডত অনুষ্ঠিত দ্বিতীয়খন মেচতো শূণ্যতে পেভিলিয়নমুখী হয় বিৰাট কোহলী ।
ইফালে এই মেচত যেতিয়া কোহলী আউট হোৱাৰ পিছত পেভিলিয়নলৈ উভতি আহিছিল তেতিয়া তেওঁ দৰ্শকৰ প্ৰতি হাত জোকাৰিছিল । ইয়াৰ পিছতে এতিয়া কোহলীয়ে এদিনীয়া খেলৰ পৰাও অৱসৰৰ ইংগিত দিছে নেকি সেই সন্দৰ্ভত জল্পনা-কল্পনাৰ সৃষ্টি হৈছে ।
এদিনীয়া কেৰিয়াৰত প্ৰথমবাৰৰ বাবে একেৰাহে শূণ্যত আউট-
অভিজ্ঞ ভাৰতীয় বেটছমেন বিৰাট কোহলীয়ে অষ্ট্ৰেলিয়া ভ্ৰমণত ছন্দলৈ ঘূৰি অহাৰ বাবে কষ্টকৰ সংগ্ৰাম কৰি আছে । ২০২৭ চনৰ এদিনীয়া বিশ্বকাপত খেলাৰ লক্ষ্য ৰখা বিৰাট কোহলীয়ে অষ্ট্ৰেলিয়াৰ বিৰুদ্ধে একেৰাহে দুখন মেচত কোনো ৰান নকৰাকৈ আউট হয় । এদিনীয়া কেৰিয়াৰত কোহলী একেৰাহে দুখন মেচত শূণ্যত আউট হৈছে । ইয়াৰ পূৰ্বে এডিলেইডত কোহলীৰ অভিলেখ অত্যন্ত ভাল আছিল যদিও এইবাৰ তেওঁৰ প্ৰিয় খেলপথাৰত ডাঙৰ ইনিংছ খেলিবলৈ ব্যৰ্থ হয় ।
প্ৰথমে বেটিং কৰি ভাৰতে পাৱাৰপ্লে’তে দুটা উইকেট হেৰুৱাইছিল । দ্বিতীয় অভাৰত জেভিয়াৰ বাৰ্টলেটে ভাৰতক দুটা আঘাত দিয়ে । তেওঁ প্ৰথমে অধিনায়ক শুভমন গীলক আউট কৰে আৰু তাৰ পিছত কোহলীক এল বি ডব্লিউ কৰে । বাৰ্টলেটৰ আবেদনত আম্পায়াৰে কোহলীক আউট দিছিল যদিও বিৰাট কোহলীয়ে ডি আৰ এছ ল’ব বিচাৰিছিল । অৱশ্যে আনটো মূৰত থিয় হৈ ৰোহিতে তেওঁক ডি আৰ এছ নল’বলৈ পৰামৰ্শ দিছিল কাৰণ তেওঁ জানিছিল যে কোহলী আউট হৈছে । বিৰাটে নিজৰ পূৰ্বৰ অধিনায়কৰ কথা শুনি পেভিলিয়নলৈ উভতি আহে ।
দৃষ্টি আকৰ্ষণ কৰিছে বিৰাট কোহলীৰ ইংগিতে-
কোহলীৰ আউট হোৱাৰ পিছত অনুৰাগীসকল হতাশ হৈ পৰে । তেওঁ ড্ৰেছিং ৰুমলৈ উভতি অহাৰ সময়ত তেওঁ যিদৰে দৰ্শকৰ প্ৰতি হাত জোকাৰিছিল সেয়া সকলোৰে দৃষ্টি আকৰ্ষণ কৰে । উইকেট হেৰুৱাই পেভিলিয়নলৈ উভতি অহাৰ সময়ত কোহলীয়ে ৰাইজক সম্ভাষণ জনাবলৈ হাত দাঙি ধৰাৰ ভিডিঅ’ ছ’চিয়েল মিডিয়াত ভাইৰেল হৈ পৰিছে । ইয়াক কোহলীৰ অৱসৰৰ সৈতে জড়িত কৰিছে একাংশ অনুৰাগী তথা বিশ্লেষকে । এতিয়া কোহলীয়ে এদিনীয়া খেলৰ পৰাও অৱসৰ লোৱাৰ ইংগিত দিছে নেকি সেই সন্দৰ্ভত ছ’চিয়েল মিডিয়াত আলোচনা তীব্ৰতৰ হৈ পৰিছে ।
লগতে পঢ়ক : এছিয়া কাপ ট্ৰফীক লৈ বি চি চি আইয়ে ল’লে ডাঙৰ সিদ্ধান্ত!
